ತೊ

ಅಂತಸ್ಕರ್ನ್/ಕೊಶೆಡ್ದ್ ಮ್ಹಳ್ಳೆಂ ನಾತ್‌ಲ್ಲೊ ಮನಿಸ್ ಆನಿ ಖಡ್ಪಿ ಫಾತೊರ್ ಹಾಂಚೆಮಧೆಂ ಕಸಲೊಚ್ಚ್ ಫರಕ್ ನಾ. ಮನಿಸ್ ಚಿಂತುಂಕ್ ಸಕ್ತಾ, ವಿಚಾರ್ ಕರುಂಕ್ ಸಕ್ತಾ, ಬರೆಂ-ವಾಯ್ಟ್ ಮಾಪುಂಕ್ ಸಕ್ತಾ. ಪುಣ್ ಅಪ್ಲೊ ಸ್ವಾರ್ಥ್, ಅಬ್ಲೇಸ್‌ಪಣಾಚೆಂ ಚಿಂತಾಪ್ ಸೊಡ್ಲ್ಯಾರ್ ಮಾತ್ರ್. ಆಯ್ಚ್ಯಾ ಸ್ಪರ್ಧಾತ್ಮಕ್ ಕಾಳಾರ್ ಹರೇಕ್ ಮನಿಸ್ ಅಪ್ಲೊಚ್ ದಾಂಗ್ರೊ ಮಾರ್ತಾ, ಅಪುಣ್ ಉಂಚ್ಲೊ ಮ್ಹಣುನ್ ರುಜು ಕರುಂಕ್ ಹೆರಾಂಚಿ ಖೆಳ್ಕುಳಾಂ ಕರ್ತಾ. ದುರ್ಭಾಗ್‌ಪಣಾನ್ ಹಾಂತುಂ ಕವಿಯ್ ಯತೇಶ್ಟ್ ಮಾಪಾನ್ ಭರೊನ್ ಗೆಲ್ಯಾತ್ ಆನಿ ಅಪ್ಲೊ ಸ್ವಾಭಿಮಾನ್ ಸಯ್ತ್ ಆಡೊವ್ ಘಾಲುನ್ ಕೊಣಾಕೊಣಾಚೆಂ ಉಶ್ಟೆಂ ಲೆಂವುಂಕ್ ರಾಕೊನ್ ಆಸಾತ್, ಲೆಂಬೆವ್ನ್ ಆಸಾತ್ ಆನಿ ಹಾಂಕಾಂ ವೆಳಾಕಾಳಾರ್ ಉಶ್ಟೆಂ ಘಾಲುನ್ ಪೊಸ್ಚೆಯ್ ಆಸಾತ್. ಅಸಲ್ಯಾ ಶೆಣಾಂತ್ಲ್ಯಾ ಕಿಡ್ಯಾಂಥಾವ್ನ್ ಕೊಣೆಂಯ್ ಕಿತೆಂ ಅಪೇಕ್ಶಾ ಕರುಯೆತಾ? ಜಶೆಂ ಸಾರ್‌ಯಾಂತ್ಲೊ ರೆಂಟೊ ಸಯ್ತ್ ಅಪ್ಲೇಸ್ತಕಿಂ ಚಿಂತಾ; ಸಂಸಾರ್ ಅಪ್ಣಾಥಾವ್ನ್‌ಚ್ ನಿತಳ್ ಜಾತಾ ತಶೆಂ ಹಾಂಗಾ ತಾಂಚೆಚ್ ಕಾಯ್ದೆ ಆನಿ ತಾಂಚಿಂಚ್ ಕಾನುನಾಂ ಮ್ಹಣ್ತಚ್ ಆತ್ಮ್‌ಗವ್ರವಾಚೆ ಮನಿಸ್ ಮೊನೆಚ್ಚ್ ಜಾವ್ನ್ ಉರ್ತಾತ್. ಕಾಂಯ್ ಅಸಲಿ ಕವಿತಾ ತ್ಯಾ ಹಡ್ಬ್ಯಾ ಚಿಂತ್ಪಾಚ್ಯಾಂಕ್ ನಾಗ್ಡೆಂ ಕರ್ತಾತ್.

ಮಾ|ಪ್ರತಾಪ್ ನಾಯ್ಕ್ ಮ್ಹಾಕಾ ಥೊಡ್ಯಾ ಕಾರಣಾಂಕ್ ಲಾಗುನ್ ಭೋವ್ ಲಾಗ್ಸಿಲೊ; ಭಾಸೆಚೊ ಗಿನ್ಯಾನಿ, ಗೂಂಡ್ ಚಿಂತ್ಪಿ, ವೈಚಾರಿಕ್, ತಾತ್ವಿಕ್ ನಿಯಾಳಾಚ್ಯೊ ತಾಚ್ಯೊ ಕವಿತಾ ಕಾಂಯ್ ವೆಕ್ತಿತ್ವಾಕ್ ನಿರ್ಮಿತ್ ಕರ್ಚೆ ತಸಲ್ಯೊ, ತಿತ್ಲೊಚ್ಚ್ ಸಾದೊ ಆನಿ ಮೊವಾಳ್ ವೆಕ್ತಿತ್ವಾಚೊ. ಚಿಮ್ಟಿಭರ್ ಜಾಣ್ವಾಯೆಚೊ ವೊಸೊ ಘೆವ್ನ್ ದಾಂಗ್ರೊ ಮಾರ್ತೆಲ್ಯಾಂನಿ ಹಾಚೆಥಾವ್ನ್ ಶಿಕಾಜಯ್ ಜೆಂ ವಿಸ್ರುನ್ ಗೆಲ್ಲೆಂ ಸಾಂಗಾಪ್ ’ಭರ್‌ಲ್ಲೊ ಕೊಳ್ಸೊ ಅಲ್ಕಾಂದಾನಾ’. ಹಿ ಕವಿತಾ ಕಾಂಯ್ ಸಾಮಾಜಿಕ್ ಸ್ಥರಾಚೆಂ ಮಾತ್ರ್ ನ್ಹಯ್, ಸಮಾಜಿಂತ್ಲ್ಯಾ ಪೊಕೊಳ್, ರಾಜಕೀಯ್, ಹಿಜ್ಡೆಂ ವೆಕ್ತಿತ್ವಾಚಿಂ ಪಾಳಾಂ-ಮುಳಾಂ ಉಸ್ತುಂಚೆಂ ಕಾಮ್ ಭೋವ್ ಅಪುರ್ಭಾಯೆನ್ ಕರ್ತಾನಾ ಜಾಯ್ತಿಂ ಮುಖೊಟಿಂ ಅಪ್ಶಿಂಚ್ ಝಡುಂಕ್ ಧರ್ತಾನಾ ದೊಳ್ಯಾಂ ಸಮೊರ್ ಉಭಿಂ ಜಾಂವ್ಚಿಂ ಕಸಲಿಂ ಮ್ಹಳ್ಳೆಂ ಪಳೆಂವ್ಕ್ ಆನಿ ಪಾರ್ಕುಂಕ್ ತುಕಾಚ್ ಸೊಡ್ತಾಂ.

ತೊ

ಕೆದ್ನಾಂ ತರೀ

ಹಾಂಗಾ ಆಯ್ಲೊ

ಆಮ್ಚ್ಯಾ ಲೊಕಾಚಿ

ಸೆವಾ ಕರುಂಕ್ ಲಾಗ್ಲೊ

ತೆದ್ನಾಂ

ಹೊ ಪ್ರಶ್ನ್

ಆಮ್ಚೆ ಮುಕಾರ್

ಉಭೊ ರಾವ್ಲೊ.

ಕೊಣ್ ಮ್ಹಣ್ತಾ

ತಾಚ್ಯಾ ಆಂಗಾರ್

ಮನ್ಶಾ ರುಪಾನ್

ಲಿಪ್ಲಾ ದೆಂವ್ಚಾರ್

ಶಿಟುಕ್ ರಾವಾತ್

ತಾಕಾ ಮಾಥ್ಯಾರ್

ಘೆವುಂ ನಾಕಾತ್

ತುಮ್ಚಿ ಶೆಂಡಿ

ಹಾತಾಂತ್ ದಿಲ್ಯಾರ್

ತುಮ್ಚಿ ಶೆಂಪ್ಡಿಯೀ

ಕಾಪುನ್ ವ್ಹೆಲ್ಯಾರ್

ನಾಕ್ ಕಾತ್ರುನ್

ಭೊಂವ್ಚೆಂ ಪಡತ್

ಕೊಣ್ ಸಾಂಗ್ತಾ;

ತೊ ದ್ರೋಹಿ

ಆಮ್ಚೆ ಮಧೆಂ

ಫುಟ್ ಘಾಲ್ಪಿ

ದೊರೆ ಕರ್ಪಿ

ಆಮ್ಚ್ಯಾ ಆಂಗಾಂತ್ ಫುಗ್ಡಿ

ತಾಂಚ್ಯಾ ಆಂಗ್ಣಾಂತ್ ದೆಖ್ಣಿ

ನಾಚ್ತಾಂ ಗಾಯ್ತಾಂ

ಕೆದ್ನಾಂ ತರಿ

ಆಮ್ಚ್ಯಾ ಫೊಟಾರ್

ಖೊಂಟ್ ಮಾರ್ಪಿ

ಕೊಣ್ ಸುಸ್ಕಾರ್‍ತಾ:

ತಾಕಾ ಜಶಿ

ಜೀಬ್ ಸುಟ್ಲಿ

ಆಮ್ಚಿ ಫಿತುರಿ

ಸ್ವಾರ್ಥಿ ತುತುರಿ

ತಾಣೆಂ ಫುಟಯ್ಲಿ

ಪೆಜೆ ವಾಂಗ್ಡಾ

ಪೆಜೆ ವಾಟ್ಲಿ

ಹಿಸ್ಕಾವ್ನ್ ಘೆವ್ನ್

ಜೀಣ್ ಆಮ್ಚಿ

ಆಳ್ಣಿ ಕೆಲಿ.

ಕೊಣ್ ಹುಸ್ಕೆತಾ:

ತಾಣೆ ಆಮ್ಚೆ

ಕಪಟಿ ಪಡ್ದೆ

ಫಾಳುನ್ ಫಾಪ್ಸುನ್

ಸ್ವಾರ್ಥಿ ಕೊಳ್ಸುಲೆ

ಧಾಡಾವ್ನ್ ಫುಟವ್ನ್

ಆತಾಂ ಆಮ್ಕಾಂ

ಕೆಲೆಂ ನಾಗ್ಡೆ

ಕೆಲೆ ಲಂಗ್ಡೆ.

ಕೊಣ್ ಪಿಂರ್‍ಗತಾ:

ತೊ ಆಮ್ಚೊಚ್

ಪುಣ್ ಕಿತ್ಯಾಕ್

ಮ್ಹಣ್ ಕೊಣ್ ಜಾಣಾ

ಆಮಿ ಉಡಯ್ಲೆಲೆ

ಮಾನಾಚ್ಯೆ ಗರಿಯೆಕ್

ಭಿಕೆಚ್ಯೆ ದಾವ್ಲೆಕ್

ತೊ ಸಾಂಪ್ಡನಾ

ಆಮಿ ದಿಲಲೆಂ

ತೊಖ್ಣಾಯೆಚೆಂ ದಾವೆಂ

ಟಿಕೆಚೆಂ ಜಾಳೆಂ

ಚಿಡ್ಡುನ್ ಮುಡ್ಡುನ್

ಆಮ್ಚ್ಯಾ ತೊಂಡಾರ್

ಶೆವ್ಟುನ್ ಮಾರುನ್

ಆಪ್ಲಿಚ್ ವಾಟ್

ಧರುನ್ ವೆತಾ.

ಕೊಣ್ ಶಿಡ್ಕಾಯ್ತಾ:

ತೊ ಜಾಯ್ತ್

ಆಮ್ಚ್ಯಾ ಕಾಳಾರ್

ಆಮ್ಚ್ಯಾ ಗಾಂವಾಂತ್

ಉದೆವ್ನ್ ಯೆವ್ಪಿ

ಋಷಿ ಮುನಿ

ಪ್ರವಾದಿ ವಾ ಪಾರ್ಕಿ

ವಾಟೆರ್ ತಾಚ್ಯೆ

ಘಾಲುನ್ ಕಾಂಟೆ

ಜಾಂವ್ಚೆ ನಾಂತ್

ತುಮಿ ಜಾಣ್ತೆ.

ಶೆತಾಂತ್ಲ್ಯಾ ಮಾಲುಂಡಾಂನೊ

ಮೆರೆರ್ ರಾವುನ್

ತಾಚೆರ್ ತುಮಿ

ಗಾಳಿ ಶಿಂವರಾಚಿಂ

ತುಮ್ಚಿಂ ಆಸ್ತ್ರಾಂ

ಸೊಡಿತ್ ರಾವ್ಲೆ

ಕಾಳ್ಕಾಚ್ಯಾ ಪುಜಾರ್‍ಯಾಂನೊ

ಆಪಲಿಪಾ ಖೆಳುನ್

ಟೊಪನ್ ನಾಂವಾಂ ವಾಪ್ರುನ್

ತಾಂಚೆರ್ ಕಾಂಯ್

ಫಾತರ್ ಮಾರುನ್

ಮಾಂಯ್ ದೆಸಾಚೆ

ಮಾಂಯ್ ಭುಂಯೆಚೆ

ತುಮಿ ರಾಕಣ್ದಾರ್ ಜಾತಲೆ?

ತುಮ್ಚ್ಯಾ ಮೆಘಾಸ್ತ್ರಾಕ್

ತಾಚೆಂ ವಾಯುಅಸ್ತ್ರ್

ತುಮ್ಚ್ಯಾ ಅಗ್ನಿ ಅಸ್ತ್ರಾಂಕ್

ತಾಚೆಂ ಜಲಾಸ್ತ್ರ್

ತುಮ್ಚ್ಯಾ ಸರ್ಪಾಸ್ತ್ರಾಕ್

ತಾಚೆಂ ಗೊರುಡಾಸ್ತ್ರ್

ತುಮ್ಚ್ಯಾ ಸೊರ್ವೊಸ್ತ್ರಾಂಕ್

ತಾಚೆಂ ಮೌನಾಸ್ತ್ರ್

ಸರ್ವಾಂತ್ ಬಳಿಶ್ಟ್

ಹೆಂ ತುಮ್ಕಾಂ

ಅಜೂನ್ ಸಮ್ಜಲೆಂ ನಾ?

ತುಮ್ಚಿ ಜೊಳಿ

ತುಮ್ಚಿ ಟೊಳಿ

ಇನ್ಕಾರ್ ಕರ್ಪಿ

ಕಿತ್ಯಾಕ್ ಜಾತಾ

ತುಮ್ಚೊ ವಯ್ರಿ?

ತುಮ್ಚೆ ವಿಚಾರ್

ತುಮ್ಚೆ ಆಚಾರ್

ಖೊಡುನ್ ಕಾಡ್ಪಿ

ಕಸೊ ಜಾತಾ

ತುಮ್ಚೊ ಧ್ವೇಷಿ?

ಶೆಕ್ಡ್ಯಾಂ ಪಾಸುನ್

ತುಮ್ಚೆಂ ಹೆಂಚ್

ಚಲತ್ ಆಯ್ಲಾಂ

ಖುರ್ಸಾರ್ ಮಾರಪ್

ಫಾಶಿ ದಿವಪ್

ವೀಕ್ ಘೆವಪ್

ಧಮ್ಕಿ ದಿವಪ್

ಭಹಿಷ್ಕಾರ್ ಘಾಲಪ್

ಸರಿಯೆರ್ ಲಾಸಪ್

ಜೀವ್ ಕಾಡಪ್

ಉಪ್ರಾಂತ್ ತುಮಿ

ರಗ್ತಾಂತ್ ಬುಡ್ಲಲೆ

ಪಾಪಾಚೆ ಹಾತ್

ಕುಲ್ಯಾಂಕ್ ಪುಶಿತ್

ಹಾಂಸತ್ ಮ್ಹಣಾಪ್:

ಹಾಲಿಂ ತಾಚೆಮುರೆ

ಚಡ್‌ಚ್ ಜಾಲೆಂ

ಅತ್ಮೊ ರಕ್ಷಣಾಕ್ ಲಾಗುನ್

ತಾಕಾ ಆಮಿ

ಇತ್ಲೆ ವೆಗಿಂ

ಕಾಡ್ಚೊಚ್ ಪಡ್ಲೊ!

- ಪ್ರತಾಪ್ ನಾಯ್ಕ್ ಜೆ.ಸ., ಗೊಯಾಂ [ಫೆಬ್ರೆರ್ 2018]

ಪ್ರತಾಪ್ ನಾಯ್ಕ್ ಜೆ.ಸ.: ಭಾಸೆಚೊ ಗಿನ್ಯಾನಿ, ಗೂಂಡ್ ಚಿಂತ್ಪಿ, ವೈಚಾರಿಕ್, ತಾತ್ವಿಕ್ ನಿಯಾಳಾಚ್ಯೊ ತಾಚ್ಯೊ ಕವಿತಾ ಕಾಂಯ್ ವೆಕ್ತಿತ್ವಾಕ್ ನಿರ್ಮಿತ್ ಕರ್ಚೆ ತಸಲ್ಯೊ, ತಿತ್ಲೊಚ್ಚ್ ಸಾದೊ ಆನಿ ಮೊವಾಳ್ ವೆಕ್ತಿತ್ವಾಚೊ. ಗೊಂಯ್ಚಾ ಸಾಂ|ಸ್ಟೀಫನ್ಸ್ ಕೊಂಕಣಿ ಸಂಸ್ಥೊ ಹಾಂಗಾಸರ್ ಜಾಯ್ತಿಂ ವರ್ಸಾಂ ಸೆವಾ ದಿಲ್ಲೊ ಹೊ ಪ್ರಸ್ತುತ್ ಪಣ್ಜಿಚ್ಯಾ ಜೆಜ್ವಿಸ್ ಘರಾಂತ್ ವಸ್ತಿ ಕರುನ್ ಆಸಾ ತರ್‌ಯೀ, ಕೊಂಕಣಿ ಭಾಸೆಕ್ ಹಾಣಿಂ ದೀವ್ನ್ ಆಯಿಲ್ಲಿ ದೇಣ್ಗಿ ಭೋವ್ ವರ್ತಿ ತಶೆಂಚ್ ಕೊಣೆಂಯ್ ಅಭಿಮಾನ್ ಪಾವುಂಕ್ ಜಾಯ್ ತಸಲಿ.