सुटका

’सर्व धर्म बरेंच करुंक सांग्तात तर ह्या संसारांत अनीत कित्याक चडून येता?’ - हें चिंताप हऱ्येका मनशान चिंतचें भोव गर्जेचें जावनासा. सर्व धर्म ’बरेंच’ करुंक सांग्तात तर, सगळे भक्त ’बरेंच’ कर्तात तर, ताणीं ’बरें’ म्हण चिंतचा वा पात्येंवचा संग्तेंत निजायकी दुभाव जाता. स्वतंत्र हें न्हय‌की कितेंय कर्चें, स्वतंत्र हें की - बरेंच कर्चें.

समाजीक चित्रण दिंवची ही कविता फकत्त उत्रांची रास न्हय, बगार हकीगत. ’अच्चे दीन आयेंगे’ म्हळ्ळे नारे अजून आमच्या कानांनी गाजोन आसात, तर हेगी अच्चे दीन?

साहितीक शिक्षक जोन सुंटिकोप्पची ही कविता कांय असकत अत्म्यांचें रुदान कर्चें आयकता.

सुटका

सुटका मेळ्ळ्यारे सायभा

सुटका मेळ्ळ्या

दीस रात नागडें नाचून

मिट्यो माऱ्यां

गांव गांवांनी

हळ्ळी हळ्ळेंनी सोरो भऱ्यां

भर्न भर्न

आपणें सगळें लगाड काड्यां

सुटका मेळ्ळ्यारे सायभा

सुटका मेळ्ळ्या

हलळी हळ्ळेंनी

गरां गरांनी

इस्पीट खेळ्यां

चोरी कर्न सोरो उकडोन

अंगालाप तिर्सियां

सुटका मेळ्ळ्यारे सायभा

सुटका मेळ्ळ्या

झंडा ऊंचा रहे हमारा पदां गाव्यां

हिंदू-मुसलीम मोगान - घुटान कोयती पाज्यां

पाजून पाजून रगत व्हाळवन लगाड काड्यां

सुटका मेळ्ळ्यारे सायभा

सुटका मेळ्ळ्या

गल्ले गल्लेंनी

निर्जन रसत्यांनी चेडवांक धोस्यां

सास्पून सास्पून आंग आपदन

बलत्कार कऱ्यां

अमकां सुटका मेळ्ळ्यारे सायभा

सुटका मेळ्ळ्या

पार्टी गिर्टी एलिसांव म्हणीन विणगे जाव्यां

हांचे तांचे भितरलें भयलें

उसतून काड्यां

आमी धुंयेस जाव्यां

अरे सुटका मेळ्ळ्यारे सायभा

सुटका मेळ्ळ्या

* धुंयेस (गाद्यांत आसची एका थराची कीड)

- जॊन सुंटिकोप्प [अगोसत, २०१७]

जॊन सुंटिकोप्प: कानडि भासेंत अपुर्भायेच्यो कविता/काण्यो बरंवचो जॊन डि’सॊज, वृत्तेन ऎक शिक्षक. साहित्याचें पद्युत्तर शिकाप जोडुन आस्चो हो ऎक भॊव संवॆदन्‌शील तशेंच भॊव मोवाळ/खाल्तो. पुण चिंत्नांनि तित्लोच्च परिपक्व. समाजिंत्ल्या वांक्ड्यांचेर विमर्शात्मक नदर घाल्चें चिंताप हाच्या चड्ताव बर्पांनि निशेता.