[ವ್ಹಾ! ಸಭ್ದಾಥಾವ್ನ್‌ಚ್]

ವ್ಹಾ! ಸಭ್ದಾಥಾವ್ನ್‌ಚ್ ಸುರ್ವಾತ್ ಕರುಂಕ್ ಪಡ್ತಾ ಜೆದ್ನಾಂ ಹ್ಯಾ ಕವಿತೆವಿಶಿಂ ಉಲಯ್ತಾನಾ, ಕಸಲಿಂ ಅಪುರ್ಭಾಯೆಚಿಂ ಸ್ವಪ್ಣಾಂ, ಎಕಾ ಪಿಂತುರಾಂತ್ಲ್ಯಾ ಚಲಿಯೆಚಿಂ. ಮೆಟಾಂ ಮೆಟಾಂಕ್ ಇಮಾಜ್ಯಾಂಚೊ ದೊಂಗೊರ್ ರುತಾಂ ಕರ್ಚಿಂ ಕಲ್ಪನಾಂ ಆನಿ ವರ್ಣನಾಂ ಪಳೆತಾನಾ ನಿಜಾಯ್ಕಿ ಹಿ ಕವಿತಾ ಏಕ್ ಸುಂದರ್ ಪಿಂತುರಾರುಪಾರ್ ದೊಳ್ಯಾಂ ಹುಜಿರ್ ಉಭಿ ಜಾತಾ. ಆನಿ ಎಕಾಚ್ಚ್ ಖಿಣಾನ್ ಹೆಂ ಸರ್ವ್ ಘಡುನ್ ಸೊಡ್ಲೆಂಗಾಯ್ ಮ್ಹಣ್ತಾಸ್ತಾಂ, ಸ್ತ್ರೀ ಸಂಯ್ಬಾಚಿ ಲಜ್, ಕೌತುಕಾಯ್, ಆತುರಾಯ್, ತಶೆಂಚ್ ಸ್ವಪ್ಣೆಂವ್ಚೆ ಸರ್ವ್ ಗೂಣ್/ಅವ್ಗುಣ್ ಧರ್ಣಿಚೆರ್ ಪಡ್ಲೆಲ್ಯಾ ಚಾಂಪ್ಯಾಫುಲಾಚೆರ್ ಅಪ್ಲೆಂ ಪಡ್‌ರುಪ್ಣೆಂ ಪಳೆತಾಶೆಂ ಭಗ್ತಾ.

ಬಾಯ್ ಶೀಲಾ ಚಡ್ತಾವ್ ಜಾವ್ನ್ ಕಾನಡಿ ಭಾಸೆಂತ್ ಬರಯ್ತಾ ತರ್‌ಯೀ, ತಿಣೆಂ ಬರಯಿಲ್ಲ್ಯೊ ಥೊಡ್ಯೊ ಕೊಂಕ್ಣಿ ಕವಿತಾ ಜಾಯ್ತೊ ತೇಂಪ್ ಯಾದಿಚ್ಯಾ ಕೊನ್ಶಾರ್ ಖಂಚುನ್ ಉರ್ಚ್ಯೊ ತಸಲ್ಯೊ ಮ್ಹಣುನ್ ಯೆದೊಳ್‌ಚ್ ಹಿಣೆಂ ರುಜು ಕೆಲಾಂ, ಪ್ರಸ್ತುತ್ ಆಪ್ಲ್ಯಾ ಕುಟ್ಮಾಸವೆಂ ಮೈಸೂರಾಂತ್ ತಿಚಿ ವಸ್ತಿ ತರ್‌ಯೀ, ಸಮಾಜೆಚೆರ್ ಅಪುರ್ಭಾಯೆಚಿ ನದರ್, ತಶೆಂಚ್ ಕೊಂಕ್ಣೆಂತ್ ಸ್ತ್ರೀ ಸಂವೇದನ್ ಸಾಹಿತ್ಯಾಂತ್ ಅಪ್ರೂಪಾಯೆನ್ ಝಳ್ಕುಂಚ್ಯಾ ಬರವ್ಪಿಣಿಂ ಮಧೆಂ ಹಿಕಾ ಹಾಂವ್ ತರ್‌ಯೀ ಮಾಂದುನ್ ಘೆತಾಂ.

ಚಿತ್ತಾರಾಂತುಲಿ ಚೆಲ್ಲಿ.

ಸಾಂಜ್ ...

ಕಾಳೋಕ್ ಮಾಂಡ್ಚೆ ಫುಡೇ

ಚಾಂದಣೆ ಫುಲ್ತನಾ..

ಹಾಂವ ದೆಂವ್ತಾ

ಚಿತ್ತರಾಂತುಲೆನ್ ಹೇಂ ಭೂಂಯ್ಚೇರಿ.

ಕೇಸ್ ಫಾಪ್ಪುಣ್ ಘೇತ್ತನಾ

ಆಕಾಶಾಂತುಲೆ ನಕ್ಷತ್ರಾ ರಾಶಿ

ಹಾಂಗಾ ಉಜ್ವಾಡು ಶಿಂಪ್ತಾ

ಮೆಗೆಲೆ ಆಂಗಾಚೆ ಸುಗಂಧ

ಪರಮಳ್ತನಾ ..

ಹಝಾರ್ ಚಾಂಪೆ ಫುಲ್ಲಂ

ಎಕ್ಕ ವಳೆ ಫುಲ್ತಾತಿಂ.

ದೋಳೆ ಎಡ್ಕೇಂತುಲೇನ

ಕೆದನಾಚ್ ಕಿ ಸೊಪ್ನಾ ಚೊ

ಏಕು ಕುಡ್ಕೊ ತುಂಟೂನ್ ಪಡ್ತಾ.

ಮೋಹಕ ಥಂಡ ವ್ಹಾರೆಂತು

ಖಂಚೊ ಕೀ ರಾಗಾಕ

ಖಂಚೆ ಕೀ ತಾಳಾಕ ಮೆಗೆಲೆ

ಪಾವುಲ . . ರಾತ್ ಸಗ್ಳೇ

ಭೊಂವ್ತಾತಿ.

ಆನಿ ಇತ್ತೇ.. ಉಜ್ವಾಡು ಜಾಲ್ಲೊ... ಮಣ್ತನಾ..

ಹಾಂವ ಕೇಸ್ ಓಳೊವ್ನ್

ಫಾಂತಿ ವಿಂಡೂನ್ ಘೆತ್ತಾ.

ಚಾಂಪೆ ಫುಲ್ಲಂ ಮೆಗೆಲೆ

ಮಾಕ್ಷೀ ಯೆತ್ತಾತಿಂ

ಆಂಗಾಚೊ ಪರಮಳು

ಭಾಯ್ರ್ ಯೇನಾತಶಿ

ವರ್ಲ ಪಾಂಗೂರ್ನ್ ಘೆತ್ತಾ.

ನವೀನ್ ಏಕ ಸೊಪ್ನಾ ಕುಡ್ಕೊ

ಯೇವುನ ದೋಳೆ ಎಡ್ಕೆಂತು ಬಸ್ತಾ.

ತಶೀ ಚಮಕತಾ ...ಪರತ್

ಚಿತ್ರಾಂತುಲಿ ಚೆಲ್ಲಿ ಜಾತ್ತಾ.

ತೂ ಆಯ್ಲೊ. ಕೆದನಾಚೆ ವ್ಹರಿ.

ಚಿತ್ತಾರಾ ವಯಿಲೆ ಧೂಳ ಪುಶಿತಾ.

ಏಕ್ ಘಡಿ ಪಳವುನು..

ಮುಖಾರಿ ವತ್ತಾ ಆನ್ಯೇಕ

ಚಿತ್ತಾರಾ ಲಾಗ್ಗಿ.

ಚಿತ್ತರಾಂತುಲಿ ಚೆಲ್ಲಿಯೇಲೊ

ತೊಂಡಾ ವೈಲೊ ಹಾಸು

ದಿಸನಾವೆ ತುಕ್ಕಾ?

ಆಣಿ.. ಬಾವುನ್ ನೆಲಾರಿ

ಪಳ್ಳೆಲೆ ತೇಂ ದೋನಿ

ಚಾಂಪೆ ಚೆ ಫುಲ್ಲಂ..?

[* ಚಿತ್ತುರ್ = ಪಿಂತುರ್, * ಚೆಲ್ಲಿ = ಚೆಡುಂ]

-  ಶೀಲಾ ಭಂಡಾರ್‌ಕರ್ [ಅಗೋಸ್ತ್ 2017]