ಏಕ್ ನವೊ ಸಂಸಾರ್
ಎಕಾ ತರ್ನಾಟ್ಯಾಚಿ ಕಾಣಿ ಅಶಿ ಆಸಾ; ಗರೀಬ್ ಕುಟ್ಮಾಂತ್ ಜಲ್ಮುನ್, ಜೊಕ್ತೆಂ ಶಿಕಪ್ ಸಂಪವ್ನ್ ದೀಸ್ಪಡ್ತೊ ಗ್ರಾಸ್ ಜೊಡುನ್, ಅಪ್ಲೆಂಚ್ ಕುಟಮ್, ಏಕ್ ಲ್ಹಾನ್ ಘರ್ ಕರುನ್ ಜಿಯೆತಾಸ್ತಾನಾ ತಾಚೆಂ ಗಮನ್ ಥೊಡ್ಯಾ ನಿರ್ಗತಿಕ್ ಪ್ರಾಯೆಸ್ತಾಂಚೆರ್ ಖಂಚ್ಲಿ. ಉತರ್ ಪ್ರಾಯೆಕ್ ಪಾವ್ಲ್ಲ್ಯಾ ಹ್ಯಾ ಪ್ರಾಯೆಸ್ತಾಂಕ್ ಸಾಂಡುನ್ ತಾಂಚಿಂ ಭುರ್ಗಿಂ ಪರ್ಗಾಂವಾಂತ್ ಜಿಯೆತಾಲಿಂ ಪುಣ್ ತಾಂಕಾಂ ಜಲ್ಮ್, ಶಿಕಪ್ ದಿವುನ್, ವ್ಹಡ್ ಕೆಲ್ಲ್ಯಾ ಆವಯ್ ಬಾಪಾಯ್ಕ್ ಕಸ್ಲೊಚ್ ಆಸ್ರೊ ನಾತ್ಲ್ಲೊ. ಅಸಲ್ಯಾ ನಿರ್ಗತಿಕಾಂಚೆರ್ ಪಿಡೆನ್ ಧಾಡ್ ಘಾಲ್ತಾನಾ ತಿಂ ಪುರ್ತಿಂ ಕಂಗಾಲ್ ಜಾಲಿಂ ಆನಿ ಅಸಲ್ಯಾ ಕಂಗಾಲ್ ಪ್ರಾಯೆಸ್ತಾಂಕ್ ಆಪ್ಲ್ಯಾ ಘರಾ ಹಾಡುನ್ ತಾಂಚಿ ಜತನ್ ಕರ್ಚೆಂ ಕಾಮ್ ಹ್ಯಾ ತರ್ನಾಟ್ಯಾನ್ ಕೆಲೆಂ. ಅಶೆಂ ಥೊಡಿಂ ಆಸ್ಲಿಂ ಪ್ರಾಯೆಸ್ತಾಂ ಚಡುನ್ ಗೆಲಿಂ. ಜಾತ್, ಧರ್ಮ್ ಪಳೆನಾಸ್ತಾನಾ ಹ್ಯಾ ತರ್ನಾಟ್ಯಾನ್ ಅಸಲ್ಯಾ ಪ್ರಾಯೆಸ್ತಾಂಕ್, ಪಿಡೆಸ್ತಾಂಕ್ ತಶೆಂಚ್ ನಿರ್ಗತಿಕಾಂಕ್ ಆಪ್ಲ್ಯಾ ಘರಾ ಹಾಡುನ್ ತಾಂಚಿ ಚಾಕ್ರಿ ಕರುಂಕ್ ಸುರು ಕೆಲಿ. ಅಶೆಂ ಹ್ಯಾ ಪ್ರಾಯೆಸ್ತ್/ನಿರ್ಗತಿಕಾಂಚೊ ಸಂಕೊ ಚಡುನ್ ಗೆಲ್ಲೆಪರಿಂಚ್ ಹೊ ತರ್ನಾಟೊ ಅಪ್ಲೆಂ ಘರ್ ಹ್ಯಾ ನಿರ್ಗತಿಕಾಂಕ್ ರಾವವ್ನ್, ಎಕಾ ಭಾಡ್ಯಾಚ್ಯಾ ಘರಾಂತ್ ವಸ್ತಿ ಕರುಂಕ್ ಲಾಗ್ಲೊ ಆನಿ ಕಶ್ಟ್-ಆಕಾಂತ್ ಕಿತ್ಲೆಯ್ ಆಯ್ಲ್ಯಾರೀ, ಧಯ್ರಾನ್ ಫುಡ್ ಕರುನ್ ಹ್ಯಾ ತರ್ನಾಟ್ಯಾನ್ ಅಪ್ಲ್ಯಾ ಕುಟ್ಮಾಸವೆಂ ಹ್ಯಾ ನಿರ್ಗತಿಕಾಂಚ್ಯಾ ಸೆವೆ/ಚಾಕ್ರೆಂತ್ ಅಪ್ಲೆಂ ಜಿವಿತ್ ಸಮರ್ಪುಂಕ್ ಮೇಟ್ ಕಾಡ್ಲೆಂ.
ಹಿ ಕಸಲಿಚ್ ಕಾಲ್ಪನಿಕ್ ಕಾಣಿ ನ್ಹಯ್, ಏಕ್ ಜಿಣಿ. ಜಿ ಹಾಂವೆಂ ಸ್ವತಾಂ ಪಳಯಿಲ್ಲಿ. ಆನಿ ಹ್ಯಾ ನಿರ್ಗತಿಕಾಂಚ್ಯಾ ಆಶ್ರ್ಯಾಚೆಂ ನಾಂವ್ ’ಪಶ್ಚಿಮ್ ರಿಹ್ಯಾಬ್ ಸೆಂಟರ್’. ಮಂಗ್ಳುರ್ ಥಾವ್ನ್ ಸಾಟ್-ಆಟ್ ಮಯ್ಲಾಂ ಪಯ್ಸ್ ಆಸ್ಚ್ಯಾ ಉಲ್ಲಾಳ್-ಸೋಮೇಶ್ವರಾಂತ್ ಆಸ್ಚ್ಯಾ ಹ್ಯಾ ರಿಹ್ಯಾಬ್ ಸೆಂಟರಾಂತ್ ಆತಾಂ ಶೆಂಭೊರಾಂ ವಯ್ರ್ ಪ್ರಾಯೆಸ್ತಾಂ/ಪಿಡೆಸ್ತಾಂ ವಸ್ತಿ ಕರುನ್ ಆಸಾತ್ ಆನಿ ತಾಂಚಿ ಚಾಕ್ರಿ ಕರುನ್ ಆಸಾ ಹೊ ತರ್ನಾಟೊ ಆನಿ ತಾಚೆಂ ಕುಟಮ್. ಆನಿ ಹ್ಯಾ ಶೆಂಭೊರ್ ಪ್ರಾಯೆಸ್ತಾಂ ಪಯ್ಕಿಂತ್ ಎಕ್ಲಿ ಜಾವ್ನಾಸಾ ಕೊಂಕಣಿಚಿ ಧೀರ್ ಸ್ತ್ರೀ, ಕೊಂಕಣಿ ವಾವ್ರ್ ಅಪ್ಲೆಂ ಹಕ್ಕ್ ಮ್ಹಳ್ಳೆ ಚಿಂತ್ಪಾನ್ ಪರ್ಗಾಂವ್ ಜಾಂವ್ ಗಾಂವ್, ವೋತ್ ಜಾಂವ್ ಸಾವ್ಳಿ, ಪಾವ್ಸ್ ಜಾಂವ್ ಗೀಮ್ ಎಕಾಚಿಯ್ ಪರ್ವಾ ಕರಿನಾಸ್ತಾನಾ ವಾವ್ರ್ ಕೆಲ್ಲ್ಯಾ ಗ್ಲೇಡಿಸ್ ರೇಗೊನ್ ಸದ್ದ್ಯಾಕ್ ವಸ್ತಿ ಕರ್ಚೆಂ ಘರ್ ಹೆಂ ’ರಿಹ್ಯಾಬ್ ಸೆಂಟರ್’ ಜಾವ್ನಾಸಾ.
ಪಾಟ್ಲ್ಯಾ ಪಾಂಚ್-ಸ ವರ್ಸಾಂ ಥಾವ್ನ್ ತಿಕಾ ಸರಾಗ್ ರಿತಿನ್ ಮೆಳುನ್ ಆಯ್ಲಾಂ, ಆನಿ ಸಭಾರ್ ಪಾವ್ಟಿಂ ತಿಚೆಲಾಗಿಂ ಹಾಂವೆಂ ವಿಚಾರ್ಲ್ಲೆಂ ಆಸಾ; "ಗ್ಲೇಡಿಸ್ ಬಾಯ್, ತುಕಾ ಕಸ್ಲೀಯ್ ದುಡ್ವಾಚಿ ಗರ್ಜ್ ಪುಣಿ ಆಸಾ ತರ್ ಮ್ಹೆಜೆಲಾಗಿಂ ಸಾಂಗುಂಕ್ ದಾಕ್ಶೆನಾಕಾ". ಅಶೆಂ ಮ್ಹಣುನ್ ಹಾಂವ್ ಕಾಂಯ್ ದುಡ್ವಾಚೆಂ ಝಡ್ ಲಾವ್ನ್ ಜಿಯೆಂವ್ಚೊ ನ್ಹಯ್, ಪುಣ್ ಕಾಂಯ್ ಬರ್ಯಾಮನಾಚೆ ಥೊಡೆ ಮನಿಸ್ ಮ್ಹಜ್ಯಾ ಸಳಾವಳೆರ್ ಆಸಾತ್, ಕೊಂಕಣಿ ಮೊಗಿ, ಕೊಂಕಣಿ ಪಾಟಿಂಬೊ ದಿತಲೆ, ಆನಿ ಅಸಲ್ಯಾ ಬರ್ಯಾ ಇರಾದ್ಯಾಕ್ ಖಂಡಿತ್ ಫುಲ್ ಯಾ ಫುಲಾಚಿ ಪಾಕ್ಳಿ ತರ್ಯೀ ತೆ ದಿತಲೆ ಮ್ಹಳ್ಳ್ಯಾ ಭರ್ವಶ್ಯಾನ್ ಹಾಂವೆಂ ಹೆಂ ವಿಚಾರ್ಲೆಂ. ಜಶೆಂ ಪಯ್ಣಾರಿ.ಕೊಮ್ ಸುರ್ವಾತ್ ಕರ್ತಾನಾ ಜೆವ್ಣಾಕ್-ವ್ಹಖ್ತಾಕ್ ಸಯ್ತ್ ಗತ್ ನಾಸ್ತಾನಾ ವ್ಹಳ್ವಳ್ಚ್ಯಾ ರೊನಾಲ್ಡ್ ಪಿರೇರಾ ಆಂಜೆಲೋರಾಚ್ಯಾ ಮಜತೆಕ್ ಕಶೆಂ ಸಭಾರ್ ಕೊಂಕಣಿ ಲೊಕಾಂನಿ ಮಜತ್ ಕೆಲ್ಲೆಪರಿಂ. ಪುಣ್ ಕೆದ್ನಾಂಯ್ ಸ್ವಾಭಿಮಾನಿ ಜಾವ್ನಾಸ್ಚ್ಯಾ ಗ್ಲೇಡಿಸ್ ಬಾಯೆಚಿ ಜವಾಬ್ ಇತ್ಲಿಚ್; "ನಾಕಾಬಾ, ಮ್ಹಾಕಾ ದುಡ್ವಾಚಿ ಕಸಲಿಚ್ ಗರ್ಜ್ ನಾ, ಮ್ಹಜಿ ಜತನೆಚಿ ವಿಲೇವಾರಿ ಸರ್ವ್ ಎಕ್ಲೊ ಮಾನ್ ಕೊಂಕಣಿ ಮನಿಸ್ ಕರುನ್ ಆಸಾ".
ಥೊಡ್ಯಾ ಮಯ್ನ್ಯಾದಿಂ ಗ್ಲೇಡಿಸ್ ಬಾಯೆಕ್ ಭೆಟುಂಕ್ ಗೆಲ್ಲೆವೆಳಾರ್ ತಿಕಾ ಉಗ್ಡಾಸಾಚಿ ಸಕತ್ ಉಣಿ ಜಾಲ್ಲೆವಿಶಿಂ ಆಯ್ಕುನ್ ಬೆಜಾರ್ ಪಾವ್ಲೊಂ. ಥೊಡೊ ವೇಳ್ ತಿಚೆಸವೆಂ ಖರ್ಚಿತಾನಾ ಸಭಾರ್ ಮತಿಚ್ಯಾ ಪಿಡೆಚಿಂ ಲ್ಹಾನ್ ಭುರ್ಗಿಂ ಪರತ್ ಪರತ್ ಯೇವ್ನ್ ಹ್ಯಾ ಪಶ್ಚಿಮ್ ರಿಹ್ಯಾಬ್ ಸೆಂಟರಾಚ್ಯಾ ಬ್ರದರಾಕ್ ಖಾಂವ್ಕ್ ದೀ ಮ್ಹಣುನ್ ಧೊಸ್ತಾಲಿಂ ಆನಿ ತೊ ಬಾವ್ಡೊ, ಅಪ್ಲ್ಯಾ ಮೆಜಾಚ್ಯಾ ಡ್ರಾವರಾಂತ್ಲ್ಯೊ ಬಿಸ್ಕಿಟ್ಯೊ ತಾಂಕಾಂ ದಿವುನ್ ಸಮಧಾನ್ ಕರುನ್ ತಾಂಕಾಂ ಧಾಡ್ತಾಲೊ. ಅಶೆಂ ಗ್ಲೇಡಿಸ್ ಬಾಯೆಲಾಗಿಂ ಹಾಂವೆಂ ಪರತ್ ತೆಂಚ್ ಸವಾಲ್ ಕೆಲೆಂ; "ಗ್ಲೇಡಿಸ್ ಬಾಯೆ, ತುಕಾ ಕಿತೆಂಯ್ ಗರ್ಜ್ ಆಸಾಗಿ? ದುಡು ವಾ ಕಿತೆಂಯ್ ಜಾಯ್ ತರ್ ಮ್ಹಾಕಾ ಸಾಂಗುಂಕ್ ದಾಕ್ಶೆನಾಕಾ". ತಿಣೆ ಪರತ್ ತಿಚ್ ಜವಾಬ್ ದಿಲಿ ಅನಿ ಮುಖಾರುನ್ ಸಾಂಗಾಲಾಗ್ಲಿ; "ತುಕಾ ದೀಜಯ್ಚ್ ಮ್ಹಣ್ ಆಸಾ ತರ್ ಮಯ್ನ್ಯಾಕ್ ಕಾಂಯ್ ಶೆಂಭೊರ್ ರುಪಯ್ ದೀ, ತಿತ್ಲೆಚ್ ಮ್ಹಾಕಾ ಪುರೊ". ಹಾಂವ್ಯೀ ಏಕ್ ಘಡಿ ಚಿಂತ್ಚ್ಯಾರ್ ಪಡ್ಲೊಂ, ಆಯ್ಚ್ಯಾ ಕಾಳಾರ್ ಫಕತ್ ಶೆಂಭೊರ್ ರುಪಯ್ ಕೊಣ್ ವಿಚಾರ್ತಾ? ದೆಕುನ್ ಆತುರಾಯೆನ್ ತಿಕಾ ಪಾಟಿಂ ಸವಾಲ್ ಕೆಲೆಂ; "ಫಕತ್ ಶೆಂಭೊರ್ ರುಪಯ್?"
"ವ್ಹಯ್, ತೊ ಬ್ರದರ್ ಪಳೆ, ತ್ಯಾ ಭುರ್ಗ್ಯಾಂಕ್ ಬಿಕ್ಸುಟ್ ದಿತಾ ತಶೆಂ ಹೆ ಶೆಂಭೊರ್ ರುಪಯ್ ಆಸ್ಲ್ಯಾರ್ ಹಾಂವ್ಯೀ ದಿತಿಂ ಕೊಣ್ಣಾ ಮ್ಹಣುನ್ ವಿಚಾರ್ಲೆ".
ಹೆಂ ಜಾವ್ನಾಸಾ ಎಕಾ ಅಸ್ಲಿ ಕಲಾಕಾರಾಚೆಂ ಜಿವಿತ್. ಕೆದ್ನಾಂಯ್ ಹೆರಾಂಕ್ ದಿಂವ್ಚೆಂಚ್ ಹಾಂಚೆಂ ಚಿಂತಪ್, ಸ್ವತಾ ವೊತಾಂತ್ ಕರ್ಪೊನ್/ಲಾಸುನ್ ತರ್ಯೀ ಹೆರಾಂಕ್ ಸಾವ್ಳಿಚ್ ದಿಂವ್ಚೆಂ ಚಿಂತಪ್.
ಪಯ್ಣಾರಿ.ಕೊಮ್ ಆತಾಂ ಪಾಂಚ್ವ್ಯಾ ವರ್ಸುಗೆಚ್ಯಾ ತಯಾರಾಯೆನ್ ಆಸಾ. ಸಾಹಿತ್ಯಾಧ್ವಾರಿಂ ಸಮಾಜ್ಸೆವಾ, ಹೆಂ ಚಿಂತಪ್ ದಾಯ್ಜ್.ಕೊಮ್ ಜಾಂವ್ ವ ಪಯ್ಣಾರಿ.ಕೊಮ್ಚ್ಯಾ ಸುರ್ವಾತೆರ್ಚ್ ಆಸ್ಲೆಂ ಅನಿ ಆತಾಂಯ್ ಲ್ಹಾನ್ ಮಟ್ಟಾರ್ ಆಸಾ. ಏಕ್ ವರಸ್ ಭರ್ತಚ್ ಆಮ್ಚಿ ಪಾಟ್ ಥಾಪಡ್ಚೊ ಹೊರ್ಭೊಸ್ ಮ್ಹಾಕಾ ತರ್ಯೀ ನಾ. ಬಗರ್ ಆಮಿ ಪಾಟ್ಲ್ಯಾ ವರ್ಸಾಂನಿ ಕಿತ್ಲೆಪಾವ್ಟಿಂ ಸಲ್ವಲ್ಯಾಂವ್, ಕಿತ್ಲೆಪಾವ್ಟಿಂ ಪಡ್ಲ್ಯಾಂವ್, ಕಿತ್ಲೆ ಪಾವ್ಟಿಂ ಶಿಕ್ಲ್ಯಾಂವ್ ಆನಿ ಕಿತ್ಲೆಂ ಬರೆಂ ಕಾಮ್ ಕರುಂಕ್ ಸಕ್ತೆಲ್ಯಾಂವ್ ಮ್ಹಳ್ಳ್ಯಾ ಚಿಂತ್ಪಾತೆವ್ಶಿನ್ ಆಸಾ. ಮ್ಹಜಿ ಧಾಂವ್ಣಿ ಹೆರಾಂಸವೆಂ ಕೆದಿಂಚ್ ನ್ಹಯ್, ಮ್ಹಜಿ ಧಾವ್ಣಿ ಮ್ಹಜ್ಯಾಚ್ ’ಕಾಲ್’ಸವೆಂ. ಮ್ಹಜೊ ’ಆಜ್’ ಮ್ಹಜ್ಯಾ ’ಕಾಲ್’ಚ್ಯಾಕೀ ಬರೊ ಜಾಯ್ಜಯ್, ಆನಿ ಮ್ಹಜೆಂ ’ಫಾಲೆಂ’ ಮ್ಹಜ್ಯಾ ’ಆಜ್’ಚ್ಯಾಕೀ ಬರೆಂ ಜಾಯ್ಜಯ್. ಅನಿ ತೆಂ ’ಬರೆಂ’ ಮ್ಹಳ್ಳೆಂ ಮಾಪ್, ಹೆರಾಂ ಕಿತ್ಲೆಶ್ಯಾಂಕ್ ಉಪ್ಕಾರಾಕ್ ಪಡ್ತಾ ತಾಚೆರ್ ಹೊಂದ್ವೊನ್ ಆಸುಂಕ್ ಜಾಯ್ ಶಿವಯ್ ಮ್ಹಜ್ಯಾ ದವ್ಲತ್/ಮಿಂಜಾಸ್ಕೆಕ್ ಭಿಲ್ಕುಲ್ ನ್ಹಯ್ - ಹೆಂ ಮ್ಹಜ್ಯಾ ಕೊಶೆಡ್ದಾಚೆಂ ಸತ್.
ಆತಾಂ ಏಕ್ ನವೊ ಸಂಸಾರ್ ಅಸೊ ಉದೆತಾ: ಮಾ|ಚೇತನ್ ಕಾಪುಚಿನ್ ಏಕ್ ಅಪುರ್ಭಾಯೆಚೊ ಉಲವ್ಪಿ, ವಯ್ಚಾರಿಕ್ ಸಂಪಾದಕ್ ಆನಿ ಮಾಯಾಮೊಗಾಳ್ ಕೊಂಕಣಿ ಬರವ್ಪಿ ಮ್ಹಣುನ್ ಸಭಾರ್ ಜಾಣಾಂತ್ ಪುಣ್ ಮ್ಹಾಕಾ ತೊ ಪಯ್ಲೊ ಏಕ್ ಕಾಣ್ಯೆಗಾರ್ ಜಾವ್ನ್ ವ್ಹಳ್ಕಿಚೊ. ಎಕಾಚ್ ಪ್ರಾಯೆಚೆ ತರ್ಯೀ ಆಮ್ಚಿ ವಳೊಕ್ ಜಾಲ್ಲಿಚ್ ಸಾಹಿತ್ಯಾಧ್ವಾರಿಂ. ಜೆದ್ನಾಂ ತೊ ರೊಮಾಂತ್ ಶಿಕಪ್ ಜೊಡುನ್ ಆಸ್ತಾನಾ ಹಾಂವ್ ಕುವೆಯ್ಟಾಂತ್ ಕಾಮ್ ಕರುನ್ ಆಸ್ಲೊಂ ಆನಿ ದಾಯ್ಜ್.ಕೊಮ್ಚೆಂ ಸಂಪಾದಕ್ಪಣ್ ಚಲವ್ನ್ ಆಸ್ಲೊಂ. ಇತ್ಲೊ ಅಪುರ್ಭಾಯೆಚೊ ಕಾಣಿಯೆಗಾರ್ ತರ್ಯೀ, ಅಜೂನ್ ಹಾಚ್ಯಾ ಮಟ್ವ್ಯಾ ಕಾಣಿಯಾಂಚೊ ಜಮೊ ಕೊಂಕಣೆಂತ್ ಕೊಣೇಂಯ್ ಕಿತ್ಯಾಕ್ ಕಾಡುಂಕ್ ನಾ ಮ್ಹಳ್ಳೆಂ ಚಿಂತಪ್ ಮ್ಹಜ್ಯಾ ಮತಿಂತ್ ಕಾಂಯ್ ತೆಂಪಾಥಾವ್ನ್ ಧೊಸುನ್ ಆಸ್ಲೆಂ. ಆನಿ ತವಳ್ ತವಳ್ ಮುಖಾಮುಖಿ ಮೆಳ್ತಾನಾ ಜಾಂವ್ ಫೊನಾರ್ ಉಲಯ್ತಾನಾ ಜಾಂವ್ ಹಾಂವೆಂ ತಾಕಾ ಹೆಂಚ್ ಸಾಮ್ಗುನ್ ಧೊಸ್ಚೆಂ ಆಸ್ಲೆಂ. ’ಕಾಳೊಕಾಕ್ ದುರ್ಸನಾಕಾ, ಬಗರ್ ವಾತ್ ಪೆಟಯ್’ ಹೆಂ ಉತರ್ ಮ್ಹಾಕಾಚ್ ಸಭಾರ್ ಪಾವ್ಟಿಂ ಕೆಲಾಂ ದೆಕುನ್ ಪರತ್ ತೆಂ ಸವಾಲ್ ಹಾಂವೆಂ ಮ್ಹಾಕಾಚ್ ಕರ್ತಾನಾ ಉದೆಲ್ಲೆಂ ಚಿಂತಪ್ ಆತಾಂ ಹಕೀಗತೆಂತ್ ಬದ್ಲುನ್ ಆಸಾ. ಹಾಚ್ಯಾ ವಿಂಚ್ಣಾರ್ ಪಂಚ್ವೀಸ್ ಮಟ್ವ್ಯಾ ಕಾಣಿಯಾಂಚೊ ಜಮೊ ’ಏಕ್ ನವೊ ಸಂಸಾರ್’ ವೆಗಿಂಚ್ ಪರ್ಗಟ್ಣೆರ್ ಯೆಂವ್ಚ್ಯಾರ್ ಆಸಾ. ಪುಣ್ ಮಾ|ಚೇತನ್ ಕಾಪುಚಿನ್ ಸಯ್ತ್ ಏಕ್ ಕಲಾಕಾರ್. ಸಮಾಜಿಕ್ ಕಾಳ್ಜಿ ಆಸ್ಚೊ ಭೋವ್ ಸಂವೇದನ್ಶೀಲ್ ಯಾಜಕ್. ದೆಕುನ್ ಹ್ಯಾ ಬುಕಾಂಚ್ಯಾ ವಿಕ್ರ್ಯಾಚೊ ಸರ್ವ್ ಖರ್ಚ್ ತೊ ಗ್ಲೇಡಿಸ್ ರೇಗೊನ್ ವಸ್ತಿ ಕರುನ್ ಆಸ್ಚ್ಯಾ ’ಪಶ್ಚಿಮ್ ರಿಹ್ಯಾಬ್’ ಸೆಂಟರಾಕ್ ದಾನ್ ದೀಂವ್ಕ್ ಆಶೆತಾ. ಏಕಾ ಬರವ್ಪ್ಯಾಚ್ಯಾ ಗರ್ಜೆಕ್ ಪಾಂವ್ಚೆಂ ಅನ್ಯೇಕಾ ಬರವ್ಪ್ಯಾಚೆಂ ಕಾಮ್ ಅಶೆಂ ತರ್ಯೀ ಮುಖಾರುನ್ ಆಸಾ. ದೆಕುನ್ ಬರ್ಯಾ ಮನಾಚ್ಯಾ ಕೊಂಕಣಿ ಮೋಗಿಂಕ್ ಏಕ್ ಖಾಲ್ತಿ ವಿನತಿ; "ತುಮಿ ಹ್ಯಾ ಬುಕಾಚ್ಯಾ ಪರ್ಗಟ್ಣೆಕ್ ವಾ ಬುಕಾಂಕ್ ಮೊಲಾಕ್ ಘೆವ್ನ್ ವಾ ಪ್ರತಿಯಾಂಚೆರ್ ಪ್ರಾಯೋಜಕ್ಪಣ್ ಕರ್ಶ್ಯಾತ್ ತರ್, ಹೆಂ ವೊಜೆಂ ಮಾತ್ಶೆಂ ಹಳು ಜಾಯ್ತ್ ಕೊಣ್ಣಾ ಮ್ಹಳ್ಳೆಂ ಚಿಂತಪ್ ಆಮ್ಚೆಂ"
ಏಕ್ ನವೊ ಸಂಸಾರ್ ರುತಾಂ ಕರ್ಚೆ ದಿಶೆನ್ ಹೆಂ ಏಕ್ ಲ್ಹಾನ್ ಮೇಟ್, ತುಮ್ಚೊ ಸಹಕಾರ್ ಆಶೆತಾಂವ್.
ದೇವ್ ತುಮ್ಚೆಂ ಬರೆಂಚ್ ಕರುಂ
- ವಲ್ಲಿ ಕ್ವಾಡ್ರಸ್ (ಒಕ್ಟೋಬರ್, 2019)
