Konknni Nirontori - Poinnari: Bhorouxeachi Survat
Don veveglloya kallar hamv sompadoki-i boromvcheak boslam, ek: 2004 isvent jednam daiz.Kom' ontorzallichi survat kortastana, ani don: poinnari.Kom' ontorzallikhatir. Hea don kallant zaitem bodl'lam, horyeka ghoddye bodlon yemvchea heachch somsarant jieun astana, bodlaunn mat ek khaim' urchetosolem (The only constant in this world is the change). Chintap zoxem jinnye onbhogachim paulam, jinnyelisamvachim vojim khandar douron fuddem choltastana konn bodlona? punn ek songot bodlonk natl'li zaunasa; tednam-i hamv poinnarichch ani azyi hamv hangasor poinnari. Hem hamv tatvik orthan ucharina, zoxem tatvik orthan, hea somsar mholl'lle poinnantolo horyekolo poinnarich. Hamv khore orthan ucharotam, daiz.Kom' kuveyttant kam' korun astana survat kel'lem ek lhan misamv, toxench poinnari.Kom' mumbeant survat kel'lem onyek misamv - fokt't konknni sahitea pasot.
Tatvik niallant monxa jinnye audechi ucharonni korchi tor, sorv noxvor, kitench sasnnachem hangasor na, aicho monis faleam asa mhonnun na. Charant tin vantto aschem udak zor bakichea eka vantteachea bhumycher vhallot tor, ghoddyen hi bhum-i sopai zait, hantum aschim mollbacher khand thenkchim bhandpam, zoitache bongle sorv vhallon vochunk asat. Kaim bhum-i kampnni zali tor, ghoddyen hi bhum-i, ek kaim eka moyadanatoxem dhullik mellachant kaim dubhavo na. Toryi monis, hea bhumaicher vevegallea nibamni gittam voddun, gamv, pranty, raxttr mhonnun volaita, ani aplea supt obalesan kitem kitem mhonnun kolaita. Itlench nhoi, he gitt dis-rat parot korunk hozaramni sojer, ani hye gittampasot rogata-vhall. Horaय़ekak zai namv ani ani itle khell khellon komayil'lem namv, zomyil'li ast-bodik, punzayil'lem dhon-diravem konnyi vhorun gel'lim asat?
Ssum. Amchea motik titlo besor ghalunk amkam naka, somsari rattaullemodhem amchi chintpasokot sodam-i chirddota, ami, amchem kam', amchem kuttam', amchim soirim, amche achar-vichar eka vanttean tor, disanodis vhaddon yemvchim molam, sonkirnn zatechch yemvchim monxa molam, ani hea sonkironn zaun yemvchea sondhrobhar, konnak vell asa her songtevixim chintunk va niallunk?. Punn horyekle hechchporim chinta mhonnun na, chintizai mhonnun na, dekun sobhar konknni vauraddi apaplea xeathiecho, apaplea chintpacho, apaplea xevottacho vaur korun asat. Ani hea sobhar zonnanchea misamvamodhem amchemyi ek lhan misamv; progtipor chintpachem sahity rochunk toxench vaur korunk.
Bodlon yemvchea kallar, bodlon yemvchea sotak, mouleank porot porot zagomvchi vhodd zovabhdarichch eka pramannik sahitichi. Ani hem ’hoveasi’ bhilkul nhoi, hi ek zovabhdari, ek misamv, ek poinn, ek ud'dex, ek dixttavo. Ani oxem pramannik ritin, bodlchea sotank, mouleank zagounko vetastam, kaim thoddeank matxem duHkhchem sohoz, punn duHkhomvchench zagvonn nhoi. Mumbeant vosti kortele va tanche purvoz choddtavo zaun poinnarichch. Disopddtea grasakhatir mumbeant yeun vosti korun asat, punn amchim mullam-pallam konknnechim, ani amchea tonddar ami koslim mukhettim nhesleari amcheam xiram xiramni vhallchem rogot konknnechem, ani amche kallzant ascho spirit konknnecho. Oxem astana, ami sorv ek, eka xevottak ami pavonk asa, ani to xevott; konknni sahiteachi, konknni bhasechi ugrgoti. Ani hi udrgoti fokt't sahitimni matr korunk zai tosli nhoi, horyeka konknni mogimni hea udrogotent meter zamvchi goroz asa.
Aichea kallar printt madhyom' koxtton asa, vachpeanche somsse, vellacho abhavo hea somsseank lachar kortastam, progtechea paulamni uddkanna marchea ’tantrik’ soktecho proyog korun, ontorzallimukhantr somsarachea khonchyai konxear aschea konknni mogik, konknni sahitachi upolbdhi korun dimvchochch amcho irado. ’konknni uloi, konknni uroi, konknni amchi auy’ - hinch totvam amchim. Dekun ami konn? amchim pallam-mullam khoinchim? mholl'llem promuk nhoi bogar ’amcho xevott koslo? ani kitlo pramannik’ mholl'llem promuk. Konknnechem boremponn zatator, zaitim songhttonam zamvdit, zaitim potram-ontorzalli udemvdit, horyek misamvam ekek vati zaun pett'tit tor, konknni somajecho ujvadd choddtolo, ani tench amkam zai - zoxench pettomvchea diveant ghorak ujvadd haddyeta techch porim ghor hulpauyeta. Amcho xevott ujvadd fankomvcho tem khonddit, fuddlem vell-kall saks ditlo.
Mumbeant amcheaki poilem konknni asli, amcheaki uprant konknni asteli. Ami hea thoddea audent, faleanchea konknnek thenko dimvchetslo khoncho vaur ani koso to koryeta? hea chintpa bhomvtonni amcho attovo astolo. Ximpddolelea zaitea konknni vauraddeanchea vaurak ek vedi matr nhoi, bogar zokto pattimboi dimvcho amcho irado. Ami ekeklean eksure zaun koxttant poddchea bodlak, songhttit zaun ekameka adhar diveam, somajent konknni divo kaim thoddeo choddtik ghoddeo pettondi. Itlench amchem pramannik misamv. Sahiti zaun amchi zovabhdari fokt't hat bhandhun somajek budi sangcheo matr mholl'llem annvem/sonkirnn chintap chintchepras, ami sahiti toxench somajeche vantte soit mhonnun somzun, vaur koream. Ani progtipor chintpachi survat poili apnnathaun, aplea chintnamni, aplea borpamni vhallon ailim tor, somajik progti opxichch zateli mholl'lli patyenni mhoji.
Kitem-i zamv konknnechem fokt't borem zamv,
Tumchethoim vixvasi, konknni seuk/chakor
- Valley Quadros (December, 2015)
