ಪಾವಳೀ

ಹಿ ಕಾಣಿ ಕಾಂಯ್ ನವಿಚ್ ನ್ಹಯ್, ಕಾಂಯ್ ತೆಂಪಾನ್ ಆಮಿ ಪಳೆವ್ನ್ ಆಯಿಲ್ಲಿ; ಬದ್ಲುನ್ ಯೆಂವ್ಚ್ಯಾ ಚಿಂತ್ಪಾಚಿ. ಹಾಂಗಾಸರ್ ಮೋಗ್ ಆನಿ ಮಯ್ಪಾಸ್ ಕೊಣಾಕ್ ಸರ್ವಸ್ವ್ ತರ್ ಆನಿ ಕೊಣಾಕ್ ಫಕತ್ ಬೇಕಾರ್ ಸಬ್ಧ್ ಮಾತ್ರ್. ದೆಕುನ್ ಬಜಾರಿ ಚಿಂತ್ಪಾಚ್ಯಾ ಸಂಸಾರಾಂತ್ ಹ್ಯಾ ಸಬ್ಧಾಂಕ್ ಮೋಲ್ ನಾ, ಖಂಚ್ಯಾಯ್ ಸಬ್ಧಾಂಕ್ ಮೋಲ್ ನಾ ಫಕತ್ತ್ ದುಡು ಆನಿ ಪಾವಲಿ.

ಕಾರ್‌ವಾರ್‌ಚೊ ನಾಮ್ಣೆಚೊ ಪತ್ರ್‌ಕರ್ತ್, ಬರವ್ಪಿ ಬಾಬ್ ಸಂಧೇಶ್ ಭಾಂದೇಕರ್ ಏಕ್ ಉರ್ಭೆವಂತ್ ಕವಿ ಸಯ್ತ್. ಎದೊಳ್‌ಚ್ ಸಭಾರ್ ಕವಿತಾ ಸ್ಪರ್ಧ್ಯಾಂನಿ ಹಾಣೆಂ ಇನಾಮಾಂ ಜಿಕ್ಲ್ಯಾತ್ ತಶೆಂಚ್ ಕವಿಗೋಶ್ಟಿಂನಿ ಸಯ್ತ್ ಹಾಣೆಂ ವಾಂಟೊ ಘೆತ್ಲಾ.

ಪಾವಳೀ

ತುಗೆಲ್ ಅಂಗಾಣಾತ್ ಪಡತಾಲೀ ಮ್ಹಗೆಲ್ ಘರಾ ಪಾವಳೀ

ಆತಾಂ ಥಂಯೀತ್ ಪಡತಾ ತ್ಯಾ ಪರಜತಾ ಸಾವಳೀ

ಆಮೀ ದೋಗಾಂ ಬಸತಾಲಿಂ ಸಕ್ ಸಕಾಳೀ

ಘೆವುಕ್ ಸುರ್ಯಾಲೀ ಕಿರಣಾಂ ಕವಳೀ ಕವಳೀ

ಲ್ಹಾನಪಣಾಂತ್ ಆಮೀ ಥಂಯೀತ್ ಖೆಳ್ಳೀಂ

ಎಕಮೆಕಾಚ್ಯಾ ಸುಖ ದುಃಖಾಂತ್ ಮೆಳ್ಳೀಂ

ಕಿತಲೀಂ ವರ್ಸಾಂ ತರೀ ಆಮೀ

ಥಂಯೀತ್ ಪ್ರೇಮ ಸ್ವಪ್ನಾಂ ಪಳಯಲೀಂ

ಪುಣ್ ತುಗೆಲ್ ಬಾಪಾಯಕ್ ಜಾಯ್ ಆಶೀಲೀಂ

ಮೊಟೀ=ಮೊಟೀ ನೊಟಾಂ ಕವಳೀ

ಕಿತಲೆ ವರ್ಸಾಂ ನಂತರ್ ಆಮೀ ಕಾಳ್

ಪರತ್ ಏಕ್ ಪಟೀ ಮೆಳ್ಳೀಂ

ತೂಂ ತುಗೆಲ್ಯಾ ಧಾವ್ ಬರಾ

ದೊನೀ ಹಾತಾಂತ ಘೆವನ್ ಜುವಳೀ

ಆತಾಂ ತರ್ ಸಗಳೆತ್ ಸರಲೇತ

ಆತಾಂ ಫಕತ್ ವ್ಹಾವಯಾತಾತ್

ಮ್ಹಗೆಲೆ ದೊಳ್ಯಾಂತಲ್ಯಾನ್ ಪಾವಳೀ

* ಪಾವಳೀ = ಪಾವ್ಳೊ

- ಸಂದೇಶ್ ಬಾಂದೇಕರ್ [ಮಾರ್ಚ್ 2018]

ಸಂಧೇಶ್ ಶ್ರೀಕಾಂತ್ ಭಾಂದೇಕರ್: ಗೊಯಾಂ / ಕಾರ್‌ವಾರ್‌ಚೊ ಉದೆವ್ನ್ ಯೆಂವಚೊ ಕವಿ. ಕಾಣ್‌ಯೊ, ನಾಟಕ್, ಲೇಕನಾಂ ಬರವಪಿ. ಎದೊಳ್‌ಚ್ ಸಭಾರ್ ಕವಿತಾ ಸ್ಪರ್ಧ್ಯಾಂನಿ ಇನಾಮಾಂ ಹಾಣೆಂ ಅಪಣಾಯ್ಲ್ಯಾಂತ್ ತಶೆಂಚ್ ಕವಿಗೋಶ್ಟಿಂನಿ ವಾಂಟೊ ಘೆತ್ಲಾ.