ಮಯ್ನೆ ವೈರಿ ಮಯ್ನೆ

ಬದ್ಲೊನ್ ಯೆಂವ್ಚ್ಯಾ ಕಾಳಾಚೆರ್ ಆರ್ಸೊ ಧರ್ಚಿಂ ಕವಿತಾ ಸಮ್ಜುಂಕ್ ಕಾಂಯ್ ಅರಿಸ್ಟಾಟಲಾಕ್, ಪ್ಲೇಟೊಕ್, ಕೀಟ್ಸ್, ವರ್ಡ್ಸ್‌ವರ್ತ್, ಎಲಿಯೆಟಾಕ್ ವಾಚುಂಕ್ ಜಾಯ್‌ಚ್ಚ್ ಮ್ಹಣುನ್ ನಾ. ದೊಳೆ ಉಘಡ್ಲ್ಯಾರ್ ಮಾತ್ ಪುರೊ.

ತೆಂಪಾಧಿಂ ಗುಡ್ಸುಲಾಂನಿ ತರ್‌ಯೀ ಚಿಮ್ಣೆ ದಿವ್ಯಾಚ್ಯಾ ಉಜ್ಯಾಂತ್, ಮಾತಿಯೆಚ್ಯಾ ರಾಂದ್ಣೆಂನಿ ಶಿಜ್‌ಲ್ಲ್ಯಾ ನೀಸ್-ಪೇಜೆಂತ್ ಭುರ್ಗ್ಯಾಂಕ್ ವ್ಹಡ್ ಕರುನ್ ದಿಲ್ಲ್ಯಾಂಚಿಂ ಭುರ್ಗಿಂ ಆಜ್, ಬಂಗ್ಲೆ ರಾವ್ಳೆರಾಂ ಉಭಿಂ ಕರುಂಕ್ ಸಕ್ಲ್ಯಾಂತ್ ಪುಣ್ ಮನ್ಶಾಂ ಮೊಲಾಂಕ್ ಮಾತ್ ಮೋಲ್ ನಾ ದೆಕುನ್ ಅಪ್ಲ್ಯಾ ಪ್ರಾಯೆಸ್ತ್ ಆವಯ್-ಬಾಪಾಯ್ಕ್ ಆಶ್ರ್ಯಾಕ್ ಧಾಡ್ಲಾಂ, ಆನಿ ಅಸಲ್ಯಾ ಆಶ್ರ್‍ಯಾಂತ್ ದೀಸ್ ಕಾಡ್ತೆಲ್ಯಾ ಎಕಾ ಪ್ರಾಯೆಸ್ತ್ ಆವಯ್ಚೊ ಉಲೊಚ್ಚ್ ಹಿ ಕವಿತಾ.

ಮಯ್ನೆ ವೈರಿ ಮಯ್ನೆ

ವರುಷ ಸರೂನ ಗೆಲೆ

ವೃದ್ದಾಶ್ರಮಾಚೆ ಪಾಯವಾಟೇರಿ

ಪಾಟಿ ಪಳಯ್ತಾ.. ತುಗೆಲೆ

ಸಗ್ಳೆ ನ ಪಾವುಸ ಪಳ್ಳೆ ರೀ..

ಮನ್ ಮೆಗೆಲೆ ಸುಕುನ್ ಗೆಲಾಂ

ಏಕ ಏಕವಳೆ ಮಾತ್ರ್ ತುಗೆಲೆ

ಮನಿಯಾರ್ಡರ್ ಆಯ್ಲಾ

ದುಡು ಗರ್ಜ್ ನಾ ಮ್ಹಾಕ್ಕಾ

ತುಂ ಯೆವುನ್ ವಚ್

ಚೆರ್ಡಾ ಮ್ಹಾಕ್ಕಾ ತುಗೆಲೆ

ಘರಾ ಘೆವುನ್ ವಚ್

ಹೊಡು ಮನಿಸ್

ಜಾಲ್ಲಾ ತುಂ ಮ್ಹಣೂನ್

ಆಯ್ಕತಾನಾ ಭರ್ತಾ

ಮನ್.. ಸಂತೊಸಾನ

ದುರ್ಬಳೆ ಘರಾಂತು

ಜನ್ಮು ತುಗೆಲೊ ಜಾಲ್ಲೊ

ತುಗೆಲೆ ದುದ್ದಾ ಖಾತೀರ್

ಆಮ್ಮಿ ಉಪಾಸ್ ಕಾಳ್ಳೊ

ತಾನ್ನಿ ಹಾನ್ನಿ ದಿಲ್ಲಲೆ

ನ್ಹೆಸುನ್ ದೀಸ್ ಕಾಳ್ಳೆ

ರೀಣ ಕೋರ್ನು ತುಕ್ಕಾ

ಇಸ್ಕೊಲಾ ಭರ್ತಿ ಕರಯಿಲೆ

ಕೊಯ್ರ್ ಪುಸಪ ಆಂವ್ಗೆಲೆ

ಉಂಬ್ಳಪ್ ಸಕ್ಕಡಯೀ ಕರ್ತಾ

ರುಚಿ ರುಚಿ ರಾಂದಪ ಕೊರ್ನು

ತುಕ್ಕಾ ಹಾಂವ ವಾಡ್ತಾ.

ದೊಳೆ ಭರುನ್ ಖುಷಿ ಪಾವ್ತಾ

ಬಾತ್ರಾಲೆ ಖೇಳ ಪಳೋನ

ಅಜ್ಜಿ ಹಾಂವ ಮ್ಹಣುನ್

ತಾಂಕಾಂ ಕೆದಾಳಾಯಿ ಕಳಶಿನಾ

ಘರಾ ಕಾಮಾ ಚೆಡು ಮ್ಹಣೂನ್

ಅಪವ್ನ್ ವರ್ ಬಾಳಾ

ಯೇವ್ನ್ ಮ್ಹಾಕ್ಕಾ ಆಪವ್ನು

ವ್ಹರ್ ತುಮ್ಗೆಲೆ ಘರಾ

ಥಕೊನ್ ಗೆಲಿ ಹಾಂವ

ಚೋವ್ನ್ ತುಗೆಲಿ ವಾಟ್

ತುಗೆಲೆ ವಿನಾ ವಾಂಚುಂಕ

ಹಾಂವ್ ಶಕ್ಯ ನಾ ಚೆಡ್ಯಾ

ಆವ್ಸು ಹಾಂವ್ ತುಗೆಲಿ

ತುಕ್ಕಾ ವಿಸರುಂ ಕಶ್ಶಿ?

ಪೂತು ತುಂ ಆಸ್ತನಾ

ಅನಾಥವೇ ಹಾಂವ್ ಅಶ್ಶಿ?

ವೆಗ್ಗಿ ಸರ್ ಯೇವ್ನು ಅಮ್ಮಾ

ಮ್ಹಣೂನು ಆಪಯಿ

ಆಪವ್ನ್ ಮ್ಹಾಕ್ಕಾ ವ್ಹರ್ತಾನಾ

ಹೇಂ ವೃದ್ದಾಶ್ರಮ ಪಡಯಿ

-  ಶೀಲಾ ಭಂಡಾರ್‌ಕರ್ [ದಸೆಂಬ್ರ್ 2015]