ಮಾತೀ

’ಧುಳಿ ಥಾವ್ನ್ ಆಯ್ಲಾಯ್ ಮನ್ಶಾ, ಧುಳಿಕ್ ತುಂ ವೆತಲೊಯ್’ ಹೆಂ ಧಾರ್ಮಿಕ್ ಚಿಂತಪ್ ಮಾತ್ರ್ ನ್ಹಯ್ ಬಗಾರ್ ಸಮಾಜಿಕ್ ಚಿಂತಪ್. ತರ್‌ಯೀ ಮನಿಸ್ ಜಾವ್ನ್ ಹ್ಯಾ ಸಂಸಾರಾಂತ್ ಜಿಯೆಂವ್ಚೊ ಹೆಚ್ಚ್ ಮಾತಿಯೆಕ್ ಲಾಗುನ್ ಮನ್ಶಾಪಣಾಚೊ ಭೊಂಗೊಸ್ತೊಳ್ ಕರ್ತಾ. ಭಾವ್ ಭಾವಾಲಾಗಿಂ, ಸೆಜಾರ್ ಸೆಜಾರಿಲಾಗಿಂ ಮಾತ್ರ್ ನ್ಹಯ್ ರಾಶ್ಟ್ರ್‍ ರಾಶ್ಟ್ರಾಲಾಗಿಂ ಸಯ್ತ್ ಝುಜ್ತಾ ಏಕ್ ಮೂಟ್ ಮಾತಿಯೆಚ್ಯಾ ಸುವಾತೆಕ್ ಲಾಗುನ್, ಆನಿ ಜಿಕ್‌ಲ್ಲೊ ತಶೆಂಚ್ ಸಲ್ವಲ್ಲೊ, ಹೆಚ್ಚ್ ಮಾತಿಯೆಂತ್ ಅಪ್ಲಿ ನಿರ್ಜೀವ್ ಕುಡಿಕ್ ಸಾಂಡುನ್ ವೆತಾ - ಹಿ ಕಾಂಯ್ ಕಾಲ್ಪನಿಕ್ ಕಾಣಿ ನ್ಹಯ್, ಬಗಾರ್ ಆಮಿ ಹರ್ಯೆಕಾ ದಿಸಾ ಪಳೆಂವ್ಚೆಂ ಅಡ್ಹೂಕ್ ಸತ್. ಮಾತೀ ಕವಿತೆಂಚ್ ಅಸಲೆಂಚ್ ಅಪುರ್ಭಾಯೆಚೊ ನಿಯಾಳ್ ಆಟಾಪುನ್ ಆಸಾ.

ಬಾಬ್ ವೆಂಕಟೇಶ್ ನಾಯಕ್ ಶಿಕ್ಪಿ ವರ್ಗಾಚೊ, ಸಮ್ಜಣೆಚೊ ಕವಿ ಮ್ಹಣುನ್ ತಾಚಿಂ ಕವಿತಾ ಗೊವಾಯ್ ದಿತಾತ್. ಹ್ಯಾ ಸಂಸಾರಾಂತ್ ಕಿತೆಂಚ್ ಥಿರ್/ಸಾಸ್ಣಿಕ್ ಮ್ಹಳ್ಳೆಂ ನಾ ಮ್ಹಳ್ಳೆಂ ಕವಿತೆಚೆಂ ತೀರ್ಳ್ ಪುಣ್ ಹ್ಯಾ ತಿರ್ಳಾಚ್ಯಾ ಭಂವ್ತೊಣಿಂ ಹಾಣೆಂ ಉಭ್ಯೊ ಕೆಲ್ಲ್ಯೊ ಇಮಾಜಿ ವೆವೆಗ್ಳೆ ಸುರಾಚಿಂ ಗಿತಾಂಚ್ ಗಾಯ್ತಾತ್ ಅಶೆಂ ಭಗ್ತಾ. ಹಿ ಕವಿತೆಚಿ ಸೊಭಾಯ್ ತಶೆಂಚ್ ತಾಕ್ತ್ ಮಾಪುಂಕ್ ತುಕಾಚ್ ಸೊಡ್ತಾಂ.

ಮಾತೀ

ಕಿತಲೆ ವಯರೀ ರೂಕಾರಿ

ಪಾಲ್ಲೋ ಚಿಗರೇವೋ

ಬಾವನು ಎಕ ದೀಸ್ ಮಾತ್ತೀಂತ ಮೆಳತಾ

ಭೂಂಯ ಸೋಡನ

ಆಕಾಶಾರ ಉಬಲ್ಯಾರೀಯ

ಪಾಕ ಧಾಂಪತರೀ ಮಾತೀಕ ಪಾವತಾ.

ಮಾತೀಚೆ ಸ್ವಾದ ಆನೀ ಸ್ವಭಾವ ತಸಲೋಚ

ಸುರವೇ ಪಾವಸಾಕ ಮಾತೀಯೆ ಪರಮೊಳು

ಉಡಗಾಸ ಹಾಡಯತಾ

ಮಾತೀಚೆ ರುಚೀ ಮಾಕಶೀ ಪಳೇಲ್ಯಾಕ

ಸಂಬಂಧು ಸಕ್ಕಡ ವಿಸ್ರಾಯತಾ

ಮಾತೀಚೆ ವಾಂಟೋ ಜಾತನಾ

ಮಾತೇತಾಂಯ ಪಡತಾ

ಕೋಣಾಯ ನಾ ಜಾತನಾ

ಮಾತೀ ಮೆಳನು ಆಪ್ಣಾವನು ಗೆತಾ

ಆವಸುಲೆ ಮ್ಹಾರೆಂತು ವಾಡೂನ

ಭಾಯಲೇಲ ಮ್ಹಾರೇಂತ ನಿದ್ದೋನ

ಆಖೇರಿಕ ಉಜ್ಜೇ ಮ್ಹಾರೆಂತು ಆಸಲ್ಯಾರೀಯ

ಮಾತೀ ಸೋಡನು ದಿನಾ

ಜೀವಾಂತು ಜೀವ ದವರೋನು

ಮ್ಹಾರೆಂತು ಗುಟಲೋನ ಗೆತಾ.

ಎಕ ವೇಳಾಚೆ ದೇವು ಆನೀ ದೇವಳ ತಾಂಯ

ಮಾತೀಚೆ ಗರ್ಭಾಂತು ಆಸಾ

ಕೋಣಾಕಯ ಸೋಡುಂಕ ನಾ ಮಾತೀನ

ಹಾಂವಯ ಮಾತೀ ಜಾವಚೆ

ವೇಳಾಕ ರಾಕೂನ ಆಸಾ.

- ವೆಂಕಟೇಶ್ ನಾಯಕ್, ಮಡಂತ್ಯಾರ್ [ಜನೆರ್ 2018]