Luis Bab Mascarenhas smarok Moineachi Kovita

Luis Bab Mascarenhas smarok Moineachi Kovita

Itihasokallasaun monxachi somskritai, vigonean ani disoptt'tte jinnecher sounneancho mhotvacho probhavo asa. Somvsarobhorantlea vegvegllea somskritayamni sounnim protikanchea rupant distat. Dekhik- gorudd hem omerikentlea svatontreachem ani bollgeachem protik. Bharti-i poromporent gorudd ani zottayucheo kanneo amkam sampddottat. Purvil'lea ijipt somskritayent aibis suknneacho sombond ‘thoth’ hea gineanachea devakodden axil'lo. Orebiyon naitts, zatok kotha , ponchtontr sarkea sahiteant legit monxamvori uloupi sounneancheo onek kotha asat. Morachem protik zaitea somskritayamni dista.

Sounneanchem vhoddponn he kovitent monis ani sounnim hanchemodim tulla korun eka vegllo ayam' mukhar dourota.

Hea mhoineacho kovi hokk ani man he kovitek favo zala. Srixttichi rochnnuk kortona devan monxak rup dilem punn gunn mat dilenat, ghoddye te gunn her zonaurankhatir tannem douril'le asot oso uphasacho sur uktaun kovitechi survat zata. Monxakodden poddmuroponn ani boimanoponn axil'lean to aplea rochnnarak visrota oxem kovi thett sangina punn survecheoolli vachleauporant monant toxi bhauna nirmann zaup sobhavik.

Apleak konne aikuchem ani apli tokhnnai korchi oso het monant ballgun sounnem gaina. Heranchea tokhnnayek axel'lo monis mat toso vagta. Punn sokallim fuddem monis zago zaunchea adinch sounnim aplea nirmikache dinvas magunk aplem gain suru kortat oxi kolpona kovi korta.Suknneamni aplea surel gitamni monxachea songitacher probhavo ghala. Zaitea songitokarank suknneanchea gainantlean prernna mell'llea ani kaim zann aplea rochnamni tachem onukoronn legit kortat. Dekhik- naittingel, kogull him sounnim aplea sobit gainak lagun famad asat. Dekhun monxan sounneachi dekh gheuchi ani devachi yad kaddun taka argam ompchim oxem kovik dista. Onek suknneanchea zatink monis posta. Kir, kenri, perakitt, sallori him suknnim monxachea uloupachi nokkol korpachi tank axil'lean sohchor pranni mhonnun lokpriy asat. Monis tanchi nokkol korina. To aplea veapant ghuspunasota. Punn kovi mhontta '...Devak vankannosun stuti gint mhonnchim / te pokxeanche mordin monak xud'dh korun / sokall utthanu amkam stutigit mhonnuyam.’ ani disachi survat gitam gaun koruya.

Muktoponnan mollbant uddop hem sounneanchem anik ek khaxeloponn. Fuddlea khinnak kitem zatlem hacho husko tanchea monant nasta. Hachea urfattem monis dhortorek dosun rauta. Aplea chintnachea anni huskeanchea vojnaponda khorxeta, nirxeta. Sogllea huskeancher zoit melloun monxan legit mollbant mukt zaun uddchem oxem kovik dista. Monxache jinnent paulapaular spordha dekhun jivit sompem na. Bhagy, durbhagy ani jivit va moronn hea chokrant ghuspol'li monisozat borech fautt dhir soddtta, aplem bollgem visrota ani porsthitimukhar dimi marun har manta. Oxa vellar sounneakoddlean prernna gheun monxan xoronn vochunk fava dekhun 'thambcheak diyna kxonn xvas khellukoi / pankham dukhche poren uddchem na soddumya', hea utramni kovi monxak ek veglli urba dita. Monxak dhyey aspachem mhotv ani jinnechea provasant margodrxon korpak ud'dexachi zannvikai sounneankoddlean xikum yeta. Uddpachi ani vhodd prodex sodun kaddpachi tank axil'lean suknnim svatontreachem protik. Monxank voiyktik svatontreacho fattlavo kortona heranche hokk ani moreadank ador divn svatontry zobabodaroponnan apnnaupachi yad yeunk xokta.

Aple chochint kitem melltta tem aplem bhagy somzun sounnim jem melltta tantlo vantto zotnayen aplea bhurgeank haddun tanchey pott bhortat. Fokot apleach suvarthacher tanchi nodor nasta. Auhanancher mat korpak sounnim ul'lekhoni-i louchikoponn dakhoitat. Monis suknneam koddlean prernna gheun addmellim ani oddchonnintlean portun uddi marpachem mansik ani bhaunik bollgem toyar korunk xokta. Suknneamni monxachea itihasacher apli chhap soddlea. Suknneanchea vagnnukechem nirikxonn ani somzun gheun monxak jinnechea angantlean, onukulotai ani louchikoponn te somvad ani sohkarea meren moladik mhaiti mellunk xokta. He dhodde voiyktik vadd, boreponn ani soimik zogakodden kholayen sombond douropak yogdan divonk xoktat. Ani dekhun 'tanche mukhar amchem ostitv na moladik' hea utramni kovita sompta.

[kovita] Sounneanche Vhoddponn (- N.Balakrishna Malya)

Sounneanche Vhoddponn

devan tagelem rup dilem khoi monxak

rup matr ve dilem, ek gunn na tagele ?

ony pranneankhatir somballun ve dourilem

magir monisak rochilem bi tannem astole

monis sokallim utthamvche bho poilinch

nidechea kholayen pomvta astana

nidek ont korun din xuru korunk

dinvas sangu sounnim zago zatlim

fantear sureachi roxmi paunche murthomoch

devak vankannosun stuti gint mhonnchim

te pokxeanche mordin monak xud'dh korun

sokall utthanu amkam stutigit mhonnuyam

axroi dimvchi mai prokritikodde ani

soglleancho bapa svami devache kodden

upkar sanguchchim tim pokxeanche sarkhem

disacho survat gitam gayun korumya

otam ho kallu chang ve to astolo

ani lagi kxonn kitem ki dakhoitolo

koslem torachem bhoi monant vhornasotona

mollbari ubchi ti sounni song uddumya

spordhatmok somvsaru jiun hanga kotthin

bhagy durbhagy ani jivit va moronn

thambcheak diyna kxonn xvas khellukoi

pankham dukhche poren uddchem na soddumya

bhumyche dor konxantule konnekek venchuka

chonchyent mellemlem tem vidhit mhonn manuka

pott bhorum na tori bhurgeanchi yad asuka

svarth soddnu logichi pillgeank vicharumya

somvsarant khoinch aso portuka ghorant

sureacho ost zamvche murthom vopas ghuddant

dikhche ruka khandear besun devak nomon

supt nhide devi vhanttint svopnank chovumya

sounneank polloi ha ! koslem tankam noxib

mell'llem kiti na mell'llem, korna mu kodor

vicharant vhoddponn porom' homsamvri zolm'

tanche mukhar amchem ostitv na moladik

- N. Balakrishna Malya, Kochin [September, 2023]