ಜವಾಬ್ (- ಶೀಲಾ ಭಂಡಾರ್‌ಕಾರ್)

[ಕವಿತಾ] ಜವಾಬ್ (-   ಶೀಲಾ ಭಂಡಾರ್‌ಕಾರ್)

ಹಿ ಜವಾಬ್ ಉತರಾಂಚಿ ನ್ಹಯ್, ಹಿ ಜವಾಬ್ ವೆಳಾಚಿ, ಹಿ ಜವಾಬ್ ಆವಾಜಾಚಿ ನ್ಹಯ್, ಹಿ ಜವಾಬ್ ಮಾವ್ನಾಚಿ. ಆನಿ ಜೆದನಾಂ ಜಿವಿತಾಚೊ ಲಾಂಬ್ ಕಾಳ್ ಆನಿ ತ್ಯಾ ಕಾಳಾಂತ್ ಅನ್ಭವ್ ಕರುಂಕ್ ಮೆಳ್ಚಿಂ ವೆವೆಗಳಿಂ ಘಟನಾಂ ಎಕಾಮೆಕಾ ಸಮಜುಂಕ್ ಫಕತ್ ದೊಳ್ಯಾಂಚಿ ಭಾಸ್ ಪಾವತಾ.

ಬಾಯ್ ಶೀಲಾ ಭಂಡಾರಕರ್ ಹಿನೆಂ ಜೆ.ಎಸ್.ಬಿ. ಬೊಲಿಂತ್ ಬರಯಿಲ್ಲ್ಯಾ ಹ್ಯಾ ಕವಿತೆಚಿ ಸೊಭಾಯ್ ಪಾರ್ಕುಂಕ್ ತುಕಾಚ್ ಉಲೊ ದಿತಾಂ.

[ಕವಿತಾ] ಜವಾಬ್ (-   ಶೀಲಾ ಭಂಡಾರ್‌ಕಾರ್)

ಜವಾಬ್

ಪರತ ತಾಕ್ಕಾ ಭೇಟೂಚೊ ಅವಕಾಶ.

ತಶಿ ಮಣೂನ ಆಯ್ಲಾ ತಾಗೆಲೆ ಸಂದೇಶ‌.

ಮನ ಧಾಂವ್ಲೆ ಪಂಚ್‍ವೀಸ ವರಸಾ ಮಾಕ್ಷಿ.

ಪತಂಗಾ ವರಿ ಉಬಲೆ ದೇವ ಸಾಕ್ಷಿ.

ತಾಗೆಲೊ ಏಕ ಸವಾಲಾಚೊ ಝಾಪ್

ಮೆಗೆಲೆ ಭಿತ್ತರಿ ವರಲಾ.

ತ್ಯಾ ವೇಳ ಉತ್ರಾಂನ ಮೆಗೆಲೆ ಸಾಥ್ ದಿಲಲೆ ನಾ.

ಆಜ ಹಾಂವ ತಾಗೆಲೆ ಸಗ್ಳೇ ಸವಾಲಾಚೆ ಜವಾಬ ದಿತ್ತಲಿ

ಮನಾಚೆ ಜಡಾವಣ ದೆವೊನು ಹಗೂರ ಜಾತ್ತಲಿ

ಧಾಂವಲಿ ಹಾಂವ ಸಾನ ಚೆಲ್ಯೆಲ ವರಿ.

ತೆದನಾ ಆಮ್ಮಿ ಮೆಳ್ಚೆ ಕೆದಳಾಚೆ ಜಾಗೇರಿ.

ಹರ್ದೆ ಧಡಧಡು. ಪೊಟ್ಟಾಂತು ಭಂವರಾ ಗೊಂದೊಳು.

ಆಯ್ಲೊ ತೊ.. ತಾಣೆ ಲಾಗ್ಗಿ ಯೆವ್ಚೆ ದಿಸಲೆ.

ವಯ್ ಕೀ ನಯ್ ಮಳೆಲೆ ಸಂಶಯ ಆಯ್ಲೆ.

ಮಾಸ್ಕ್ ಗಾಲ್ಲೆಲೆ ತೊಂಡಾನ ಹಾಂವ ಹಾಸ್ಲಿ

ತೋ ಹಾಸ್ಲೊ ಕಿ ನಾ ಮಳೆಲೆ ಮಾಕ್ಕಾ ದಿಸನಿ

ಬಸ್ಲಿಂಚಿ ಆಮ್ಮಿ ಏಕ ಮೀಟರ್ ದೂರ

ರಾಕುಕ ಮೊಣು ಸಾಮಾಜಿಕ ಅಂತರ.

ತೋ ಬಶಿಲೊ ಮೌನ ಆನಿ ಮೆಗೆಲೆ ಉತ್ರಂ ಭಾಯರ ಪಣಿ.

ಚಡತಾ ಆಶಿಲಿ ವತ್ತಾ ಚಿ ಹುನಸಾಣಿ

ಸಾಬಾರ ವೇಳಾನ ತಾಣೆ ಆಪಯ್ಲೆ ಮೆಗೆಲೆ ನಾಂವ.

ಹೂಂ ಮಳ್ಳೆ ಶಿವಾಂಯ್ ವಿಂಗಡ ಉಲ್ಲಯ್ನಿ ಹಾಂವ.

ತಾಣೆ ಸಾಂಗ್ಲಿ ತಾಗೆಲಿ ಘರ್ ಚಿ ಖಬರ.

ಚೆರ್ಡುಂವಾಲಿ, ಬಾಯ್ಲೆಲಿ ಆನಿ ತಾಗೆಲೆ ಉದ್ಯೋಗಾಚಿ.

ಹಾಂವೆ ಮೆಗೆಲೆ ಸಂಸಾರಾಚಿ.

ತಾಗೆಲೆ ಡಯಾಬಿಟೀಸ್ ಆನಿ ಮೆಗೆಲೆ ಸೈನಸ್.

ಇತುಲೇಚಿ ಆಮ್ಮಿ ಉಲ್ಲಯಿಲೆ ಸಗ್ಳೇ ದೀಸ್.

ಸಾಂಜ್ ಜಾಲ್ಲಿ ಸುರ್ಯೊ ಬುಡ್ಲೊ.

ತಾಗೆಲೆ ಸವಾಲಾಚೊ ಜವಾಬ ಮೆಗೆಲೆ ಭಿತ್ತರೀ ವರಲೊ.

ಹಾಂವ ಮೆಗೆಲೆ ಘರಾ ಆನಿ ತೋ ತಾಗೆಲೆ ಘರಾ ಚಮಕಲೊ.

ಮನಾಚೊ ಭಾರು ಮನಾನ ಪರತ ವಾಂವಲೊ.

-   ಶೀಲಾ ಭಂಡಾರ್‌ಕಾರ್. [ಮಾಯ್, 2020]