Yadincho Poso (- Gourang Baburavo Bhanddiye)

[kovita] Yadincho Poso (- Gourang Baburavo Bhanddiye)

Doreka monxeak bhurogemponn hont utrun yeupak poddtach. Bhurogemponn ek osolem hont; jem kitlo zannto zaleari yadint urche tosoleo khup kannio astat. Kednam-i tea ekeka kanniank yad korunk lagtana motint ul'las, anond umallun yemvchem sohoz.

Bab gourong bhanddye ek yuvokovi, oplea bhurogeaponnaleo yadi kitleo sompea ritin yad korchi polloitana amkam teo vachun gel'leporinch amchea yadinchea somsarak pauytat.

[kovita] Yadincho Poso (- Gourang Baburavo Bhanddiye)

Yadincho Poso

bhurgeponnantleo yadi uspunk

bhurgo zaun gelom hamv,

rito zaupi yadincho poso

ailo mhozo jivo khaunko.

Bhangralle dis te

bhangrallea monxamni bhoril'le,

apleponnachea natean

xezar xezar zoddil'lem.

Onontachea fulamni amchem

angonn xivril'lem astalem,

rotonabolem kiteak konn zanna

holluch lozun fultalem.

Porsantoli zanntti dosonn

nennaroponn miroitali

loiraichea zatrechi sulus

zust mogrek choddttali.

Voinnevelea chuddttancher nhidpachi

odduch aglli axil'li

khollavelea beddeancher lollpachi

mozach veglli axil'li.

Khannonnentole mag atam

ximppa khatir urunk na

kol'leacho adlo jhet

aichea sprinkloramni na.

Garfam, amul'leo, teflli atam

adle boxen lagnat,

pormoll aplo fankoun

apunn lagil'leachem sangnat.

Apnnalea poros heramlea bhattantolim

addsoram ruchik lagtalim,

sukot ghal'le ponnsache papodd

kuru kuru korun khatalim.

Piraddeachea bettan ami

kitlim xotkam martale,

bAel xettlo zalear amkam

torgam dhodde sudhdam choltale.

Onxi atam allxi zalea

maddak legit motthemponn ailam,

kauthen apnnem maddi zaupachem

sopon legit udkant pailam.

Xenneavoilo ponnos atam

adle boxen lagna,

kollso bhor udok soddun

mirvel kaim magina.

Bhateo, palo khaupi mayest

gorvam atam gottheant na,

makddank amuddopachi tank aichea

pog, zormon petteant na.

Punn thoddem bhovo urlam nodre samkar

baki sogllem itihasozoma,

atam ghoram, monxam konn na hanga

mhojeo yadi tori koslea kama?

- Gourang Baburavo Bhanddiye [May, 2023]

Gourang Baburavo Bhanddiye: Sauy-verem rauta. Sodeak Dhempe mohavidealoyant Konknni vixeacho sohaik pradheapok mhonnun odheapon korta. Kotha, kovita boroupachi audd asa. Zaiteo kotha, kovita prokaxit zaleat ani sortimni inamam favo zaleant. Konknni sahity soritechi sadhna odik progalp‌ponnan korit asa.