शेळांव यादी [राजश्री सयल]

’म्हाका पावस खूब आवडता’ - जेदनां चारली चापलिनान हें उतर सांगलें, लोक हासुंक लागलो कंय; अशें चिंतून, कांय हो एक नवेंच फोकाणां कर्ता म्हणून. पूण मुखारून चारली चापलिनान सांगलें; ’म्हाका पावस खूव आवडता, कित्याक म्हळ्यार तेदनां म्हजें दूक कोणाक‌च दिसाना’. कवी एक कलाकार, पूण पयलें तो एक मनीस, आशा-अत्रेग, मोग-मयपास, दूक-निरास भगचो मनीस. जेदनां कवी अपल्या जिण्येच्या अनबोगाक उत्रांच्या रंगांत व्हाळयताना उभजल्ली कविता कितली अपुर्भायेची जावंक सक्ता म्हणच्याक कांय ही कविता गवाय दीत.

बाय राजश्री सयल, गोंयची नामणेची कवयत्री, फा|आग्नेल कोलेज पिलार, हांगासर सह-प्राध्यापकी जावन वावर करून आसा. विचार‌वंत कवयत्री, राश्ट्रीय काऱ्यासाळांनी जायते प्रबंध आनी अध्ययन लेखनां तिणें सादर केल्यांत. पूण हांगासर तिची कविता फकत उत्रांनी जीव सोडिना बगर जीव भर्ता देकून एक भळाधीक रुदान, जें आयच्या समाजेंत आमी सदांच आयकोन आयिल्लेपरीं आमच्या कानांनी गाजता. बाकिचें सोधुंक तशेंच मापुंक तुकाच सोडतां

[कविता] शेळांव यादी [राजश्री सयल]

शेळांव यादी

म्हजी आजी म्हणटाली;

जिवीत म्हणटात तें,

आळवा पनावयलें उदक,

पावसांत पडटा आनी वाऱ्यात व्हाळटा.

म्हजी मावशी म्हणटाली;

गरभाचे अनी मिरगाचे सांगू येता,

केन्न रचता आनी केन्ना झडटा तो.

म्हजी भयण म्हणटाली;

पावसांत भिजल्यार आनी

घोवान मारल्यार कोणाक सांगतली?

लोव लोव हांव व्हड जालीं अनी

म्हाका कळूक हांचे पावशी तत्व‌गिन्यान

अज्येलो घरकार आळवा पानावयल्या थेंब्यावरी

रोखडोच वांवन गेलो.

मावशेल्या पोटात केन्ना गर्भच रचूकच नासलो,

आनी म्हजी भयण जिवीत‌भर घोवालो मारच खायत आसली

आतां ह्या रासवळ दुखांचो

एक पावस

एक पावस जाला

- राजश्री सयल [जनेर, २०१९]