ಕವಿತಾकविताPoem

ಶೆಳಾಂವ್ ಯಾದಿ [- ರಾಜಶ್ರೀ ಸಯ್ಲ್]

’ಮ್ಹಾಕಾ ಪಾವ್ಸ್ ಖೂಬ್ ಆವಡ್ತಾ’ - ಜೆದ್ನಾಂ ಚಾರ್ಲಿ ಚಾಪ್ಲಿನಾನ್ ಹೆಂ ಉತರ್ ಸಾಂಗ್ಲೆಂ, ಲೋಕ್ ಹಾಸುಂಕ್ ಲಾಗ್ಲೊ ಕಂಯ್; ಅಶೆಂ ಚಿಂತುನ್, ಕಾಂಯ್ ಹೊ ಏಕ್ ನವೆಂಚ್ ಫೊಕಾಣಾಂ ಕರ್ತಾ ಮ್ಹಣುನ್. ಪುಣ್ ಮುಖಾರುನ್ ಚಾರ್ಲಿ ಚಾಪ್ಲಿನಾನ್ ಸಾಂಗ್ಲೆಂ; ’ಮ್ಹಾಕಾ ಪಾವ್ಸ್ ಖೂವ್ ಆವಡ್ತಾ, ಕಿತ್ಯಾಕ್ ಮ್ಹಳ್ಯಾರ್ ತೆದನಾಂ ಮ್ಹಜೆಂ ದೂಕ್ ಕೊಣಾಕ್‌ಚ್ ದಿಸಾನಾ’. ಕವಿ ಏಕ್ ಕಲಾಕಾರ್, ಪುಣ್ ಪಯ್ಲೆಂ ತೊ ಏಕ್ ಮನೀಸ್, ಆಶಾ-ಅತ್ರೆಗ್, ಮೋಗ್-ಮಯ್ಪಾಸ್, ದೂಕ್-ನಿರಾಸ್ ಭಗ್ಚೊ ಮನಿಸ್. ಜೆದ್ನಾಂ ಕವಿ ಅಪ್ಲ್ಯಾ ಜಿಣ್ಯೆಚ್ಯಾ ಅನ್ಬೋಗಾಕ್ ಉತ್ರಾಂಚ್ಯಾ ರಂಗಾಂತ್ ವ್ಹಾಳಯ್ತಾನಾ ಉಭ್ಜಲ್ಲಿ ಕವಿತಾ ಕಿತ್ಲಿ ಅಪುರ್ಭಾಯೆಚಿ ಜಾಂವ್ಕ್ ಸಕ್ತಾ ಮ್ಹಣಚ್ಯಾಕ್ ಕಾಂಯ್ ಹಿ ಕವಿತಾ ಗವಾಯ್ ದೀತ್.

ಬಾಯ್ ರಾಜಶ್ರೀ ಸಯ್ಲ್, ಗೊಂಯ್ಚಿ ನಾಮಣೆಚಿ ಕವಯತ್ರಿ, ಫಾ|ಆಗ್ನೆಲ್ ಕೊಲೆಜ್ ಪಿಲಾರ್, ಹಾಂಗಾಸರ್ ಸಹ-ಪ್ರಾಧ್ಯಾಪಕಿ ಜಾವ್ನ್ ವಾವ್ರ್ ಕರುನ್ ಆಸಾ. ವಿಚಾರ್‌ವಂತ್ ಕವಯತ್ರಿ, ರಾಶ್ಟ್ರೀಯ್ ಕಾರ್ಯಾಸಾಳಾಂನಿ ಜಾಯ್ತೆ ಪ್ರಬಂಧ್ ಆನಿ ಅಧ್ಯಯನ್ ಲೇಖನಾಂ ತಿಣೆಂ ಸಾದರ್ ಕೆಲ್ಯಾಂತ್. ಪುಣ್ ಹಾಂಗಾಸರ್ ತಿಚಿ ಕವಿತಾ ಫಕತ್ ಉತ್ರಾಂನಿ ಜೀವ್ ಸೊಡಿನಾ ಬಗರ್ ಜೀವ್ ಭರ್ತಾ ದೆಕುನ್ ಏಕ್ ಭಳಾಧಿಕ್ ರುದಾನ್, ಜೆಂ ಆಯ್ಚ್ಯಾ ಸಮಾಜೆಂತ್ ಆಮಿ ಸದಾಂಚ್ ಆಯ್ಕೊನ್ ಆಯಿಲ್ಲೆಪರಿಂ ಆಮ್ಚ್ಯಾ ಕಾನಾಂನಿ ಗಾಜತಾ. ಬಾಕಿಚೆಂ ಸೊಧುಂಕ್ ತಶೆಂಚ್ ಮಾಪುಂಕ್ ತುಕಾಚ್ ಸೊಡ್ತಾಂ

[ಕವಿತಾ] ಶೆಳಾಂವ್ ಯಾದಿ [- ರಾಜಶ್ರೀ ಸಯ್ಲ್]

ಶೆಳಾಂವ್ ಯಾದಿ

ಮ್ಹಜಿ ಆಜಿ ಮ್ಹಣಟಾಲಿ;

ಜಿವಿತ್ ಮ್ಹಣಟಾತ್ ತೆಂ,

ಆಳ್ವಾ ಪನಾವಯ್ಲೆಂ ಉದಕ್,

ಪಾವಸಾಂತ್ ಪಡಟಾ ಆನಿ ವಾರ್ಯಾತ್ ವ್ಹಾಳಟಾ.

ಮ್ಹಜಿ ಮಾವಶಿ ಮ್ಹಣಟಾಲಿ;

ಗರಭಾಚೆ ಅನಿ ಮಿರಗಾಚೆ ಸಾಂಗು ಯೆತಾ,

ಕೆನ್ನ ರಚತಾ ಆನಿ ಕೆನ್ನಾ ಝಡಟಾ ತೊ.

ಮ್ಹಜಿ ಭಯ್ಣ್ ಮ್ಹಣಟಾಲಿ;

ಪಾವಸಾಂತ್ ಭಿಜಲ್ಯಾರ್ ಆನಿ

ಘೊವಾನ್ ಮಾರಲ್ಯಾರ್ ಕೊಣಾಕ್ ಸಾಂಗತಲಿ?