ಕವಿತಾकविताPoem

Xar (- Rajashree Sail)

[kovita] Xar (- Rajashree Sail)

Kaim tempadim dispoddto gras zoddunk apounnem dil'lem xer (xar) atam itlem nixttur zalam. Kam' na, ravunk ghor na, khaunko khann na, pattim gamvak vecheo vatto nant ani dusre vatten vistarchi pidda kaim az-faleam opnnak nas kortakai mholl'lli bhirant veglli. Khorench chintunk korota ’monoxaponn ozun hea xerant asakai?’

[kovita] Xar (- Rajashree Sail)

Xar

aiz xarachea mhal darantlean hozaramni kamgaranchi bhirim,

mathear pottleom hatant roddkuri bhurgim

monat bhom-i, vitrag, noiraxy gheun bhair sorli.

Kamgar xaracho prann.

Homali, kuli, penttor venttor hatavelea pottavelo manai .

Xaracho svas usvas kamgar.

Aiz chidheachidheachi apli jinn pottlent bhorun, chempun, kallzatoli arodd moneani ontthatlea ontthat chidd'ddun gheyt dhamvt suttlo.

Xar okrall vikrall xar.

Tanchea humechea thembea dharer

khinnakhinnak rup rong bodlopi.

Tanche khatir mat porki, uprem, urfattea kallzachem

fotting, nagounnem.

Mhonnoch te bhair sorlem

chomeam chomeamni

kallzatolo uzo moneani gillit .

Xar hozaramni ghoramni

lakh lakh lokamni

khottleani chidd'ddun , chempun

bhoril'lem

osteavst patllil'lem

osomskrit bhitl'le bhitor

kodd'ddol'le, pokhril'le ,bokal xar.

Tanche pott bhorpi fokot pott bhorpi xar.

Girest, chokchokit, lokhlokhit hea xaratole ukhlapiponn, khillkhilleponn

nirjiv fatralloponn, nixttur osomvedonoxiloponn tankam lhou lhou kolluk lagil'lem

mhonnoch tem bhair soril'lem

aplea gamvchem diken

gamv khoro, ossol, jivont, somvedonoxil.

Thoim tanche ghor

thoim tanchi mati

ghoramathear panchvi samvlli

ghoramukhar nhoim nilli

ghorafattlean dongor zhaddam zhompam

vaddea vaddear monxam

mekllea monachim

mhomvall kallzachim

- Rajashree Sail. [Apr, 2020]

Rajashree Sail: Gõychea namnnechea Fr|Agnel College, Pilar hangasor soh-pradheapoki zaun vaur korun aschi hi kovita, lekhnam, probondh boroita. ’Oli Ranam’ hicho porgott‌l'lo kovitazomo. Raxttri-i kareasallamni odhyoin lekhnam, probondh sador keleat.