ಶಾರ್ (- ರಾಜಶ್ರೀ ಸಯ್ಲ್)

[ಕವಿತಾ] ಶಾರ್ (- ರಾಜಶ್ರೀ ಸಯ್ಲ್)

ಕಾಂಯ್ ತೆಂಪಾದಿಂ ದೀಸ್ಪಡ್ತೊ ಗ್ರಾಸ್ ಜೊಡುಂಕ್ ಆಪವ್ಣೆಂ ದಿಲ್ಲೆಂ ಶೆರ್ (ಶಾರ್) ಆತಾಂ ಇತ್ಲೆಂ ನಿಶ್ಟುರ್ ಜಾಲಾಂ. ಕಾಮ್ ನಾ, ರಾವುಂಕ್ ಘರ್ ನಾ, ಖಾಂವ್ಕ್ ಖಾಣ್ ನಾ, ಪಾಟಿಂ ಗಾಂವಾಕ್ ವೆಚ್ಯೊ ವಾಟೊ ನಾಂತ್ ಆನಿ ದುಸ್ರೆ ವಾಟೆನ್ ವಿಸ್ತಾರ್ಚಿ ಪಿಡಾ ಕಾಂಯ್ ಆಜ್-ಫಾಲ್ಯಾಂ ಅಪ್ಣಾಕ್ ನಾಸ್ ಕರ್ತಾಕಾಯ್ ಮ್ಹಳ್ಳಿ ಭಿರಾಂತ್ ವೆಗ್ಳಿ. ಖರೆಂಚ್ ಚಿಂತುಂಕ್ ಕರತಾ ’ಮನಶಾಪಣ್ ಅಜೂನ್ ಹ್ಯಾ ಶೆರಾಂತ್ ಆಸಾಕಾಯ್?’

[ಕವಿತಾ] ಶಾರ್ (- ರಾಜಶ್ರೀ ಸಯ್ಲ್)

ಶಾರ್

ಆಯ್ಜ್ ಶಾರಾಚ್ಯಾ ಮ್ಹಾಲ್ ದಾರಾಂತ್ಲ್ಯಾನ್ ಹಜಾರಾಂನಿ ಕಾಮ್ಗಾರಾಂಚಿ ಭಿರಿಂ,

ಮಾಥ್ಯಾರ್ ಪೊಟ್ಲ್ಯೊಂ ಹಾತಾಂತ್ ರಡ್ಕುರಿ ಭುರ್ಗಿಂ

ಮನಾತ್ ಭಂಯ್, ವಿತ್ರಾಗ್, ನೈರಾಶ್ಯ್ ಘೆವ್ನ್ ಭಾಯ್ರ್ ಸರ್ಲಿ.

ಕಾಮ್ಗಾರ್ ಶಾರಾಚೊ ಪ್ರಾಣ್.

ಹಮಾಲಿ, ಕುಲಿ, ಪೆಂಟರ್ ವೆಂಟರ್ ಹಾತಾವೆಲ್ಯಾ ಪೊಟಾವೆಲೊ ಮಾನಾಯ್ .

ಶಾರಾಚೊ ಸ್ವಾಸ್ ಉಸ್ವಾಸ್ ಕಾಮ್ಗಾರ್.

ಆಯ್ಜ್ ಚಿಧ್ಯಾಚಿಧ್ಯಾಚಿ ಆಪ್ಲಿ ಜೀಣ್ ಪೊಟ್ಲೆಂತ್ ಭರೂನ್, ಚೆಂಪೂನ್, ಕಾಳ್ಜಾತಲಿ ಆರಡ್ ಮೊನ್ಯಾನಿ ಒಂಠಾತ್ಲ್ಯಾ ಒಂಠಾತ್ ಚಿಡ್ಡೂನ್ ಘೆಯ್ತ್ ಧಾಂವ್ತ್ ಸುಟ್ಲೊ.

ಶಾರ್ ಅಕ್ರಾಳ್ ವಿಕ್ರಾಳ್ ಶಾರ್.

ತಾಂಚ್ಯಾ ಹುಮೆಚ್ಯಾ ಥೆಂಬ್ಯಾ ಧಾರೆರ್

ಖಿಣಾಖಿಣಾಕ್ ರೂಪ್ ರಂಗ್ ಬದ್ಲಪಿ.

ತಾಂಚೆ ಖಾತೀರ್ ಮಾತ್ ಪರ್ಕಿ, ಉಪ್ರೆಂ, ಉರ್ಫಾಟ್ಯಾ ಕಾಳ್ಜಾಚೆಂ

ಫಟೀಂಗ್, ನಾಗವ್ಣೆಂ.

ಮ್ಹಣಚ್ ತೆ ಭಾಯ್ರ್ ಸರ್ಲೆಂ

ಚೊಮ್ಯಾಂ ಚೊಮ್ಯಾಂನಿ

ಕಾಳ್ಜಾತಲೊ ಉಜೊ ಮೊನ್ಯಾನಿ ಗಿಳೀತ್ .

ಶಾರ್ ಹಜಾರಾಂನಿ ಘರಾಂನಿ

ಲಾಖ್ ಲಾಖ್ ಲೊಕಾಂನಿ

ಖೊಟ್ಲ್ಯಾನಿ ಚಿಡ್ಡೂನ್ , ಚೆಂಪೂನ್

ಭರಿಲ್ಲೆಂ

ಅಸ್ತ್ಯಾವ್ಸ್ತ್ ಪಾತ್ಳಿಲ್ಲೆಂ

ಅಸಂಸ್ಕೃತ್ ಭಿತ್ಲ್ಲೆ ಭಿತರ್

ಕಡ್ಡಲ್ಲೆ, ಪೊಖ್ರಿಲ್ಲೆ ,ಬಕಾಲ್ ಶಾರ್.

ತಾಂಚೆ ಪೊಟ್ ಭರ್ಪಿ ಫಕತ್ ಪೊಟ್ ಭರ್ಪಿ ಶಾರ್.

ಗಿರೆಸ್ತ್, ಚಕ್ಚಕೀತ್, ಲಖ್ಲಖೀತ್ ಹ್ಯಾ ಶಾರಾತಲೆ ಉಖ್ಲಾಪೀಪಣ್, ಖಿಳ್ಖಿಳೆಪಣ್

ನಿರ್ಜಿವ್ ಫಾತ್ರಾಳಪಣ್, ನಿಶ್ಟೂರ್ ಅಸಂವೆದನಶೀಲಪಣ್ ತಾಂಕಾಂ ಲ್ಹವ್ ಲ್ಹವ್ ಕಳೂಕ್ ಲಾಗಿಲ್ಲೆಂ

ಮ್ಹಣಚ್ ತೆಂ ಭಾಯ್ರ್ ಸರಿಲ್ಲೆಂ

ಆಪ್ಲ್ಯಾ ಗಾಂವ್ಚೆಂ ದಿಕೆನ್

ಗಾಂವ್ ಖರೊ, ಅಸ್ಸಲ್, ಜಿವಂತ್, ಸಂವೆದನಶೀಲ್.

ಥಂಯ್ ತಾಂಚೆ ಘರ್

ಥಂಯ್ ತಾಂಚಿ ಮಾತಿ

ಘರಾಮಾಥ್ಯಾರ್ ಪಾಂಚ್ವಿ ಸಾಂವ್ಳಿ

ಘರಾಮುಖಾರ್ ನ್ಹಂಯ್ ನಿಳಿ

ಘರಾಫಾಟ್ಲ್ಯಾನ್ ದೊಂಗರ್ ಝಾಡಾಂ ಝೊಂಪಾಂ

ವಾಡ್ಯಾ ವಾಡ್ಯಾರ್ ಮನ್ಶಾಂ

ಮೆಕ್ಳ್ಯಾ ಮನಾಚಿಂ

ಮ್ಹೊಂವಾಳ್ ಕಾಳ್ಜಾಚಿಂ

- ರಾಜಶ್ರೀ ಸಯ್ಲ್. [ಎಪ್ರಿಲ್, 2020]