ಉತ್ರಾಂ (- ಫಿಲೋಮೆನಾ ಸಾಂಫ್ರಾನ್ಸಿಸ್ಕೊ)

[ಕವಿತಾ] ಉತ್ರಾಂ (- ಫಿಲೋಮೆನಾ ಸಾಂಫ್ರಾನ್ಸಿಸ್ಕೊ)

ಮನಶಾಕ್ ಮಾರ್ನ್ ಕಾಡುಂಕ್ ಫಕತ್ ಚುರಿ, ತಲ್ವಾರ್ ವ ಬಾಂಬಾಚಿ ಗರಜ್ ನಾ. ಫಕತ್ ಉತ್ರಾಂಚ್ ಪಾವ್ತಾತ್. ಬರೆಂ ಉತರ್ ಜೀವ್ ನಾಸ್ಚ್ಯಾ ಕಾಗ್ದಾಚ್ಯಾ ಫುಲಾಕ್ ಲೆಗುನ್ ಜೀವ್ ದೀಂವ್ಕ್ ಸಕತಾ ತರ್ ಖೊಟೆಂ ಉತರ್ ಖರೆಂಚ್ ಜಾವ್ನ್ ಸಂವೇದನ್ ಆಸ್ಚ್ಯಾ ಮನಶಾಕ್ ನಾಸ್ ಕರುಂಕ್ ಸಕತಾ. ಹಿಚ್ ಹ್ಯಾ ಕವಿತೆಚಿ ಪಾಟ್‌ಭುಂಯ್ ಜಾವ್ನಾಸಾ.

[ಕವಿತಾ] ಉತ್ರಾಂ (- ಫಿಲೋಮೆನಾ ಸಾಂಫ್ರಾನ್ಸಿಸ್ಕೊ)

ಉತ್ರಾಂ

ಕಾಳ್ಜಾಕ್ ಮ್ಹಜ್ಯಾ

ಪಿಳ್ ಘಾಲ್ಪಿ

ಉತ್ರಾಂ ತುಜಿಂ

ದೊಳ್ಯಾಂತ್ಲ್ಯಾನ್ ಮ್ಹಜ್ಯಾ

ದುಕಾಂ ಜಾವ್ನ್

ವ್ಹಾಂವಾತ್ ಆಸಾತ್

ವ್ಹಾಂವಾತ್ ಆಸ್ತೆಲಿಂ.

ಕಿತ್ಯಾಕ್,

ಜೆನ್ನಾ ಸಾವ್ನ್

ಉತ್ರಾಂ ತುಜಿಂ

ಕಾಳ್ಜಾಕ್ ಮ್ಹಜ್ಯಾ

ಭಾಲೆ ಜಾವ್ನ್

ತೊಪ್ಲಿಂ, ರೊಂಬ್ಲಿಂ,

ತೆನ್ನಾ ಸಾವ್ನ್

ಕಾಳ್ಜಾಂತ್ ಮ್ಹಜ್ಯಾ

ದುಖಾಚಿ ಖೊಲ್

ಝರ್ ಫುಟ್ಲಿ, ಜಿ

ವ್ಹಾಂವಾತ್ ಆಸಾ, ಆನಿ

ಕಾಳಿಜ್ ಮ್ಹಜೆಂ

ದುಖಾಚೊ ಎಕ್

ದರ್ಯಾ ಜಾಲಾ.

ದೆಖುನ್

ಜೆ ಮೆರೆನ್

ದರ್ಯಾಚೆಂ ಉದಕ್

ಲ್ಹಾರಾಂ ಜಾವ್ನ್

ಖಡ್ಪಾಂಚೆರ್

ಆದಳ್ತಲೆಂ,

ಆದ್ಳತ್ ರಾವ್ತೆಲೆಂ,

ತೆ ಮೆರೆನ್

ಉತ್ರಾಂ ತುಜಿಂ

ಕಾಳ್ಜಾರ್ ಮ್ಹಜ್ಯಾ

ಆಪ್ಟತಲಿಂ,

ಆಪ್ಟತ್ ರಾವ್ತೆಲಿಂ.

- ಫಿಲೋಮೆನಾ ಸಾಂಫ್ರಾನ್ಸಿಸ್ಕೊ. [ಜ್ಯೂನ್, 2020]