ಸೊದ್! (- ಸಖಾರಾಮ್ ಶೆಣ್ವಿ ಬೋರ್ಕರ್)

[ಕವಿತಾ] ಸೊದ್! (- ಸಖಾರಾಮ್ ಶೆಣ್ವಿ ಬೋರ್ಕರ್)

ಹಿ ಕವಿತಾ ಥೊಡ್ಯಾಚ್ ಉತ್ರಾಂಚಿ ಪುಣ್ ಹಾಂತ್ಲಿ ಕಾಣಿ ಕಾಂಯ್ ವರಸಾಂಚಿ. ಸಂಸಾರ್ ಬದಲ್ಲಾ ಪುಣ್ ಕಾಳೊಕಾಂತ್ ಜೀಣ್ ಸಾರುನ್ ಸವಯ್ ಕೆಲ್ಲ್ಯಾ ಮನಶಾಕ್ ಉಜ್ವಾಡಾಚೆರ್ ನೊಸಾಯ್. ಹಾಂಗಾ ಉಜ್ವಾಡ್ ಮ್ಹಳ್ಯಾರ್ ಗಿನ್ಯಾನ್, ಜಾಣ್ವಾಯ್, ಶಿಕಪ್, ಸಮ್ಜಣಿ. ಕಾಳೊಕ್ ಮ್ಹಳ್ಯಾರ್ ಆಳ್ಸಾಯ್, ಅಗ್ಯಾನ್, ಉಣಿ ವಾ ನಾ-ಸಮ್ಜಣಿ. ಕವಿತಾ ವಾಚುನ್ ಗೆಲ್ಲೆಪರಿಂ ಮನಾಂತ್ ಉದೆಂವ್ಚೊ ಪಯ್ಲೊ ಸಬ್ಧ್ ’ವ್ಹಾ!....’

[ಕವಿತಾ] ಸೊದ್! (- ಸಖಾರಾಮ್ ಶೆಣ್ವಿ ಬೋರ್ಕರ್)

ಸೊದ್!

ಹಾಲಿಂ ಮ್ಹಾಕಾ ಉಜ್ವಾಡಾಚಿ

ಸಾಮ್ಕಿ ನಸಾಯ್ ಜಾಲ್ಯಾ.

ಕಾಳ್ಖಾಂತ್ ಎಕೆ ಬಂದ್ ಕುಡೀಂತ್

ಎಕ್ಟೊಚ್ ರಾವ್ಪ್

ಮ್ಹಾಕಾ ಆತಾಂ ಆವ್ಡಟಾ.

ಉಜ್ವಾಡಾಂತ್

ಜಿಣೆಂತ್ ಕಸ್ಲೀಚ್

ಮೊಖ್ ನಾಸ್ತನಾಂ

ಹಾಂಗಾ ಥಂಯ್ ಧಾಂವ್ಪಾಂತ್

ಕಿತೆಂ ಅರ್ಥ್ ಆಸಾ?

ದುಸ್ರೆ ಧಾಂವ್ತಾತ್ ಮ್ಹಣ್

ಹಾಂವೆಯ್ ತಶೆಂಚ್ ಧಾಂವ್ಚೆಂ

ಹೆಂ ಮ್ಹಾಕಾ ತರಿ ಸಮಾ ದಿಸ್ನಾ.

ತೆ ಖಾತೀರ್ ಆತಾಂ ಹಾಂವ್

ಎಕೆ ಬಂದ್ ಕಾಳ್ಖೆ ಕುಡೀಂತ್ ಬಸೂನ್

ಮ್ಹಜೆ ಜಿಣೆಂತಲೆ ಮೊಲಾದೀಕ್ ಖೀಣ್

ಹಾಂವೆ ಉಜ್ವಾಡಾಂತ್ ಕಿತ್ಯಾಕ್ ವಗ್ಡಾಯಲೆ

ತಾಚಿಂ ಕಾರ್ಣಾಂ ಸೊದ್ತಾಂ.

- ಸಖಾರಾಮ್ ಶೆಣ್ವಿ ಬೋರ್ಕರ್. [ಎಪ್ರಿಲ್, 2020]