सोभाणां (- आन्सिटा ओशीन डिसोज)

[कविता] सोभाणां (- आन्सिटा ओशीन डिसोज)

दीस गेल्लेपरीं सामाजीक माध्यमाच्या प्रभावान मनशान अपली जिणी तशेंच संसकृती सयत एक विडंबन कशें केलां. मतीक आयिल्लें, ताळ-मूळ नातलें अपणावंक वेचें एक फेशन कशें कर्न घेतलां. आनी दाकवणेच्या वीपऱ्यासांत कांय इल्ली समजणी आसचो लोक ह्या सोभाणांनी हाजर जायत जाल्यार ह्या हजार-लाखांनी घेंवन आयिल्ल्यांक ऊट-बस कर्न दिंवची सजा कांय उत्रांवची न्हय. हांकाय बूद ना आनी हांका तो हजारांनी-लाखांनी दिंवचांक कशीय ना. पूण ह्या दुडवाच्या गर्वान हो भोंगोसतोळ कर्चो कोणाच्या सुखाक म्हळ्ळें सर्वेस्पर देव सयत नेणासतलो.

आन्सिटा ओशीन डिसोज मूड‌बेळ्ळेचें एक कोंकणी तालेंत, बोळीयेच्या फिर्गज पत्राचेर बरवंक सुर्वात करून उपरांत नेमाळ्यांनी तवळ तवळ लेखनां, कविता बरवन आयलां. बी.कोमांत धावें रेंक हिणें आपणायलां, सां.लुवीस कोलेजिच्या कोंकणी संस्थ्याथावन कोंकणिचेर स्नातकोत्तर डिपलोमा आपणायलां, सी.ए.(चार्टर्ड एकौंटेंट) जावन ’डेलोयट’ कंपणेंत काम कर्न आसा. हिचें पयलें कवितेचें पुसतक ’ताळो’ हेच वर्सांत लोकार्पण जाला. बाय आन्सिटा थावन कोंकणी साहितीक शेतांत बरो फुडार आशेतां.

[कविता] सोभाणां (- आन्सिटा ओशीन डिसोज)

सोभाणां

विशाल दर‍याच्या तडीर,

कार‍याची एक मांची सोभता;

शांत निश्शब्द तळार,

ब्यांडा वाजपाचो नाद गाजता;

आपल्यांचेंच सालांतलें कार‍यें लेकिनासतां,

‘बीच सैडा’च्या सोभाणाक लोक पावता;

संसकृती माणसुगी देकानासतां,

‘वेसटर्न’ पोदांच्या ताळाक नाचता;

कसलो अलंकार, कसलें आडंबर,

काऱ्यें निर्वाहक‌च लाखांनी व्हर‍ता;

यथेषट जेवाण, मार्गायेचें पीवन,

लोक धादोशी, ताळियो पेटता;

सालांत चल्ता काऱ्यें दसतुरे प्रकार,

बीचांत ’इवेंट प्ल्यानरा’चेंच कार‍बार;

फुडलें जोडें संतोसान घराशीं मेटां काडता,

दऱ्या देगेचें, संभ्रमान बोंगल्याक चल्ता;

सव्या म्हयन्यांत मध्यम जोडें,

दऱ्या वेळेर मधूर घडियो खर्चिता,

तेच रेवेर लगीन जाल्लें गिरेस्त जोडें,

कोडती सालांत वेगळाचाराक झगडता!

-  आन्सिटा ओशीन डिसोज [एप्रील, २०२५]

आन्सिटा ओशीन डिसोज: मूड‌बेळ्ळेचें तालेंत, बोकोमांत रेंक आपणायलां, सां.लुवीस कोलेजिच्या कोंकणी संस्थ्याथावन पिजी डिपलोमा करून चार्टएर्ड एकौंटेंट जावन ’डेलोयट’ कंपणेंत काम कर्न आसा. फिर्गज पत्रांनी सुर्वात करून कोंकणी नेमाळ्यांनी सयत लेखनां, कविता बरंवचा हिचें पयलें कवितेचें पुसतक ’ताळो’ पर्गटलां.