ಸೆವಾ (-ಸಂಧೇಶ್ ಶ್ರೀಕಾಂತ್ ಭಾಂದೇಕರ್)

[ಕವಿತಾ]  ಸೆವಾ  (-ಸಂಧೇಶ್ ಶ್ರೀಕಾಂತ್ ಭಾಂದೇಕರ್)

ಹಿ ಆಯ್ಚ್ಯಾ ಕಾಳಾಚಿ ಆಮ್ಚ್ಯಾ ಸಮಾಜೆಂತ್ ದಿಸ್ಚಿ ಸೆವಾ. ಜಾಂವ್ ತಿ ರಾಜಕೀಯ್, ಸಮಾಜಿಕ್ ವಾ ಹೆರ್ ರಿತಿಚಿ ಪುಣ್ ಜೆದ್ನಾಂ ಅಪ್ಣಾಕ್ ಫಾಯ್ದೊ ವಾ ಅಪ್ಣಾಕ್ ಮುನಾಫೊ ಮೆಳ್ತಾ ತೆದ್ನಾಂ ಮಾತ್ರ್ ಥಂಯ್ಚರ್ ಉದೆತಾ ಸೆವಾ. ವಿಡಂಬನಾತ್ಮಕ್ ರಿತಿನ್ ಪುಣ್ ಸುಟಾವೆಂ ಸಬ್ಧಾಂನಿ ಕವಿನ್ ಹಾಂಗಾಸರ್ ಸಾಂಗ್ಚೆಂ ದಿಸುನ್ ಯೆತಾ.

ಕವಿ ಸಂಸೇಶ್ ಭಾಂದೇಕರ್ ಏಕ್ ಕೊಂಕಣಿ ವಾವ್ರಾಡಿ ತಶೆಂಚ್ ಕವಿ ಜಾಲ್ಲ್ಯಾನ್ ತಾಚಿ ನದರ್ ಹ್ಯಾ ಸಂಗ್ತೆಂಚೆರ್ ಗುಂಡಾಯೆನ್ ಆಸ್ಚಿ ಹ್ಯ ಕವಿತೆಂತ್ ದಿಸುನ್ ಯೆತಾ. ಹ್ಯಾ ಕವಿತೆಚೊ ಸ್ವಾದ್ ಚಾಕುಂಕ್ ತುಕಾಚ್ ಉಲೊ ದಿತಾಂ.

[ಕವಿತಾ] ಸೆವಾ  (-ಸಂಧೇಶ್ ಶ್ರೀಕಾಂತ್ ಭಾಂದೇಕರ್)

ಸೆವಾ

ಖಾವುಕ್ ಮೆಳ್ಚೊ ಸಗ್ಳೊ ಪೈಶ್ಯಾ ಮೆವಾ

ಮ್ಹಣ್ ಕರೂಕ್ ಸುಟ್ಲಾ ತುಮಿ ಜನ್ ಸೆವಾ

ಮಾಗೀರ್ ತುಮ್ಕಾ ರಾಜ್ಕಾರಣಾಚೀಚ್

ಜಾಯ್ ಕೀತ್ಯಾಕ್ ತಿ ಹವಾ ?

ಆವಾಳೊ ದಿವ್ನ್ ಘೆವ್ಚೊ ಕುವಾಳೊ

ಹೊತ್ತ್ ತುಮ್ಗೆಲೊ ರಾಜ್ಕೀಯ್ ಸುವಾಳೊ

ಜಶ್ ಕಿತೆಂ ತುಮಿ ಭಾಸಯ್ತಾತ್

ಆಸ್ ತುಮ್ಚೆರ್ ದೆಶಾಚೊ ಭಾರ್ ಸಗ್ಳೊ

ಗರೀಬಾಲ್ ತುಮಿ ಮ್ಹಣ್ತಾತ್ ತಾರ್ಣಹಾರ್

ಆತ್ ಯೆತ್ ತುಮ್ಕಾಂ ತೆಮ್ಗೆಲ್ ಕೈವಾರ್

ಹೆತ್ತ್ ತುಮ್ಕಾ ಕಶ್ ಯಾದ್ ಜಾತಾ

ಪ್ರತ್ಯೆಕ್ ನಿವ್ಡಣೂಕಿ ವೆಳಾರ್ ?

ಕರ್ಚಿ ಆಸ್ಲ್ಯಾರ್ ತುಮ್ಕಾಂ ಜನ್ ಸೆವಾ

ಪಯ್ಲಿ ಗರೀಬಾಲ್ ಆಶಿರ್ವಾದ್ ಘೆಯಾ

ದಲಿತಾಗೆರ್ ಜೆವ್ಲೆ ದಲಿತಾಗೆರ್ ರಾವ್ಲೆ

ದಾಖೊವುಕ್ ಹೆ ಸಗ್ಳೆಂಂ ಪೆಪ್ರಾರ್ ಆಯ್ಲೆಂ

ದೆಶ್ಸೆವಾ ಕರ್ತಲೆ ಥೊಡೆತ್ ರಾವ್ಲಾತ್

ಬಾಕಿ ಸಗ್ಳೆ ಪೈಶ್ಯಾಕ್ ಆಶೆಲಾತ್

ನೊಟ್ ಘೆಯಾತ್ ಆನಿ ವೊಟ್ ದಿಯಾತ್

ಹೆತ್ತ್ ತೂಮಿ ಸಾಂಗ್ತೆ ಸುಟ್ಲಾತ್

ಲಾಗ್ಲಾ ತುಮ್ಕಾಂ ದುವಾಳೆಂ ಪಕ್ಷಾಂತರಾಚೆಂ

ಜಾಯ್ನ್ ಕೀತೆಂ ಮಾಗೀರ್ ಮತ್ದಾರಾಲೆಂ

ಕಾಲ್ಚೊಂ ಶತ್ರು ಆಯ್ಚೊ ಮಿತ್ರ್

ಹೆತ್ತ್ ಜಾಲಾ ಆತಾ ಲೊಕ್ಶಾಹೀಚೆ ಚಿತ್ರ್

- ಸಂಧೇಶ್ ಶ್ರೀಕಾಂತ್ ಭಾಂದೇಕರ್. [ದಸೆಂಬ್ರ್, 2019]

ಸಂಧೇಶ್ ಶ್ರೀಕಾಂತ್ ಭಾಂದೇಕರ್: ಗೊಯಾಂ / ಕಾರ್‌ವಾರ್‌ಚೊ ಉದೆವ್ನ್ ಯೆಂವಚೊ ಕವಿ. ಕಾಣ್‌ಯೊ, ನಾಟಕ್, ಲೇಕನಾಂ ಬರವಪಿ. ಎದೊಳ್‌ಚ್ ಸಭಾರ್ ಕವಿತಾ ಸ್ಪರ್ಧ್ಯಾಂನಿ ಇನಾಮಾಂ ಹಾಣೆಂ ಅಪಣಾಯ್ಲ್ಯಾಂತ್ ತಶೆಂಚ್ ಕವಿಗೋಶ್ಟಿಂನಿ ವಾಂಟೊ ಘೆತ್ಲಾ.