ಕವಿತಾकविताPoem

Sancho Moddttona (- Shailendra Mehta)

[Kovita] Sancho Moddttona (- Shailendra Mehta)

Ek somaz mhonntoch tantun dadlo toxench osturi dogank sthan-man asunk zai: hem pustokamni amkam vachunk mellchem veakhean. Punn hokigotent hem kitlem sot? aichea somajent eka osturik kitlexeo bondoddeo’ zamv dharmik, zamv samajik va her punn heo bondoddeo asat kiteak? hea bondeddent somajen tthorayil'lea nemam prokar jiemvvem ani eka pinjreant suknnem jiemvche modhem kaim tofaut asakai? ek opurbhayechem osturivad chintpak gheun aila Bab Shailendra Mehta.

Konkonnint bab Shailendra Mehta-cheo kovita eka vixixtt vorgacheo zaunko tachem vachop toxench odhyoin karonn mhonn taka lagxilean ollkonche somzotat. Tachea kovitemni utranchi ras na, pras-olonkaracho bhoro na, punn opurbhayechem voicharik chintop asa. Ek vauraddi (Activist), chintpi, vimorxok zaunascho ho uprant ’kovi’ zaunasa dekun tachi dorek kovita obheas‌yogy zaunasa mhonncheak hi kovita govai dita. Bakichem parkunk tukach ulo ditam.

[Kovita] Sancho Moddttona (- Shailendra Mehta)

Sancho Moddttona

Tamnni mhaka soroll cholpak sanglem,

Odrixy hatamni kaddil'lea ollimbhitor,

Bospak boksa bhitor, veusthit ani nivll,

Punn mhojea pamyank vankddea margachi tollmoll axil'li,

Zom-i fultalim ranfulam ruddhivadachea khachim'modim.

Tamnni mhonnlem mhozo avaz soumy asunk zai,

Konddeanchea ranantlean vhamvpi vareavori,

Punn hamve to vaddoilo vadlla bhoxen,

Nixchol hoveadd ek hunkar,

Purvil'lea zhaddanchim panam halounk

jim rauleant ubim chodd kall mounant.

Tamnni mhaka sanglem tanche rong nhespak ,

Itihasachea kapddant chhapil'le

Punn hamve rongoili mhoji kat novea rongamni ,

Sureast ani dorea hanchekoddlean rinnan ghetil'lea,

Ani tea dolleantlea ujeakoddlean

Je kortat dhaddos kxitiza poltoddim polloupachem.

Tankam hamv lhanoch raupak zai axil'lem,

Pakham gutthlaun ghontterant goneatache surkxent,

Punn hamvem tim pakham rund patllailim,

Xokyotayechem varem polloun,

Ani gelem uddun saulli soddun.

Tamnni kaddil'leo olli zatat fikeo ,

Tanche futfutopi avaz zatat chodd motte,

Punn dhoiryount ditat nhoikar tanche bondkhonnint raupak.

Hamv tanche poromporechi beriz nhoi;

Povea fantoddecho ujvadd haddpi ujea kitt hamv.

- Shailendra Mehta [February, 2026]

Shailendra Mehta: Namnecho kovi, onkonnokar ani sahityik vixlexok. Sisifos Teng‌xer, Vixon‌vasantlo Bhomvddekar (Nirvasit Yatrichi Bhomvddi) hachim don kovitasongroh nagorint toxench kon'noddo lipint porgottleant. ’Sisifos Teng‌xer’ pustokak 2020 isvent vixv konkonni kendrocho Vimala V Pai. Founddexonacho puroskar labhla. ’Nirvasit Yatrichi Bhomvddi’ pustokak Denis Dcunha smarok Ashawadi Prakashan-acho utkrixtt lipyontor pustok puroskar labhla. Poinnaricher ’Kovi ani Hokk-Man’ kovitechem onkonn hannem choloilam. Prostut Gõyant vosti korun asa ani ’Varnamudra’ troimasik potrikecho sompadok zaunasa.

Comments

No comments yet. Be the first to say what you thought of it.

Leave a comment

Write in Kannada, Nagari or Romi, whichever you like. He reads every comment before it appears here, so yours will not show straight away. Your name is printed above it.

Your name

Your comment

0 of 2,000 characters

Only your name and your comment are kept - no email address. They stay on the site until he removes them; to have yours taken down, write to him through the contact form and say which one. Privacy.

Author

Shailendra Mehta

Zolm': Ponnji
Mullave xikxonn vaglle haiskul mongexi, tache uprant sorkari uchch madhyomik videaloi ani dhempe kolez, ponnji. Uprant mumboi videapitthachi totvoginean vixeantani gova videapitthachi rajyoxastr ani lettin omerikon sttoddiz vixeamni podvyut'tor podvi. 1980 chea doskant videarthi, kamgar ani Konkani cholloullini sokriy.
Konkani, moratthi, inglejh bhaxantlean kovita, lekh, nattyoporikxonn, nibond, sod nibond, mulakhoti toxench sthaptyoxastr, ddizhain, hostokola, somazoxastr, rajyoxastr oxea vingddovingodd vixeamveli borpaull thollavea, raxttri-i ani antororaxttri-i nemalleani sat'tean ujvaddak yet asa.
Goa videapitthachea Konkani vixvokox proklpant sonxodhon sohaik: 3 vorsam
Goan Viklicho Sompadok: 1 vors
Gomontok Times Nemalleant Potrokar: 5 vorsam
Fr.Agnel College, Pilar Hanga Rajyoxastr Vixeacho Veakheata: 6 vorsam
Gelim 26 Vorsam choddso Mumboi rabito.
'inddeks fornichor zornol ' hea antororaxttri-i nemalleachem 20 vorsam sompadon,
'mai monttor'(3 vorsam) hea inglejh ani 'songram'' (7 vorsam) hea moratthi nemalleachem sompadon
Gomontok ttiuhi hea chenlacho maji sol'lagar sompadok: dedd vors
Poinnari.com Sohsompadk: 2020 Saun
Sompadok: Vornnomudra, Konkani sahityik tin mhoineallem 2024 saun
Ujvaddoil'lem Sahity:
1. Sisifos tengxer: Konkani kovitasongroh
2. Mukt chinton: nibond songroh (Konkani)
3. Obhizat: somvsarik sahiteacher moratthi nibondh songroh.
4. Vijnovasantolo bhounddekor: Konkani kovitasongroh
5. Ximepolotoddochem daiz: kothasongroh (16 somvsarik kothancho Konkanint onnkar)
6. Mukt monthon: nibond songroh (Konkani)
7. Mumboicho vepari: ke ji mol'lea hanche kadomboricho Konkani onnkar
8. Algoridomachea vixvant: kovita songroh (Konkani)
9. Pleg: alber kamyuche french kadomboricho Konkani onnkar
10. Goveatil porxuram' kotha vo brahmonni itihasolekhon: moratthi

Fuddem Yeupi Prokaxonam:
1. Okxor: nibond songroh (purvil'lea te modhyoyugamerenchea namnechea sahity rochnnukanchi molaunni) (moratthi)
2. Osvosth vortoman: kovita songroh (moratthi)
3. Pordesantolim fulam: 60 somvsarik kovincher ttipnnam anni tanchea kovitanche onnkar (Konkani)
4. Kotha porikroma: vis somvsarik kothancho moratthi onnkar
5. Osmanoteadd bondd: periar (Konkani)
6. Soundryoxastr ani Konkani sahity
7. Kallkhantolem rong ani her kotha: Konkani kothasongroh
8. Against the Silence: Poetry collection in English
9. Mocking the Mundane: Collection of Essays in English
10. The Parashuram Myth and Brahminical Historiography in Goa (English)
11. Olpakxor: kothnam ani kounam (Konkani)
12. Arvil'lea vicharovixvantole bonddkhor: 10 chicharount ani tanche vichar (Konkani)
13. Srizonosomvosaracho harso: somvsarik sahiteacher nibond (Konkani)

Lipeantoronn Zal'lim Pustokam
1. Sisifos tengxer: Konkani kovitasongroh (kon'nodd)
2. Nirvasit yatrichi bhounddi (kon'nodd)

e-Books
Sisifos Tengxer: Konkani Kovitasongroh (2021)

• 100 poros chodd vingodd vingodd ontororaxttri-i ani bharti-i bhaxantlea kovitancho Konkanint onnkar.
• poinnari onkachea kovi hokk ani man, mhoineacho kovi bhouman mellil'lea kovitancher porikxonnam

Puroskar:
Sisifos Tengxer (kovita songroh):
• Konkani okademicho rajy Puroskar (2018)
• Konkani bhaxa monddllacho rok barretto Puroskar (2018)
• Vishwa Konkani Kendrancho Vimala Pai Puroskar (2021)
Mukt Chinton (Nibondh Songroh):
• Konkani okademicho rajy Puroskar (2024)
Mubomycho Vepari (Onnkar):
• Konkani Bhaxa Monddllacho Puroskar (2024)
Nirvasit Yatrichi Bhounddi
• Ashawadi Prakashanacho Denis Dcunha Smarok Kannad Lipeantoronn Puroskar (2025)

All 9 pages by this writer