ಕವಿತಾकविताPoem

रडानाका इश् (- वल्ली क्वाड्रस)

[कविता] रडानाका इश् (- वल्ली क्वाड्रस)

संसारांत भगुंक आसचें भोव व्हड दूक म्हळ्यार मरण. अपलें मरण न्हय पूण अपल्य मोगाच्या मनशाचें, इश्टाचें मरण. देकून ह्या मरणाचेर खूप राग तसोच कांठाळो येता हें चिंतून, ह्या मरणान कोंकणी शेतांतल्या एका उर्भेसत मनशाक वेलें. आतां उतरां सुकल्यांत. ताळो ना जाला, कितेंय उरलां तर यादी. १ माय २०२० वेर आमकां समेसतांक सांडून गेल्ल्या बाब नित्य नायकाच्या अत्म्याक शांती मागून ताच्या दुकेसत कुटमाक भुजयतांव.

[कविता] रडानाका इश् (- वल्ली क्वाड्रस)

रडानाका इश्टा

तुजेथावन पयस हांव वचुंक ना

जेदना पऱ्यांत तूं

सावळी दितेल्या रुकाक

नाच नाच्च्या मोराक

सात रंगाच्या धोण्वाक

पाचव्या रंगाच्या धर्तेक पळेताय

हांव तांतून तुका दिसतलों

रडानाका इश्टा

तूं म्हाका आयकनासतां उर्चोनांय

जेदना पऱ्यांत तूं

चिली पिली सुकण्यांक

दऱ्याच्या ल्हारांक

वाऱ्याच्या गाजाक

काळजाच्या ताळ्याक आयकताय

तूं तांतून म्हाका आयकतलोय

रडानाका इश्टा

हांवें तुका अधेवस मागुंक ना

जेदोळ पऱ्यांत तूं

कोंकणी माती फुलयताय

कोंकणी भास उलयताय

कोंकणी सुवास पाचार्ताय

तेदोळ पऱ्यांत हांव

संतोसान तुजेसवें आसतलों

देकून इश्टा आतां

रडानाका इश्टा, रडानाका..

- वल्ली क्वाड्रस. [माय, २०२०]