ಪ್ರಥಮ್ ಸ್ವತಃಕ್ ಸಮಜ್ (- ಇಂದು ಗೇರ್‌ಸಪ್ಪೆ)

[ಕವಿತಾ] ಪ್ರಥಮ್ ಸ್ವತಃಕ್ ಸಮಜ್ (- ಇಂದು ಗೇರ್‌ಸಪ್ಪೆ)

ಕವಿತಾ ಮ್ಹಳ್ಯಾರ್ ಸಬ್ಧಾಂಚಿ ಮೆಳಾವಣ್ ವಾ ಉತ್ರಾಂಚಿ ಭಾಂದಾವಳ್ ಮ್ಹಣುನ್ ಬರಯ್ತೆಲ್ಯಾಂನಿ ಹಿ ಕವಿತಾ ಪರತ್ ಪರತ್ ವಾಸ್ಚಿ. ಕವಿತಾ ಮ್ಹಳ್ಯಾರ್ ಹವ್ಯಾಸ್ ನ್ಹಯ್, ತಿ ಏಕ್ ಜವಾಭ್ದಾರಿ, ಜಶೆಂ ಎಕಾ ಘರಾಂತ್ ಏಕ್ ಅಸ್ತುರಿ ತ್ಯಾ ಘರ್ಚೆಂ ಕಾಮ್ ಕರ್ಚಿ ಜವಾಭ್ದಾರಿ ಘೆತಾ ತಶಿ. ಹಾಂಗಾಸರ್ ಹೆರಾಂಕ್ ಸಮ್ಜಾಂವ್ಕ್ ವೆಚ್ಯಾಧಿಂ ಪಯ್ಲೆಂ ಸ್ವತಾಃ ಸಮ್ಜುಂಚಿ ಭೋವ್ ಗರ್ಜೆಚಿ.

ಬಾಯ್ ಇಂದು ಗೇರ್‌ಸಪ್ಪೆ ವೃತ್ತೆನ್ ಶಿಕ್ಷಕಿ ಜಾವ್ನ್ ಖೂಪ್ ಜಿಣ್ಯೆ ಅನ್ಭೋಗ್ ಜೊಡ್ಲಲಿ ಕವಿ. ಹೆರ್ ಭಾಸೆಂನಿ ಸಯ್ತ್ ಹಿಣೆಂ ಬರಯ್ಲಾಂ ಹೆರ್ ಭಾಸೆಂತ್ಲೆಂ ಹಿಣೆಂ ವಾಚ್ಲಾಂ ಮ್ಹಣುನ್ ಹಿಚ್ಯಾ ಕವಿತೆಂನಿ ಕಳುನ್ ಯೆತಾ. ಹ್ಯಾ ಕವಿತೆಚಿ ತಾಂಕ್ ತಶೆಂಚ್ ಸೊಭಾಯ್ ಪಳೆಂವ್ಕ್ ಆತಾಂ ತುಕಾಚ್ ಆಪವ್ಣೆಂ ದಿತಾಂ.

[ಕವಿತಾ] ಪ್ರಥಮ್ ಸ್ವತಃಕ್ ಸಮಜ್ (- ಇಂದು ಗೇರ್‌ಸಪ್ಪೆ)

ಪ್ರಥಮ್ ಸ್ವತಃಕ್ ಸಮಜ್

ಕಸ್ಲೆಂ ಜಾಲ್ಲೆಂ ಮಾನವ್ಜಾತೀಕ್?

ಕಸ್ಲ್ಯಾಕ್ ಅಶ್ಶಿ ಜೀವ್ ಅಸ್ವಸ್ಥ್?

ಮನ್ ಮೆಲ್ಲೆವಾರಿ?

ಕಸ್ಲ್ಯಾಕ್ ಯಶ್ ಮೆಳ್ನಾ?

ಜೀಣೆಚೊ ಅರ್ಥ್ ಕಳ್ನಾ?

ಆಯುಶ್ಯ್ ಖರ್ಚಯಿಲೆಂ ಭಾಯ್ರ್ ಜ್ಞಾನ್ ಸೊದ್ದುನು

ಪ್ರಥಮ್ ಸ್ವತಃಕ್ ಸಮಜ್

ತರಿ ಜಗ್ ಸಮ್ಜತಾ,ಜನ್ ಸಮ್ಜತಾ

ಖರೆಂ ಜ್ಞಾನಾಚೆಂ ಮೂಳ್ ಆತ್ಮಸಂಶೊಧನ್

ಆಸ್ಸಂ ತರಿ ಕಸ್ಲೆಂ ಹ್ಯಾ ಮನಾಂತು?

ಅನೆಕ್ ವಿಚಾರಾಂಚೊ ಘುಸ್ಪಾಗೊಂಧಳು

ಭಿತ್ತರಿ ಭಾವ್ನಾಂಚೊ ಉಚಾಂಬಳು

ಚಿರ್ಡೂನ್ ದವ್ರ್ಲ್ಯಾಂ ಮತ್ ಮಾಹಿತೀಚೊ ಖವ್ದಳು

ಯೆದೆಶೆ ಮಾಥ್ಯಾಂತು ಇತ್ಲೆಂ ಚಕ್ರೀವಾದಳ್?

ಹೆಂಚಿ ಮಗೆಲೆಂ ಅಸ್ತಿತ್ವ್?

ಸೊದ್ತಾಂ ವಾದ್ಳಾಚೆಂ ಕೆಂದ್ರಬಿಂದು

ಆನಿಕಯ್ ಭಿತ್ತರಿ ಮನಾ ಗಾಭ್ಯಾಂತು

ಆನಿ ಮೆಳ್ತಾ ಅಪ್ರೂಪ್ ಸ್ಥಳ್

ಶಾಂತ್ ನಿವಾಂತ್ ಅಚಳ್

ಆಯುಶ್ಯಾಂತು ಸೊದ್ಲೆಂ, ತೆಂ ಹಾಂಗಾ ಆಸ್ಸ್ ಸಗ್ಳೆಂ

ವಿಶಾಲ್ ವಿಶ್ವಾಚಿ ಗತಿ

ಚೈತ್ನ್ಯಾಚಿ ಅಸೀಮ್ ಸಂಪ್ತ್ತಿ

ವಿಶ್ವಾಚೊ ಎಕ್ ಸೂಕ್ಷ್ಮ್ ಅಂಶ್ ತುಂ

ತರೀಅನ್ನ್ಯ್, ಅದ್ವಿತೀಯ್

ಆಕಾಶಾಂತು ಝ್ಗಝ್ಗಿ ಶಲಾಖಾ ಜಾವ್ನು

ವಾಟೆರಿ ನಕ್ಷತ್ರಾಂ ಝಡಯ್ತ್ ವಚ್

ಜಾಗೃತ್ ಜಾ

ಪ್ರಾಮಾಣಿಕ್ ಜಾ

ಸಂಪೂರ್ಣ್ ಸಮರ್ಥ್ ಜಾ.

-  ಇಂದು ಗೇರ್‌ಸಪ್ಪೆ. [ಎಪ್ರಿಲ್, 2023]

ಇಂದು ಗೇರ್‌ಸಪ್ಪೆ: ವೃತ್ತೆನ್ ಶಿಕ್ಷಕಿ ಜಾವ್ನ್ ವಾವ್ರ್ ಕೆಲ್ಲಿ ಬಾಯ್ ಇಂದು ಮುಂಬಯ್, ಕೊಲ್ಕತ್ತಾ, ಬೆಂಗ್ಳುರ್ ಅಶೆಂ ಸಭಾರ್ ವಠಾರಾಂನಿ ಜಿಯೆವ್ನ್ ಆಯಿಲ್ಲಿ. ಚಿತ್ರಾಪುರ ಸಾರಸ್ವತ್ ಬ್ರಾಹ್ಮಣಿ (ಸಿ.ಎಸ್.ಬಿ) ಬೊಲಿಚ್ಯಾ ಕೊಂಕಣಿಂತ್ ಕವಿತಾ ಬರಂವ್ಚಿ ಬಾಯ್ ಇಂದು ಗೇರ್‌ಸಪ್ಪೆ ಖೂಪ್ ಜಿವಿತಾ ಅನ್ಭೋಗಾಚಿ ಕವಿ. ಆಯ್ಲೆವಾರ್‌ಚ್ ಕವಿತಾ ಟ್ರಸ್ಟಾಚ್ಯಾ ರಾಶ್ಟ್ರೀಯ್ ಮಟ್ಟಾಚೊ ಕವಿತಾ ಪುರಸ್ಕಾರ್ ಹಿಕಾ ಲಾಭ್ಲಾ. ಕನ್ನಡ್, ಇಂಗ್ಲಿಶ್ ಭಾಸೆಂನಿ ಸಯ್ತ್ ಹಿ ಬರಯ್ತಾ. ಸಭಾರ್ ಕವಿಗೋಶ್ಟಿಂನಿ ಇನಾಮಾಂ ಜಿಕ್ಲ್ಯಾಂತ್. ಹಿಚ್ಯಾ ’ಸಂಕಲ್ಪ್’ ಕವಿತೆಚ್ಯಾ ಪುಸ್ತಕಾಕ್ ಗೊಂಯ್ಚಿ ಕೊಂಕಣ್ ಭಾಶಾ ಮಂಡಳಿಚೊ ಪುರಸ್ಕಾರ್ ಲಾಭ್ಲಾ.