ಪಿಶೆಂಪಣ್ [ಬಾಲಕೃಷ್ಣ ಮಲ್ಯ]

ಹ್ಯಾ ಸಂಸಾರಾಂತ್ ಜಿಯೆತಲೊ ಹರೇಕ್ ಮನೀಸ್ ಏಕ್ ನ್ಹಯ್ ಏಕ್ ಪಿಶೆಂಪಣ್ ಪಾಂಗ್ರುನ್ ಯೆತಾ, ಅಪ್ಲೆಂ ಪಿಶೆಂಪಣ್ ಜೆದ್ನಾಂ ಜೆರಾಂಚ್ಯಾ ಜಿವಿತಾಕ್ ಕುರಾಡ್ ಘಾಲ್ತಾ ತೆದ್ನಾಂ ಉಭ್ಜತಾ ’ಗೊಂದೊಳ್’, ಅಪ್ಲೆಂ ಸ್ವಪಾಣ್ ಜಿಯೆಂವ್ಕ್ ಸರ್ವಾಂಕ್ ಹಕ್ಕ್ ಆಸಾ ಖರೆಂ ಪುಣ್ ಅಪ್ಲ್ಯಾ ಸ್ವಪ್ಣಾಕ್ ಲಾಗುನ್ ಹೆರಾಂಚೆಂ ಸ್ವಪಣ್ ಮಸ್ತುಂಚೆಂ ಹಕ್ಕ್ ಕೊಣಾಯ್ಕ್‌ಯೀ ನಾ. ಪುಣ್ ಮನ್ಶಾಕ್ ಚಿಂತುಂಕ್ ವೇಳ್ ನಾ, ಹ್ಯಾ ವೇಳ್ ನಾತ್‌ಲ್ಲ್ಯಾ ಘಡಿಯೆ, ಅಪ್ಣಾನ್ ಕರ್ಚ್ಯಾ, ಕರುನ್ ಆಯಿಲ್ಲ್ಯಾ ವಾ ಕರುಂಕ್ ಚಿಂತ್ಚಾ ಸಂಗ್ತೆಂಚೆರ್ ನಿಯಾಳುಂಕ್ ಸಯ್ತ್ ವೇಳ್ ನಾತ್‌ಲ್ಲ್ಯಾ ಸಂಧರ್ಭಾಚೆರ್ ಕವಿಚಿಂ ಮೊಲಾದಿಕ್ ಉತ್ರಾಂ ಸಯ್ತ್ ಪಿಶೆಂಪಣ್ ಮ್ಹಣ್ ಲಾಗ್ತಾತ್. ಹೆಚ್ ಅಪುರ್ಭಾಯೆಚ್ಯಾ ಆಟೊವಾಕ್ ಗುಟ್ಲಾಯಿಲ್ಲಿ ಕವಿತಾ.

ಬಾಬ್ ಬಾಲಕೃಷ್ಣ ಮಲ್ಯ ಕೊಚ್ಚಿಚೊ ನಾಮ್ಣೆಚೊ ಯುವಕವಿ, ಆಯ್ಲೆವಾರ್ ಅಖಿಲ್ ಭಾರತೀಯ್ ಹಂತಾರ್ ಆಸಾ ಕೆಲ್ಲ್ಯಾ ಕವಿತಾ ಬರಂವ್ಚೆ ಸರ್ತೆಂತ್ ಇನಾಮ್ ಸಯ್ತ್ ಆಪ್ಣಾಯಿಲ್ಲೊ ಕವಿ. ಹ್ಯಾ ಕವಿತೆಚಿ ಬೊಲಿ ಕೊಚ್ಚಿಚಿ ಜಾಲ್ಲ್ಯಾನ್ ಥೊಡಿಂ ಉತ್ರಾಂ ಸಮ್ಜುಂಕ್ ತ್ರಾಸ್ ಘೆಂವ್ಕ್ ಪಡ್ತೆಲೆಂ. ವೆವೆಗ್ಳ್ಯೊ ಬೊಲಿಚ್ ಕೊಂಕಣಿಚಿ ಸೊಭಾಯ್ ಜಾಲ್ಲೆನಿಮ್ತಿಂ ತಿ ಆಸಾ ತಶಿಚ್ ವಾಚ್ಪ್ಯಾಕ್ ದಿಲ್ಯಾ. ಬಾಕಿಚೆಂ ಸರ್ವ್ ತುಜೆರ್ ಸೊಡ್ತಾಂ.

[ಕವಿತಾ] ಪಿಶೆಂಪಣ್ [ಬಾಲಕೃಷ್ಣ ಮಲ್ಯ]

ಪಿಶೆಂಪಣ್

ಆಯ್ಕೀಲೆಂ ತುಮಿಂ ಸಗ್ಳಂ ಪಿಶೆಂಪಣ್

ಜಾಲಿಂ ತುಮೀಂಯಾತಾಂ ಪಿಶಾಚಿಂ

ಕವಿತೆನ್ ಹಾಂವ್ಯ್ ಸಾಂಗ್ತಾಂ ಪಿಶೆಂಪಣ್

ಮನಾಂ ಕೆನ್ನಾಯ್ ತುಮಿಂ ದವ್ರಾಚಿ

ಆಠೆಶ್ಯಾತ್ ಕವಿತೆಂತು ಆಪಣ್

ಸಂಗ್ಲ್ಲಿಂ ಕೈರೀಂಯಾಸಯ್ ಬುದ್ಧೀಯೆಚಿಂ

ಸಗ್ಟಾನ್ ಸಾಂಗಿಲ್ಲ್ಯಾವರಿ ಪಣ್

ಸ್ವಲ್ಪ್ ಭಿನ್ನ್ ಹ್ಯಾ ಮಿಗೆಲೆವರೀಚಿ

ಕಿತೀಯಾಸಾ ಹಾಂತು ವೆಗ್ಳೆಂಪಣ್

ಕರುಂ ಕಿತ್ಯಾ ಝಗ್ಡಿಂ ತರ್ಕಾಚಿಂ ?

ಲ್ಹವು ಉಲ್ಲೊ ಜಾತಾ ಗೊಂದೊಳಪಣ್

ಆಮಿಂ ಜನ್ಮಾನ್ ಮು ಥೆಟ್ ಪಿಶಾಚಿಂ

ಆಜಿ ವಾಯ್ಟ್ ಲಾಗ್ತಾ ಖರೆಂಪಣ್

ಖರೆಂ ವಾಯ್ಟ್ ದಿಸ್ತಾ ಮ್ಹಾಕಾಚಿ

ಲೊಕಾಂತು ಕೆನ್ನಾಯ್ ರಾಬ್ತಲೆ ಮ್ಹಣ್

ಸಾಂಗ್ತಾಯ್ ಆಮಿಂ ಕೈರಿಂ ವ್ಯರ್ಥಾಚಿಂ

ವೆಳು ಧಾವಂಚೆ ಭೊ ವೆಗಾಚೆ ಕಾರಣ್

ಚಿಕ್ಕ್ ಘಡೀಕ್ ನಾ ಕೊಣಯ್ ರಾಬ್ತಾಚಿ

ಮಾಗೀರ್ ಪಾವ್ಲ್ ದವ್ರನು ಮ್ಹಾಂತಾರಪಣ್

ಆಸ್ ತವ್ಳೀಯ್ ನಾ ಸೊಡ್ತಾಯ್ ಮೊಹಾಂಚಿಂ

ಜೀಣಾಂ ವಾಚೀಲ್ಯಾ ತೂಂವೆಂ ದುಃಖಾಯ್ಣ್

ಪಳೆತಾ ಸುಖ್ ಸಪ್ನಾಂ ಸ್ವರ್ಗಾಚಿಂ

ಪುಣ್ಯ್ ನಾವಾಂತ್ ಎಕ್ ಮ್ಹಣ್ಚೆಂ ಅಡಾವ್ಣ್

ವೆಳು ಪೆರ್ ಘಾಲ್ಚ್ಯಾಂತು ನಾ ಮು ಕಷ್ಟಚಿ

ಚಾಂಗ್ ಬಲ್ಲಾವ್ ಕರ್ಮಾಂ ಕರಿ ತರ್ಪಣ್

ಸಂಕಾಳ್ ತುಂಟಯ್ ತುಂ ಬಂಧ್ಪಾಶಾಂಚಿಂ

ಸರ್ವಯ್ ಆಸೊಯ್ ತಿಂ ದೆವಾಕ್ ಸಮ್ರ್ಪಣ್

ಆಯ್ಕಾ ಪದಂ ಹಿಂ ಪಿಶೆಂಪಣಾಚಿಂ

- ಬಾಲಕೃಷ್ಣ ಮಲ್ಯ [ಅಗೊಸ್ತ್ 2018]

ಬಾಲಕೃಷ್ಣ ಮಲ್ಯ: ಕೇರಳಾಂತ್‌ಲ್ಯಾ ಕೊಚ್ಚಿಚೊ ನಾಮ್ಣೆಚೊ ಕೊಂಕಣಿ ಯುವ ಕವಿ, ತರ್ಜಣ್‌ಕಾರ್ ಆನಿ ಬರವ್ಪಿ. ಮಲಯಾಳಮ್, ತಮಿಳ್ ಭಾಸಾಂನಿ ಸಯ್ತ್ ಹಾಣೆಂ ಕಾಂಯ್ ಹಜಾರಾಂಚ್ಯಾಂಕೀ ಚಡಿತ್ ಕವಿತಾ ಬರಯ್ಲ್ಯಾತ್. ’ಜೀವ ಸಂಕಲ್ಪ (2013)’ ಹಾಚೊ ಎದೊಳ್ ಪರ್ಗಟ್‌ಲ್ಲೊ ಕವಿತಾಜಮೊ. ’ಸ್ವತಂತ್ರ ವಿಚಾರ್’ ಬೂಕ್ ವೆಗಿಂಚ್ ಪರ್ಗಟುನ್ ಯೆಂವ್ಚಾರ್ ಆಸಾ. ಸಭಾರ್ ಕವಿಗೋಶ್ಟಿಂನಿ ತಶೆಂಚ್ ಸಾಹಿತಿಕ್ ಶಿಭಿರಾಂನಿ ಹಾಣೆಂ ವಾಂಟೊ ಘೆತ್ಲಾ. ಮಲಯಾಳಮ್ ಭಾಸೆಚೊ ಬೂಕ್ ಸಯ್ತ್ ಹಾಣೆಂ ಪರ್ಗಟ್ಲಾ.