ಕವಿತಾकविताPoem

Oprup (- Urjita Bhobe)

[kovita] Oprup (- Urjita Bhobe)

Hea brohmanddant aschea dorek jivo, vostunk tachench mholl'llem khaxelemfonn asa. Jivo aschi opoli sokot ani svarthak lagun ekameka lhan-vhodd mholl'lle bhed korun miroita punn hokigotent dorekak oplich mholl'lli moroyad asta, mol asta ani tench chintop hea kovitechem mull chintop. Kovichem chintop mukar gel'leporinch itihas yeta, bougollik ginean yeta, monoxa totvachem chintop sogollem eka fattolean ek yevun monis mhollear hea brohmanddachoch ek konn asuyeta mholl'llem chintop hea kovitent udeta.

[kovita] Oprup (- Urjita Bhobe)

Oprup

hea somsarat oprup khoim asta?

chintunk gelear ozap dista

punn vigoneanachea panamni khellttolem

ek ottoll sot tuka mellttolem

okhondd hea bromhanddacho

konnan konn omor asta

osonkhy somvtsoram kitli yugam

hangachem sogllem urta hanga

eka kallavele jivo jivannu

tujeant asum yeta tanche onnu rennu

aiz tuje angar ji asa kat

onx tazo asum yeta pois ontrallant

eka tempar uddttalo zo

gorvan monis zaun

aiz tazo onx asot

khoim tori dhul'lan

aiz jem dista asot

ghoddye tuka vidrup

fattlea yugant asot

tich sobitokai oprup

bromhanddatolem noketr jem

sohsr yugam fattim

rostea konxak aiz tench

ghoddye dhul'l chatti

ken'na ken'na osoch vichar

monat chomkun vota

hozar vorsam fattlo onnu

kallzant mhoje asum yeta

sohsraudhi yugam poilim

zal'lo asot ulkapat

onx tazo aila asot

komb zaun bhumyem gorbhant

ghoddye ken'nai kil'lun yet

gheun divy to ujvadd

chomvrun yet dhortorecher

zaun ujvaddachem zhadd

bromhanddantolo pormannu ek

mhojey kuddicho bhag asot

dorea lhar khelltta asot

varea talar mhojech pasot

varem, uzo, udok

mollob ani dhortori

ekmekant bhorsot asat

ekjivo zal'leurim

dhortorevelea dor ek jivant

tare gire zaleat ekjivo

urjen fokot rup bodlolam

nirjivo zamv sojivo

bromhandd asa okhondd

dor ek jivo khaxelo

na konn hin na konn xrextth

ek oprup dor eklo

unne lekhit konnui tuka

fokot polloun rup

visru naka tum asa

bromhanddachem oprup

- Urjita Bhobe. [May, 2020]