Novem duyems (- Urjitha Bhobe)

[kovita] Novem duyems (- Urjitha Bhobe)

Sogollea somsarak bhiranten jieunko layil'le marekar dis khorech zaun sorovank bhirantiche. Hea thoddeach moineamni koxem sogollem bodlun gelam? hea bodolavannent grest mhonn na, dubllo mhonn na. Dudduch sogollem mhonnun patyeun jiel'lo monis soit duddvant kitench korunk sokanastam ascho kall ho. Hench chintop hea kovitechem.

[kovita] Novem duyems (- Urjitha Bhobe)

Novem duyems

kitlim moddim addvim poddleant

okhkhem zoguch oxant vibhrant

mhoji nodor dhumvrelea

mhaka fokot dista bhirant

poram ballank handdir marun

tim xar soddun votat gavant

disna tea poranchi nagddi kudd

korpotona rokhrokhit votant

ordokutti vonnot urlea

toxich mhojea magilodarant

mhoji nodor dhumvrelea

mhaka fokot dista bhirant

lok ghorant kideak raunat

pasyer kideak nhidtat

hanga thoim bhovun bhovun

khaupak kideak sodtat

jeunko khaunko mellna zalear

daram foddun ghusot ghorant

mhoji nodor dhumvrelea

mhaka fokot dista bhirant

xejra konnoi duyent poddlear

kallzant mhojea dhodd'dhoddotta

sonkott mhojer yena mum

hamv tench yeuzunk poddttam

mhaka mhojench poddlam atam

xejra kitloi yemv akant

mhoji nodor dhumvrelea

mhaka fokot dista bhirant

doya maya korunna mog

umalle soglle sun'n zaleat

aple fuddem konnoch disna

xiro soglleo mumyeleat

sonkott hem jen'nachean ailam

novem duyems zolmolam kallzant

bhirantichem duyems atanch zalam

kai sodanch aslem mhojea monant?

somsarar kedoi yemv samvar

dolle, kallzam, daram dhapat

svarthan nodor dhumvreta

mhaka sodanch dista bhirant

mhoji nodor dhumvreta

mhaka fokot dista bhirant

- Urjita Bhobe. [Jul, 2020]