ಮುನಾಫೊ ಆನಿ ಲುಕ್ಸಾಣ್ (- ಕಿಶೂ, ಬಾರ್ಕೂರ್)

[ಕವಿತಾ] ಮುನಾಫೊ ಆನಿ ಲುಕ್ಸಾಣ್ (- ಕಿಶೂ, ಬಾರ್ಕೂರ್)

ಹಿ ಕವಿತಾ ವಾಚ್ತಾಂ ಮ್ಹಾಕಾ ಕಾಂಯ್ ತೆಂಪಾಧಿಂ ಬರಯಿಲ್ಲ್ಯೊ ವಳಿ ಯಾದಿಂತ್ ಆಯ್ಲ್ಯೊ.

ತುಮಿ ಹೆಂ ಪಾವ್ಸಾಚೆಂ ಉದಕ್ ಮ್ಹಣಾ ಪುಣ್ ಹೆಂ ಉದಕ್ ಮ್ಹಜ್ಯಾ ದೊಳ್ಯಾಂತೂನ್ ದೆಂವ್ಲಲೆಂ.

ಆಯ್ಚ್ಯಾ ಸಮಾಜೆಂತ್ ಜಿಯೆಂವ್ಚೊ ಮನಿಸ್ ದೋನ್ ವರ್ಗಾಂತ್ಲೊ. ಪಯ್ಲೊ ’ಸಕ್ಕಡ್ ಬರೆಂ ಆಸಾ’ ಮ್ಹಣೊಂಕ್ ಸರ್ವ್ ನಿಬಾಂ ಸೊಧ್ಚೊ. ತಾಂಚೆಂ ಪೊಟ್ ಭರ್ಲಾಂ ಆನಿ ತಾಂಚ್ಯಾ ಸಂತಾನಾಚೆಂ ಪೊಟ್ ಭರುಂಕ್ ಜಾಯ್ತೆಂ ಗುದಾಂವಾಂನಿ ತಾಣಿಂ ಪುರ್ಲಾಂ. ದುಸ್ರೊ ಭುಕ್-ಪಿಡಾ-ಸಂಕಶ್ಟಾಂತ್ ಹಾಕ್-ಬೊಬ್ ಮಾರ್ಚೊ. ಪುಣ್ ಹಾಂಚಿಂ ಬೋಬ್ ಸಯ್ತ್ ’ಹಿ ದುಕಿಚಿ ಬೋಬ್ ನ್ಹಯ್, ಹಿ ಸಂತೊಸಾಚಿ ಬೋಬ್’ ಮ್ಹಣ್ ಅಪ್ಲೆಂ ಹರ್ದೆಂ ಪೆಟುನ್ ಹೆರಾಂಕ್ ಸಾಂಗ್ತೆಲ್ಯಾಂಕ್, ಹಾಂಗಾ ಮನ್ಶಾಪಣ್ ಮೊರ್ನಾಚ್ಯಾ ಅಖೇರಿಚ್ಯಾ ಘಡ್ಯೆರ್ ಉಭೆಂ ಆಸಾ ಮ್ಹಳ್ಳೆಂ ಕಿತ್ಯಾಕ್ ಪಡೊನ್ ಗೆಲಾಂ?

ಭೋವ್ ಸೂಕ್ಷ್ಮ್ ಸಂವೇದನಾಂಕ್ ಸಯ್ತ್ ಅಪ್ಲ್ಯಾ ಕವಿತೆಂನಿ ಉತ್ರಾಂವ್ಚಿ ಶ್ಯಾಥಿ ಆಸ್ಚೊ ಕಿಶೂ ಬಾರ್ಕೂರ್ ’ಮುನಾಫೊ ಆನಿ ಲುಕ್ಸಾಣ್’ ಕವಿತೆಂತ್ ಎಕೆಕಾ ಕಡ್ವ್ಯಾಂತ್ ಎಕೇಕಾ ಜಾಗತಿಕ್ ಸತಾಕ್ ಉಗ್ಡಾಪೆಂ ಕರ್ತಾ. ಜಾಗತಿಕ್ ರಾಜಕೀಯ್ ಬಜಾರಾಂತ್ ಮನ್ಶಾಪಣಾಕ್ ಸೊವುರ್ಚಿಂ ಸತಾಂ ಲಿಪಂವ್ಕ್ ಝುಜಾಂ ಕರವ್ನ್ ವೆವಸ್ತಿತ್ ದಂದೊ ಚಲವ್ನ್ ’ಶಾಂತೆಚೆಂ ಪ್ರವಚನ್’ ದಿಂವ್ಚೆ ಸುಟಾಂಗಾರ್ ಕಶೆಂ ಸೊಲ್ಲೊ ಕರುನ್ ಆಪಾಪ್ಲ್ಯಾ ಭುರ್ಗ್ಯಾಂಬಗ್ಲೆನ್ ಘರಾ ಪಾವ್ತಾನಾ ಅಮಾಯಕ್ ನೆಣ್ತಿಂ ಭುರ್ಗಿಂ ಅಪ್ಲೆಂ ರಗತ್ ವ್ಹಾಳವ್ನ್ ಕಶೆಂ ಅತ್ಮೆ ಜಾಲ್ಯಾತ್ ಆನಿ ಲೊರಾಂನಿ ಉಲೊ ಕರ್ಚ್ಯಾ ಆಜಿಯೆಚ್ಯಾ ತಾಳ್ಯಾಕ್, ಹೆಂ ಸಕ್ಕಡ್ ಘೆಂವ್ಚಿ ಭುಂಯ್ ಆನಿ ಪಾವ್ಸಾಳೊ ಹ್ಯಾ ದೊನಾಂಕ್ ಸಾಂಕೇತಿಕ್ ರಿತಿನ್ ದೋನ್ ಕಾಳಾಂಕ್ ಅಪುರ್ಭಾಯೆನ್ ಉತ್ರಾಯ್ತಾ.

[ಕವಿತಾ] ಮುನಾಫೊ ಆನಿ ಲುಕ್ಸಾಣ್ (- ಕಿಶೂ, ಬಾರ್ಕೂರ್)

ಮುನಾಫೊ ಆನಿ ಲುಕ್ಸಾಣ್

ಕೊಸ್ಳಾಲ್ಲ್ಯಾ ದೆಸ್ವಾಟಾಂತ್ ಭುರ್ಗ್ಯಾಚೆ ಮೊಚೆ, ಆಜೂನೀ ಪಾಂಯಾಂತ್.

ಆಜ್ ಸಕಾಳಿಂ ಕೊಣೆಂಗೀ ಲೇಸ್ ಬಾಂಧ್‌ಲ್ಲೆ ತಾಚೆ.

ದಾಂಳ್ಬಾಂ ಫುಟುನ್ ಉಗ್ತಿಂ

ತಾಂಬ್ಡೀಂಚ್ ಗೊಬ್ರಾಳ್ಯಾ ಕೊಂಕ್ರಿಟಾರ್.

ತೊ ಬಾಪಯ್ ಆನಿ ಸಾಂಗುಂಕ್ ಸಕ್ಚೊನಾಂ

ಖಂಯ್ಚೊ ತಾಂಬ್ಡೊರಂಗ್, ಫಳಾಚೊ.

ತಾಚೆಂ ಧುವ್ ಹಳ್ದುವೆಂ ಆಂಗ್ಲೆಂ ನ್ಹೆಸ್‌ಲ್ಲೆಂ.

ತಾಕಾ ಹಳ್ದುವೆಂ ಬೋವ್ ಮೊಗಾಚೆಂ.

ಆನಿ ಫಕತ್ ತಸ್ವಿರೆಂತ್.

ಎಸಿ ಸಾಲಾಂನಿಂ ಸೂಟ್‌ಬೂಟಾಗಾರ್

ಮ್ಯಾಪಾಂಚೆರ್ ನಕ್ಷಾ ಗಿಚ್ಚಿತಾತ್,

ದಸ್ಕತ್ಯೊ ವೊಡ್ತಾತ್,

ತೇಲಾಮೋಲ್ ಮಾಪ್ತಾತ್,

ಮಾಗಿರ್ ಆಪಾಪ್ಲ್ಯಾ ಭುರ್ಗ್ಯಾಂಬಗ್ಲೆನ್

ಘರಾ ಪಾವ್ತಾತ್.

ಆಜಿ ಪುಸ್ಪುಸ್ತಾ ನಾಂವಾಂ ನಾತ್ರಾಂಚಿಂ

ನಿದಾನಾಸ್ತಾಂ, ತಿಚೆಇತ್ಲ್ಯಾಕ್ ರಾತಿಂ.

ಅರ್ದ್ಯಾಚ್ಯಾ ಅರ್ದಿಂ ಆತಾಂ ಫಕತ್ ಅತ್ಮೆ.

ತೆ ಮ್ಹಣ್ತಾತ್ ಹೆಂ ಗರ್ಜೆಚೆಂ.

ತೆ ಸಾಂಗ್ತಾತ್ ಹೆಂ ಲೇಕಾಚಾರಾಚೆಂ.

ತೆ ತಾಕಾ ನಾಂವಾನ್ ಆಪಯ್ನಾಂತ್.

ಖಂಯ್ಸರ್‌ಗೀ ಪಾಯ್ಪಾಂನಿಂ ತೇಲ್ ವ್ಹಾಳೊನ್‍ಂಚ್ ಆಸಾ .

ಖಂಯ್ಸರ್‌ಗೀ ಮುನಾಫೊ ವಾಡೊನ್‍ಂಚ್ ಆಸಾ.

ಖಂಯ್ಸರ್‌ಗೀ ಒಲಿವಾಚಿ ಆಂಕ್ರಿ ಏಕ್

ಹಾಡಾಂ ಆನಿ ಗೊಬ್ರಾ ಇಡ್ಯಾಂತ್ ವಯ್ರ್ ಯೇಂವ್ಕ್ ಉರ್ಡುನ್ ಆಸಾ.

ಮೆಲ್ಲಿಂ ಹಿಸಾಪ್ ದವರ್ನಾಂತ್.

ಭೂಂಯ್ ಸಗ್ಳೆಂ ಘೆತಾ-

ನೆಣ್ತ್ಯಾಂಕ್,

ಇನ್ವೋಯ್ಸಾಂಕ್,

ಆಮಿ ಝುಜ್ಚ್ಯಾ

ತೆಲಾಕ್.

ಪಾವ್ಸಾಳ್ ಯೆತಲೊ.

ಫುಲಾಂಕ್ ಬಿಲ್ಕುಲ್ ಕಳ್ಚೆಂನಾಂ,

ಕಿತೆಂ ತಿಂ ಲಿಪವ್ನ್ ಆಸಾತ್.

- ಕಿಶೂ ಬಾರ್ಕುರ್ [ಎಪ್ರಿಲ್, 2025]

ಕಿಶೂ ಬಾರ್ಕುರ್: ಲಿಖ್ಣೆ ನಾಂವಾರ್ ಬರಂವ್ಚೊ ಕಿಶೋರ್ ಗೊನ್ಸಾಲ್ವಿಸ್ ಕವಿತಾ, ಕಥಾ, ಕಾಂತಾರಾಂ ಆನಿ ಲೇಖನಾಂ ಬರಯ್ತಾ. ಕವಿತಾ ಟ್ರಸ್ಟಾಚೊ ಆಧ್ಲೊ ಅಧ್ಯಕ್ಷ್ ಜಾವ್ನ್ ವಾವ್ರ್ ಕೆಲ್ಲೊ ಕಿಶೂ ಕೊಂಕಣಿ, ಕನ್ನಡ ತಶೆಂಚ್ ಇಂಗ್ಲಿಷ್ ಭಾಸೆಂನಿ ಸಯ್ತ್ ಬರಯ್ತಾ. ದಾಕ್ಟ್ಯಾ ದೆವಾಚಿಂ ಭುರ್ಗಿಂ (ಕವಿತಾ ಸಂಗ್ರಹ್), ರುಪ್ಣಿಂ (ಮೊಟ್ವ್ಯೊ ಕಥಾ ಸಂಗ್ರಹ್) ತಶೆಂಚ್ ಸಭಾರ್ ಹೆರ್ ಸಂಕಲನಾಂನಿ ಹಾಚಿಂ ಬರ್ಪಾಂ ಆಸಾತ್.