ಮನಶಾಚೆಂ ಮಟಣ್ [ ದೀಪರಾಜ್ ಸಾತೊರ್ಡೆಕರ್, ಪಂಚವಡೀ]

ಥೊಡೆಚ್ ಸಬ್ಧಾಂಕ್ ಮನ್ಶಾಕುಳಾರ್ ನಾಗ್ಡೆಂ ಕರ್ಚಿ ಶ್ಯಾಥಿ ಆಸ್ಚಿ ಕಿತ್ಲೆ ಪಾವ್ಟಿಂ ಆಮಿಂ ಪಳೆಂವ್ಕ್ ಸಕ್ತಾಂವ್? ಹಾಂಗಾಸರ್ ಏಕ್ ಕವಿತಾ ಆಸಾ, ಹಿ ಫಕತ್ ಕವಿತಾ ನ್ಹಯ್, ಏಕ್ ಸಾಮಾಜಿಕ್ ವಿಡಂಬನ್, ಮನ್ಶಾಕ್ ಪುರ್ತೆಂ ನಾಗ್ಡೆಂ ಕರ್ಚಿಂ ಎಕೇಕ್ ಉತ್ರಾಂ ಖರಿಂಚ್ ಚಿಂತುಂಕ್ ಆನಿ ಆಟೊವ್ ಕರುಂಕ್ ಕರ್ತಾತ್.

ಏಕ್ ನಾಟಕಿಸ್ತ್ ಜೆದ್ನಾಂ ಕವಿತಾ ಬರಯ್ತಾ, ತಿ ಕವಿತಾ ಖರಿಚ್ ಜಾವ್ನ್ ಭಳ್ವಂತ್ ಸಕತ್ ಜಾತಾ ಮ್ಹಣ್ಚ್ಯಾಕ್ ಹಿ ಕವಿತಾ ಗವಾಯ್ ದಿತಾ. ದೀಪರಾಜ್ ಸಾತೊರ್ಡೆಕರಾನ್ ಹಿ ಕವಿತಾ ಸಾದರ್ ಕೆಲ್ಲಿ ಫೆಬ್ರೆರ್ ತೀನ್ ತಾರಿಕೆರ್ ಕಾಣಕೋಣಂತ್ ಆಸಾ ಕೆಲ್ಲ್ಯಾ ಕವಿಗೋಶ್ಟಿಂತ್. ಆನಿ ಹಿ ಕವಿತಾ ಫಕತ್ ಹಾಸಯ್ನಾ ಪುಣ್ ಕೊಶೆಡ್ದಾಭಿತರ್ ಕೊಣಾಕ್‌ಚ್ ಕಳಾನಾಸ್ತಾನಾ ಖೊಂಕ್ತಾ ಆನಿ ಕವಿತಾ ಆಯ್ಕುನ್ ಜಾಲ್ಲೆಪರಿಂಚ್ ದುಭಾವ್ ಧೊಸುಂಕ್ ಲಾಗ್ತಾ; ಕಾಂಯ್ ಹಾಂವ್ ತೊ ಬೊಕ್ರೊ ವಾ ಮನೀಸ್? ಜಾತ್-ಧರ್ಮ್-ಪ್ರಾಂತ್ಯ್-ಬೊಲಿ-ಲಿಪಿ ಮ್ಹಳ್ಳಿಂ ನಿಬಾಂ ಘೆವ್ನ್ ಕೊಂಕಣಿಕ್ ಚ್ಯುರಾನ್ ಚ್ಯುರೊ ಕರ್ತೆಲ್ಯಾಂನಿ ಹಿ ಕವಿತಾ ಖಂಡಿತ್ ವಾಚುಂಕ್ ಜಾಯ್ ತಶೆಂಚ್ ಹ್ಯಾ ಕವಿತೆಚೆರ್ ಮೀಟ್ ಘಾಲುನ್ ಲೆಂವೊಂಕ್ ಜಾಯ್. ಆತಾಂ ಅಪುಣ್ ಕಿತೆಂ ಬೊಕ್ರೊ ವಾ ಮನಿಸ್ ಮ್ಹಳ್ಳೆಂ ಸವಾಲ್ ಅಪ್ಣಾಕ್ ಕರುಂಕ್ ತುಕಾಚ್ ಸೊಡ್ತಾಂ.

[ಕವಿತಾ] ಮನಶಾಚೆಂ ಮಟಣ್ [ದೀಪರಾಜ್ ಸಾತೊರ್ಡೆಕರ್, ಪಂಚವಡೀ]

ಮನಶಾಚೆಂ ಮಟಣ್

ಏಕ್ ದೀಸ್ ಬೊಕಡ್ಯಾಕ್

ಖಾಯನ್ ದಿಸಲೆಂ ಮನಶಾಚೆಂ ಮಟಣ್

ತಿಠ್‌ಯಾರ್ ವಚ್ ಜಾಲ್ಯಾರ್

ಘೆ ರಾಶೀ..

ತಂಬಡೆಂ ಗುಂಜ್ ಮಟಣ್

ಘೆವಂಕ್ ಗೆಲ್ಯಾರ್

ಕೊಣಾಕ್ ಗೊಡೆಂಮೂತ್

ಕೊಣಾಕ್ ಕೆನ್ಸರ್

ಕೊಣಾಕ್ ಏಡ್‌ಸ್

ಕೊಣಾಕ್ ಟೀ.ಬೀ.

ದುಯೆಂಸಚ್ಯೊ ಘೆ ರಾಶೀ

ಬೊಕಡೊ ಉರಲೊ ಉಪಾಶೀ

ಬೊಕಡ್‌ಯಾನ್ ಮಟಣ್ ಮಾಗೀರ್

ಓನ್‌ಲಾಯನ್ ಟ್ರಾಯ್ ಕೆಲೆಂ

ಮನಶ್ಯಾಚ್ಯಾ ಮಟಣಾಚೀ ಸಾಯಟ್ ಕೆಲೀ ಓಪನ್

ಓಪ್ಶನ್ ಆಯಲೆಂ

ಕೊಂಕಣೆ-ಮುಸಲಮಾನ್-ಕಿರಿಸ್ತಾಂವ್

ತಾಣೆಂ ’ಕೊಂಕಣೆ’ ಕ್ಲಿಕ್ ಕೆಲೆಂ

ಪರತೆಂ ಓಪ್ಶನ್ ಆಯಲೆಂ..

ಭಾಟ್-ಬಾಮಣ್-ವಾಣೀ

ಶೆಟ್-ಮ್ಹಾಲೊ-ಮೆಸ್ತ್

ಖಾಖೀ-ಗಾವಡೊ-ಭಂಡಾರೀ..

ಜಾತೀಚ್ಯೊ ಘೆ ರಾಶೀ

ಬೊಕಡೊ ಪರತೂನ್ ಉಪಾಶೀ

ಬೊಕಡೊ ಪರತೂನ್

ತಿಠ್‌ಯಾರ್ ಗೆಲೊ

ತಾಣೆಂ ತಿನೂಯ್ ಧರ್ಮಾಚೆ

ಜಾತೀ ಕಾತೀಚೆ

ವಾಂಟೆ ಮೊಲಾಯಲೆ

ಸಗಳ್ಯಾಂಚೊ

ರಂಗ್ ಏಕ್, ಕಾಲೆತ್ ಏಕ್

ವೆಗಳೆಂ ಕಾಂಯಚ್ ದಿಸಲೆಂ ನಾ

ಆಪಲೀ ಜಾತ್ ಖಂಯಚೀ ಕಾಯ್?

ತಿವ್ಯು ತಾಕಾ ಕಳ್‌ಳೀ ನಾ

ವಿಚಾರಾಂಚ್ಯೊ ಘೆ ರಾಶೀ

ಬೊಕಡೊ ಬಾಬಡೊ ಉಪಾಶೀ

- ದೀಪರಾಜ್ ಸಾತೊರ್ಡೆಕರ್, ಪಂಚವಡೀ [ಮಾರ್ಚ್, 2019]