ಮಾಂ [ಡಾ| ಜಯಂತಿ ನಾಯ್ಕ್]

’ಮಾಂ’ ಭೊವ್ಶಾ ಸಂಸಾತಾಂತ್ಲೊ ಭೋವ್ ಸಕ್ತೆವಂತ್ ಸಬ್ಧ್. ವರ್ಣುಂಕ್ ಉತ್ರಾಂಚ್ ನಾಸ್ಚೊ, ಗುಂಡಾಯ್ ಮೆಜುಂಕ್ ಮಾಪ್‌ಚ್ ಉಣೆಂ ಪಡ್ಚೊ ಸಬ್ಧ್, ಕಾಂಯ್ ಚಡ್ತಾವ್ ಭಾಸಾಂನಿ ಎಕ್‌ಚ್ ಅರ್ಥಾಚೊ ಸಬ್ಧ್. ’ಮಾಂ’ ಏಕ್ ಸಬ್ಧ್ ಮಾತ್ರ್ ನ್ಹಯ್, ಏಕ್ ದರಯೊ, ಏಕ್ ಸುರಯೊ, ಏಕ್ ಸಂಸಾರ್. ಆನಿ ಎಕಾ ’ಆವಯ್’ ವಿಶ್ಯಾಂತ್ ಚಿಂತಾನಾ ಉಮಾಳ್ಯಾಚ್ಯಾ ಸಾಗೊರಾಂತ್ ಉಪ್ಯೆನಾಸ್ಚೊ ಕೊಣ್ ಆಸತ್?

ಡಾ|ಜಯಂತಿ ನಾಯ್ಕ್ ಗೊಂಯ್ಚಿ ನಾಮ್ಣೆಚಿ ಕಾಣ್ಯೆಗಾರ್ನ್, ಕವಯತ್ರಿ, ವಿಶ್ಲೇಷಕಿ, ತರ್ಜಣ್‌ಕಾರ್ನ್, ನಾಟಕಿಸ್ತ್. ಸಾಹಿತ್ ಅಕಾಡೆಮಿ ಗೊಂಯ್ ಹಾಣಿಂ ಪರ್ಗಟ್ ಕರ್ಚ್ಯಾ ’ಅನನ್ಯ’ ಸ ಮಯ್ನ್ಯಾಳ್ಯಾಚಿ ಸಂಪಾದಕಿ. ಲೋಕ್‌ವೇದಾಂತ್ ಸಂಸೋದ್ ಕರುನ್ ಆಸಾ.

[ಕವಿತಾ] ಮಾಂ [ಡಾ| ಜಯಂತಿ ನಾಯ್ಕ್]

***

ತುಜೆಕಡಲ್ಯಾನ್ ಶುನ್ಯಾಚೆಂ ಮೊಲ್

ಎಕ್ ದೀಸ್ ಆಯಕಲ್ಲೆಂ,

ಮ್ಹಣೂನಚ್ ಆಜ್ ಹಾಂವ್

ಶೂನ್ಯ ಭೆದೂಂಕ್ ಪಾವಲೆಂ!

***

ಭುರಗೆಪಣಾಂತ್ ಎಕದಾಂ ತುವೆಂಚ್ ಸಾಂಗಿಲ್ಲೆಂ

ಆಕಾಶದಿವ್ಯಾಚ್ಯಾ ಉಜವಾಡಾಂತ್ ಖಂಯ್,

ಸರ್ಗಾರ್ ಗೆಲ್ಲೆ ಪುರ್ವಜ್, ಘರಾ ಪರತತಾತ್ ಮ್ಹಣಾ,

ಆತಾಂ ಹಾಂವ್ ನ ಚುಕತಾಂ ದಿವಾಳೆಕ್

ಆಂಗಣಾಂತ್ ಆಕಾಶದಿವೊ ಪೆಟಯತಾ,

ಪುಣ್, ತೂಂ ಮಾತ್ ಆಜೂನ್ ಆಯಲೀಚ್ ನಾ!

***

- ಡಾ| ಜಯಂತಿ ನಾಯ್ಕ್ [ಜುಲಾಯ್ 2018]

ಡಾ| ಜಯಂತಿ ನಾಯ್ಕ್: ಗೊಂಯ್ಚಾ ಯುನಿವರ್ಸಿಟಿಂತ್ ಪಿ.ಎಚ್.ಡಿ. ಶಿಕಾಪ್ ಜೋಡ್ನ್ ಲೋಕ್‌ವೇದಾಂತ್ ಸಂಶೋದ್ ಕರ್ತಾ ತಶೆಂಚ್ ಗೊಂಯ್ಚಾ ಕೊಂಕಣಿ ಅಕಾಡೆಮಿನ್ ಪರ್ಗಟ್ಚ್ಯಾ ಸ-ಮಯ್ನ್ಯಾಳ್ಯಾ ’ಅನನ್ಯ’ ಸಾಹಿತಿಕ್ ಪತ್ರಾಚಿ ಸಂಪಾದಕಿ. ಕೊಂಕಣೆಂತ್ಲಿ ನಾಮ್ಣೆಚಿ ಕಾಣ್‌ಯೆಗಾರ್ನ್, ಕವಯತ್ರಿ. ಕಾಂಯ್ 35 ಬೂಕ್ ಯೆದೊಳ್‌ಚ್ ಪರ್ಗಟ್ ಕೆಲ್ಯಾತ್, ತಾಂತುಂ ಲೋಕ್‌ವೇದ್, ಕವಿತಾ, ನಾಟಕ್, ನಿಬಂದ್, ಬಾಲ್ಯ್‌ಸಾಹಿತ್, ಅನುವಾದ್ ಆಸಾತ್. ಕಲಾ ಅಕಾಡೆಮಿ ಸಾಹಿತ್ ಪುರಸ್ಕಾರ್, ಸಾಹಿತ್ ಅಕಾಡೆಮಿ ಡೆಲ್ಹಿಚೊ ಸಾಹಿತಿಕ್ ಪುರಸ್ಕಾರ್, ವಾವ್ರಾಡ್ಯಾಂಚೊ ಇಶ್ಟ್ ಸಂಸ್ಥೆಚೊ ಪುರಸ್ಕಾರ್, ಗೊಂಯ್ ಸರ್ಕಾರಾಚ್ಯಾ ಮಹಿಳಾ ಆನಿ ಭುರ್ಗ್ಯಾ ವಿಕಾಸ್ ಸಂಚಾಲನಾಲಯಾಚೊ ಯಶೊದಾಮಿನಿ ಪುರಸ್ಕಾರ್ ಹಿಕಾ ಮೆಳ್‌ಲ್ಲೆ ಪ್ರಮುಕ್ ಪುರಸ್ಕಾರ್.