ಕುಳ್ವಾಡ್ಯಾಚೊ ಬಾಪೂಯ್ (- ರಮೇಶ್ ಸಾಜು ಘಾಡಿ)

[ಕವಿತಾ] ಕುಳ್ವಾಡ್ಯಾಚೊ ಬಾಪೂಯ್ (- ರಮೇಶ್ ಸಾಜು ಘಾಡಿ)

ಹ್ಯಾ ಸಂಸಾರಾಂತ್ ದರೇಕ್ ದುಡವಾಂತ್ ಮೊಲಾಕ್ ಘೆಂವ್ಕ್ ಜಾಯ್ನಾ. ಸರ್ಗಾಂತ್ ಸಯ್ರ್ ಅಪ್ಲಿ ಭಾಸ್, ಅಪ್ಲಿ ಸಮಾಜ್, ಅಪ್ಲಿ ಸಂಸ್ಕೃತಿ ನಾ. ದೆಕುನ್ ಅಪ್ಸರೆಂಚೊ ನಾಚ್ ಲೆಗೂನ್ ಕಾಂಠಾಳ್ಯಾಚೊ ಜಾಂವ್ಕ್ ಪಾವ್ತಾ. ಹೆಂ ದಾಕವ್ಪ್, ಹೆಂ ಶೋ-ಬಿಜ್ ಸಗಳೆಂ ಕ್ಷಣಿಕ್ ಶಿವಾಯ್ ಸಾಸ್ಣಿಕ್ ಜಾವ್ನಾಸ್ಚೆಂ ಅಪ್ಲಿ ಸಮಾಜ್, ಅಪ್ಲ್ಯಾ ಗಾಂವ್ಚಿ ಮಾತಿ ಆನಿ ಅಪ್ಲಿ ಸಂಸ್ಕೃತಿ ಮ್ಹಳ್ಳೆಂ ಚಿಂತಪ್ ಹ್ಯಾ ಕವಿತೆಂಚ್ ಭೋವ್ ಅಪುರ್ಭಾಯೆನ್ ಕೆಲ್ಲೆಂ ದಿಸುನ್ ಯೆತಾ.

[ಕವಿತಾ] ಕುಳ್ವಾಡ್ಯಾಚೊ ಬಾಪೂಯ್ (- ರಮೇಶ್ ಸಾಜು ಘಾಡಿ)

ಕುಳ್ವಾಡ್ಯಾಚೊ ಬಾಪೂಯ್

ಮೆಲೊ ತರಿ ಕುಳ್ವಾಡ್ಯಾಚೊ

ಬಾಪೂಯ್ ಸರ್ಗಾರ್ ವಚ್ನಾ

ಸರ್ಗಾಂತ್ಲ್ಯಾ ಶಾರಾಂಚೆ ಖಂಯ್

ಹವಾಮಾನ್ ತಾಕಾ ಪಚ್ನಾ.

ಆದ್ಲೆ ವರೀಚ್ ಖೊರೆಂ ಘೆವಂನ್

ತೊ ಶೆತಾ ಬಾಂದಾರ್ ಘುಸ್ಪತಾ

ಹಳೂಚ್ ಫಾಂತ್ಯಾರ್ ಪೊರ್ಸಾಂತಲಿ

ಹೊಂಡ್ಯಾ-ಬಾಂಯ್ ತೊ ಉಸ್ಪತಾ.

ಮಿರ್ಗಾಂತ್ಲ್ಯಾ ಪಾವ್ಸಾಂತ್ ತೊ

ಜಗೂಲ್ ಜಾವೂನ್ ಪೆಟ್ತಾ

ಪಾವ್ಸಾ ಥೆಂಬ್ಯಾಂತ್ ಖಂಯ್ ತಾಕಾ

ಸರ್ಗಾ ಸುಖ್ ಭೆಟ್ತಾ.

ಕೆನ್ನಾಯ್ ಆಡ್ ವಾಟೆಂತ್ ಚಲತ್

ತೊ ಮಾನ್ಶೆ ಉದ್ಕಾಂತ್ ದೆವ್ತಾ

ಝರ್ಕುಟ್ಯಾಚಿ ದೆವ್ತಿಂ ಮಾಡ್ಡಯತ್

ತಳ್ಯೆ ಪಾಣ್ಯಾಂತ್ ಪೆವ್ತಾ.

ಶೆಣಿಲ್ಲ್ಯಾ ತೊ ಪಾಡ್ಕುಲ್ಯಾಂಕ್

ಗೊಠ್ಯಾಂತ್ ಹಾಡೂನ್ ಪಾವ್ಯ್ತಾ

ಪೊಯೆಂತ್ಲ್ಯಾ ನುಸ್ತೆಂಚೊರಾಂಕ್

ಭೆಸ್ಟಾವೂನ್ ಧಾವ್ಡಯತಾ.

ಶಿಗ್ಮ್ಯಾ ವೆಳಾರ್

ದೊಂಗ್ರಾ ಮಳಾರ್

ಗಡ್ಯಾ ವಾಂಗ್ಡಾಚ್ ಧಾವ್ತಾ

ದೆವ್ಳಿ ಘುಮ್ಟಿ ನಾಕಾಂ ಮ್ಹಣೀತ್

ಝಾಡಾರ್ ಬಸೂನ್ ರಾವ್ತಾ.

ಕುಳ್ವಾಡ್ಯಾಚೊ ಬಾಪೂಯ್ ಮ್ಹಣ್ಟಾ..

ಹೊ ಗಾವೂಚ್ ಮ್ಹಜೊ ಸರ್ಗ್ ಮ್ಹರೆಂ

ಅಪ್ಸರಾಂಚ್ಯಾ ನಾಚಾಂಚಿ ತಿ

ವ್ಯಸ್ನಾಂ ಬಾಬಾ ಆಮ್ಕಾ ನಾ ರೆ.

ಸರ್ಗ್ ನಾಕಾ ಹೆಚ್ ಭುಯೆಂತ್

ರಾಖ್ಣೊ ಜಾವಂನ್ ಹಾಂವ್ ರಾವ್ತಲೊ

ತುಮ್ಚ್ಯಾ ಕಾಳ್ಜಾ-ಉಲ್ಯಾಂಕ್ ಹಾಂವ್

ಧಾವ್ತ್ ಯೆವೂನ್ ಪಾವ್ತಲೊ.

- ರಮೇಶ್ ಸಾಜು ಘಾಡಿ. [ಎಪ್ರಿಲ್, 2020]

ರಮೇಶ್ ಸಾಜು ಘಾಡಿ: ಲಿಖ್ಣೆ ನಾಂವಾಖಾಲ್ ಬರಂವ್ಚೊ ರಮೇಶ್ ಸಹದೇವ್ ಗಡಿ ಪಾಟ್ಲ್ಯಾ ಪಂದ್ರಾ ವರ್ಸಾಂ ಥಾವ್ನ್ ಬಿಂಬ್, ಜಾಗ್, ಗುಲಾಬ್, ಸುನಾಪರಾಂತ್ ತಶೆಂಚ್ ಭಾಂಗಾರ್‌ಭುಂಯ್ ಪತ್ರಾಂನಿ ಬರವ್ನ್ ಆಯ್ಲಾ. ಸಭಾರ್ ಕವಿಸಮ್ಮೇಳನಾಂನಿ ತಶೆಂಚ್ ಕವಿಗೋಶ್ಟಿಂನಿ ಕವಿತಾ ಸಾದರ್ ಕೆಲ್ಯಾತ್ ತಶೆಂಚ್ ಚಲವ್ನ್ ವೆಲ್ಯಾತ್. ಕವಿತೆಶಿವಾಯ್ ಕಾಣಿಯೊ ತಶೆಂಚ್ ಲೇಕನಾಂ ಬರಂವ್ಚ್ಯಾ ಹಾಚ್ಯಾ ಕವಿತೆಂಚೊ ಜಮೊ ’ಆವಯ್ ಜಾಲ್ಯಾ ಜಾಣ್ತಿ’ ಪರ್ಗಟ್ಣೆರ್ ಅಸಾ.