ಖರೆಂ ಕಾಗತ್ (- ಜೆಸ್ ಫೆರ್ನಾಂಡಿಸ್)

[ಕವಿತಾ] ಖರೆಂ ಕಾಗತ್ (- ಜೆಸ್ ಫೆರ್ನಾಂಡಿಸ್)

ಖರೆಂ (ರಿತೆಂ) ಕಾಗತ್ ಸೊಂಪ್ಯಾ ಉತ್ರಾಂನಿ ತಾತ್ವಿಕ್ ಅರ್ಥ್ ಸಮ್ಜಾವ್ನ್ ವೆಚಿ ಕವಿತಾ. ಖರೆಂ ಕಾಗತ್ ಮ್ಹಳ್ಯಾರ್ ಜಿವಿತ್, ಹ್ಯಾ ಸಂಸಾರಾಂತ್ ಜಿಯೆಂವ್ಚಾಕ್ ಪಾಸತ್ ದೆವಾನ್ ದಿಲಲೆಂ ದೆಕುನ್ ಆಮ್ಕಾಂ ಸರ್ವಾಂಕ್ ಹ್ಯಾ ಜಿವಿತಾಕ್ ಸಾರ್ಥಕ್ ರಿತಿನ್ ಜಿಯೆವ್ನ್ ದಾಕಂವ್ಕ್ ಆಸಾ ಕಿತ್ಯಾಕ್ ಮ್ಹಳ್ಯಾರ್ ಹೆಂ ಜಿವಿತ್ ದಿಲಲ್ಯಾ ದೆವಾಕ್ ಎಕಾ ದಿಸಾ ಆಮಿ ಲೇಕ್ ದೀಂವ್ಕ್ ಆಸಾ.

ಬಾಬ್ ಜೆಸ್ ಫೆರ್ನಾಂಡಿಸ್ ಜಿವಿತಾ ಅನ್ಭೋಗ್ ಜೊಡ್ಲಲೊ ಕವಿ. ಸಾಹಿತ್ಯ್ ಅಕಾಡೆಮಿಚೊ ಪುರಸ್ಕಾರ್ ಜೊಡ್ಪಿ. ಹ್ಯಾ ಸೊಂಪ್ಯಾ ಉತ್ರಾಂನಿ ಆಟಾಪುನ್ ಆಸ್ಚ್ಯಾ ಆಧ್ಯಾತ್ಮಿಕತಾ/ತಾತ್ವಿಕತಾ ಪಾರ್ಕುಂಕ್ ತುಕಾಚ್ ಸೊಡ್ತಾಂ..

[ಕವಿತಾ] ಖರೆಂ ಕಾಗತ್ (- ಜೆಸ್ ಫೆರ್ನಾಂಡಿಸ್)

ಖರೆಂ ಕಾಗತ್

ಮನ್ಶ್ಯಾ, ತುಕಾ ಹಾಂವೆಂ ಜಿವಿತ್ ದಿಲಾಂ

ಧವೆಂ ಕಾಗತ್ ಖರೆಂ

ತಾಚೆರ್ ತುವೆಂ ಚಿತಾವ್ಚೆಂ ಆಸಾ ರೆ

ತುಜೆಂ ಜಿವಿತ್ ಪುರೆಂ.

ಅರ್ಥಾಭರಿತ್ ಜಿವಿತಾಚ್ಯಾ ಮನ್ಶ್ಯಾ

ತುಜೆಂ ತೆಂ ಜಿವಿತ್ ಜಾಂವ್ಚೆಂ.

ಕರಿನಾ ಜಾಲ್ಯಾರ್ ಸಗ್ಳೆಂಚ್ ಮ್ಹಜೆಂ ಕರ್ಯೆ

ಕರ್ತಲೊಯ್ ಅಧುರೆಂ.

ಚತ್ರಾಯ್ ಧರ್, ಖರ್ಯಾ ಕಾಗ್ದಾಚೆರ್ ಮನ್ಶ್ಯಾ

ವೆಗಿನ್ ಚಿತ್ರಾಯ್ ತುಜೆಂ

ಹ್ಯಾ ಜಿವಿತಾಚೆಂ ಕರ್ ಮನ್ಶ್ಯಾ

ಏಕ್ ಸುಂದರ್ ಚಿತ್ರ್ ಬರೆಂ.

ಚಿತ್ರಾಯ್ನಾ ಆಸ್ತಾನಾಂ ವೆಳ್ ಹೊಗ್ಡಾಯ್ಲ್ಯಾರ್

ದುಸ್ಮಾನ್ ವಯ್ರ್ ಸರ್ತಲೊ

ಆನಿ ಆಪ್ಲ್ಯಾ ಚಿತ್ರಾನ್ ತುಜೆಂ ಕಾಗತ್

ಅಪುಣ್ ನೆಟಯ್ತಲೊ.

ತ್ಯಾ ವೆಳಾರ್ ತುಕಾ ರಚ್ಲೆಲ್ಯಾ

ದೆವಾಕ್ ಪಶ್ಚಾತಾಪ್ ಜಾತಲೊ

ಮಾಗಿರ್ ಸಾಂಗ್ ಮನ್ಶ್ಯಾ ತುಜ್ಯಾ ದೆವಾಕ್ ತುಂ

ಕಿತೆಂ ಜಾಪ್ ದಿತಲೊ?

- ಜೆಸ್ ಫೆರ್ನಾಂಡಿಸ್. [ಎಪ್ರಿಲ್, 2023]

ಜೆಸ್ ಫೆರ್ನಾಂಡೀಸ್: 1941 ಇಸ್ವೆಚ್ಯಾ ಸಪ್ತೆಂಬರ್ 6 ತಾರಿಕೆರ್ ಗೊಂಯ್ಚ್ಯಾ ಕಾಣಕೊಣಾಂತ್ ಜಲ್ಮಲ್ಲೊ ಹೊ ಕವಿ, ಗಾವ್ಪಿ, ತಿಯಾತ್ರಿಸ್ತ್, ಬರಯ್ಣಾರ್. ’ಖೆಪೆಚಿಂ ಕಿರ್ಣಾಂ’ ಪಂಗಡ್ ಆನಿ ಮಾಂಡೊ ಗೊಂಯಾಂತ್ ಭೋವ್ ಫಾಮಾದ್. 2009 ಇಸ್ವೆಚೊ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚೊ ಪುರಸ್ಕಾರ್ ಹಾಂಚ್ಯಾ ’ಕಿರವಂಟ್’ ಕವಿತಾ ಪುಸ್ತಕಾಕ್ ಲಾಭ್ಲಾ. ಅಂಟೋನಿಯೋ ಪಿರೇರಾ ಕೊಂಕಣಿ ಪುರಸ್ಕಾರ್ (2005), ಕಲಾ ಅಕಾಡೆಮಿ ಸಾಹಿತ್ಯ್ ಪುರಸ್ಕಾರ್ (2017), ತಶೆಂಚ್ ಗುಲಾಬ್ ವರ್ಸಾಚೊ ಬರಯ್ಣಾರ್ (2013), ತಿಯಾತ್ರ್ ಅಕಾಡೆಮಿಚೊ ’ಜೀವ್ ಆವ್ದೆಚ್ಯಾ ಸಾಧನಾಚೊ ಪುರಸ್ಕಾರ್’, ಗೊಂಯ್ಚ್ಯಾ ಸರ್ಕಾರಾಚೊ ಪುರಸ್ಕಾರ್ (2014) ಅಶೆಂ ಸಭಾರ್ ಪುರಸ್ಕಾರ್ ಆನಿ ಇನಾಮಾಂ ಆಪ್ಣಾಯ್ಲ್ಯಾಂತ್.