कलाकार [नीला तेलंग]

रचन एक कला तर रचणार ताचो कलाकार. एक बरी कला उभजजाय तर ताचेपाटल्यान कसली, कितली मिनत, आटोव तशेंच बलिदानां दीवंक पडतात म्हळ्ळें ह्या कवितेंत दिसोन येता. तशेंच मुरलिचे सूर सासणाच्या समधानाची वाट रुतां करून दिताना सत्यं शिवं सुंदरम चिंतप मतिंत कसले उमाळे उभजावंक सक्ता म्हळ्ळें ह्या कवितेंत पळेव्येत.

बाय नीला तेलंग गोंयची नामणेची कवयत्री, ओडिया भासेच्या कविताजम्याचें कोंकणीक अणकार करून दोन बूक हिणे पर्गटल्यात. साहितीक परिशद, सम्मेळनांनी ही सक्रीय जावन वांटो घेता. हिच्या ह्या दोन मटव्या कवितेंचो स्वाद पळेवंक, पार्कुंक तशेंच कवितेंतलो तिचो अनभोग जोडुंक तुका उलो दितां.

[कविता] कलाकार [नीला तेलंग]

कलाकार

कागदाचे कपटे

रंगांचे पटे

धोंपरभर कोयर

फापसल्लो पसारो जमनीर

कुडीचें रूप निरखिताली नदर

तांतूंतच उबो कोण एक कलाकार

नाक मुड्डीत दोळे

हेवटेन तेवटेन घुंवले

अकस्मात थिरावले

कॅनव्हासाक दसले

सासणाची सोबीतकाय

आकार घेताली थंय!

***

सत्यं शिवम् सुंदरम्

शास्वता खातीर शिरकलें कुंजवनांत

मुरलीचे स्वर मंजुळ धुंद मनांत

फुतफुतल्यो कुसुमकळयो कानांत

सुंगंधीत सुर सौम्य स्पर्शी सुमनांत

घमघमीत चंदन मंद पवनांत

खुळखुळ घुंगूर झरींच्या आलिंगनात

सत्यम् शिवम् सुंदरम् च्या चिंतनात

समाधान सामर्थ्य चिरंतनांत

- नीला तेलंग [जनेर, २०१९]

नीला तेलंग: बाय नीला तेलंग एम.ए. बी.एड शिकप जोडपी. ’काळजाची भर्ती’, ’शून्यांतल्यान शून्याकडेन’ म्हळ्ळे दोन कविताजमे हिणे ओडिया भाशेथावन (द‌वा सुपर्णा) कोंकणेक केल्लें अणकार. गोंयची नामणेची कवयत्री, काणियेगार्न, लेखकी. गोंयचा ’कला आनी संसकृती खातें’ थावन २०१६-१७ इस्वेचो कला गवरव पुरसकार हिका लाभला.