ಕಲಾಕಾರ್ [ನೀಲಾ ತೆಲಂಗ್]

ರಚನ್ ಏಕ್ ಕಲಾ ತರ್ ರಚಣಾರ್ ತಾಚೊ ಕಲಾಕಾರ್. ಏಕ್ ಬರಿ ಕಲಾ ಉಭ್ಜಜಾಯ್ ತರ್ ತಾಚೆಪಾಟ್ಲ್ಯಾನ್ ಕಸಲಿ, ಕಿತ್ಲಿ ಮಿನತ್, ಆಟೊವ್ ತಶೆಂಚ್ ಬಲಿದಾನಾಂ ದೀಂವ್ಕ್ ಪಡ್ತಾತ್ ಮ್ಹಳ್ಳೆಂ ಹ್ಯಾ ಕವಿತೆಂತ್ ದಿಸೊನ್ ಯೆತಾ. ತಶೆಂಚ್ ಮುರ್ಲಿಚೆ ಸುರ್ ಸಾಸಣಾಚ್ಯಾ ಸಮಧಾನಾಚಿ ವಾಟ್ ರುತಾಂ ಕರುನ್ ದಿತಾನಾ ಸತ್ಯಂ ಶಿವಂ ಸುಂದರಮ್ ಚಿಂತಪ್ ಮತಿಂತ್ ಕಸಲೆ ಉಮಾಳೆ ಉಭ್ಜಾಂವ್ಕ್ ಸಕ್ತಾ ಮ್ಹಳ್ಳೆಂ ಹ್ಯಾ ಕವಿತೆಂತ್ ಪಳೆವ್ಯೆತ್.

ಬಾಯ್ ನೀಲಾ ತೆಲಂಗ್ ಗೊಂಯ್ಚಿ ನಾಮಣೆಚಿ ಕವಯತ್ರಿ, ಒಡಿಯಾ ಭಾಸೆಚ್ಯಾ ಕವಿತಾಜಮ್ಯಾಚೆಂ ಕೊಂಕಣಿಕ್ ಅಣ್ಕಾರ್ ಕರುನ್ ದೋನ್ ಬೂಕ್ ಹಿಣೆ ಪರ್ಗಟ್ಲ್ಯಾತ್. ಸಾಹಿತಿಕ್ ಪರಿಶದ್, ಸಮ್ಮೇಳನಾಂನಿ ಹಿ ಸಕ್ರಿಯ್ ಜಾವ್ನ್ ವಾಂಟೊ ಘೆತಾ. ಹಿಚ್ಯಾ ಹ್ಯಾ ದೋನ್ ಮಟ್ವ್ಯಾ ಕವಿತೆಂಚೊ ಸ್ವಾದ್ ಪಳೆಂವ್ಕ್, ಪಾರ್ಕುಂಕ್ ತಶೆಂಚ್ ಕವಿತೆಂತ್ಲೊ ತಿಚೊ ಅನ್ಭೋಗ್ ಜೊಡುಂಕ್ ತುಕಾ ಉಲೊ ದಿತಾಂ.

[ಕವಿತಾ] ಕಲಾಕಾರ್ [ನೀಲಾ ತೆಲಂಗ್]

ಕಾಗ್ದಾಚೆ ಕಪ್ಟೆ

ರಂಗಾಂಚೆ ಪಟೆ

ಧೊಂಪರ್‌ಭರ್ ಕೊಯ್ರ್

ಫಾಪ್ಸಾಲ್ಲ್ಯೊ ಪಸಾರೊ ಜಮ್ನೀರ್

ಕುಡೀಚೆಂ ರೂಪ್ ನಿರ್ಖಿತಾಲಿ ನದರ್

ತಾಂತೂಂತಚ್ ಉಬೊ ಕೊಣ್ ಎಕ್ ಕಲಾಕಾರ್

ನಾಕ್ ಮುಡ್ಡೀತ್ ದೊಳೆ

ಹ್ಯೆ ವಾಟೆನ್ ತ್ಯೇ ವಾಟೆನ್ ಘುಂವ್ಲೆ

ಅಕಸ್ಮಾತ್ ಥಿರಾವ್ಲೆ

ಕೆನ್ವಾಸಾಂಕ್ ದಸ್ಲೆ

ಸಾಸ್ಣಾಚಿ ಸೊಬೀತಕಾಯ್

ಆಕಾರ್ ಘೆತಾಲಿ ಥಂಯ್!

ಸತ್ಯಂ ಶಿವಮ್ ಸುಂದರಮ್

ಶಾಸ್ವತಾ ಖಾತೀರ್ ಶಿರ್ಕಲೆಂ ಕುಂಜವ್ನಾಂತ್

ಮುರ್ಲೀಚೆ ಸ್ವರ್ ಮಂಜುಳ್ ಧುಂದ್ ಮನಾಂತ್

ಫುತ್ಫುತ್ಲ್ಯೊ ಕುಸುಮಕಳಯೊ ಕಾನಾಂತ್

ಸುಂಗಂಧೀತ್ ಸುರ್ ಸೌಮ್ಯ್ ಸ್ಪರ್ಶಿ ಸುಮ್ನಾಂತ್

ಘಮ್ಘಮೀತ್ ಚಂದನ್ ಮಂದ್ ಪವ್ನಾಂತ್

ಖುಳ್ಖುಳ್ ಘುಂಗೂರ್ ಝರೀಂಚ್ಯಾ ಆಲಿಂಗನಾತ್

ಸತ್ಯಮ್ ಶಿವಮ್ ಸುಂದರಮ್ ಚ್ಯಾ ಚಿಂತ್ನಾತ್

ಸಮಾಧಾನ್ ಸಾಮರ್ಥ್ಯ್ ಚಿರಂತನಾಂತ್

- ನೀಲಾ ತೆಲಂಗ್ [ಜನೆರ್, 2019]

ನೀಲಾ ತೆಲಂಗ್: ಬಾಯ್ ನೀಲಾ ತೆಲಂಗ್ ಎಮ್.ಎ. ಬಿ.ಎಡ್ ಶಿಕಪ್ ಜೊಡ್ಪಿ. ’ಕಾಳ್ಜಾಚಿ ಭರ್ತಿ’, ’ಶೂನ್ಯಾಂತ್ಲ್ಯಾನ್ ಶೂನ್ಯಾಕಡೆನ್’ ಮ್ಹಳ್ಳೆ ದೋನ್ ಕವಿತಾಜಮೆ ಹಿಣೆ ಒಡಿಯಾ ಭಾಶೆಥಾವ್ನ್ (ದ್‌ವಾ ಸುಪರ್ಣಾ) ಕೊಂಕ್ಣೆಕ್ ಕೆಲ್ಲೆಂ ಅಣ್ಕಾರ್. ಗೊಂಯ್ಚಿ ನಾಮ್ಣೆಚಿ ಕವಯತ್ರಿ, ಕಾಣಿಯೆಗಾರ್ನ್, ಲೇಖಕಿ. ಗೊಂಯ್ಚಾ ’ಕಲಾ ಆನಿ ಸಂಸ್ಕೃತಿ ಖಾತೆಂ’ ಥಾವ್ನ್ 2016-17 ಇಸ್ವೆಚೊ ಕಲಾ ಗವ್ರವ್ ಪುರಸ್ಕಾರ್ ಹಿಕಾ ಲಾಭ್ಲಾ.