ಕಾವ್ಳೊ ಶೆರ್‍ಮೆಲೊ (- ಪ್ರೇಮ್ ಮೋರಸ್)

[ಕವಿತಾ] ಕಾವ್ಳೊ ಶೆರ್‍ಮೆಲೊ (- ಪ್ರೇಮ್ ಮೋರಸ್)

ಕವಿತೆಂತ್ ಮನ್ಶಾಚೆ ಗೂಣ್-ಅವ್ಗುಣ್, ಸ್ವಭಾವ್-ಸವಯೆಂಕ್ ಇಮೇಜಿಂ ರುಪಾರ್ ಸಾದರ್ ಕರ್ಚಿ ಕಲಾ ವೆಗ್ಳಿಚ್ ಕಲಾ. ಹಾಂಗಾಸರ್ ಸಮಾಜೆಚಿ ಪ್ರಸ್ತುತ್ ಹಕೀಗತ್ ಎಕಾ ಕಾವ್ಳ್ಯಾಚ್ಯಾ ಇಮಾಜಿಂತ್ ವಿಡಂಬನಾತ್ಮಕ್ ರಿತಿನ್ ವೆಕ್ತ್ ಕೆಲ್ಲೆಂ ದಿಸುನ್ ಯೆತಾ. ಕವಿಚಿ ಪಯ್ಲಿ ಜವಾಭ್ದಾರಿ ಸತ್‌ಚ್ ಉಲಂವ್ಚಿ ಶಿವಾಯ್ ಫಟ್‌ಚ್ ನ್ಹಯ್ ಮ್ಹಳ್ಳೆಂ ಹ್ಯಾ ಕವಿತೆಂತ್ ದಿಸುನ್ ಯೆತಾ.

[ಕವಿತಾ] ಕಾವ್ಳೊ ಶೆರ್‍ಮೆಲೊ (- ಪ್ರೇಮ್ ಮೋರಸ್)

ಕಾವ್ಳೊ ಶೆರ್‍ಮೆಲೊ

ಕಾವ್ಳ್ಯಾಚ್ಯಾ ಆವ್ಕಾನ್ ಶಿರ್‍ಲೆಚ್ಯಾ ರುಪ್ಣ್ಯಾನ್

ತೊ ಪಾಳ್ಣ್ಯಾಂತ್ ಧಲ್ತಾನಾ

ಚಿರ್ಪುಟ್ಯಾ ಹಾಸ್ಯಾಂನಿ ಮಾಂಕ್ಡಾಚ್ಯಾ

ಸೊಂಡ್ಯೆನ್ ಧಲಯ್ಲೆಂ ಪೊರ್ಬುನ್

ಥೊಡೊ ವೇಳ್ ಜಾತಚ್ ಕಿಂಕ್ರಾಟ್ಯಾಂನಿ ರಡ್ಲೊ

ನೆಣ್ತ್ಯಾ ಮಿಂಗೆಲಿಕ್ ಖಾಂದ್ಯಾರ್ ಆಸ್ರೊ ಮೆಳ್ತಾನಾ

ಆವಯ್ಚಾ ಭುಜಾಂಚೆರ್ ಸುಶೆಗಾತಾನ್ ನಿದ್ಲೊ

ಶಿರ್‍ಲೆಚ್ಯಾ ರುಪಾನ್ ಚಿರ್ಪುಟ್ಯೊ ಹಾಸೊ ಕಿರ್‍ಲಾಲ್ಯೊ

ಲೊಕಾಕ್ ತೊ ನೆಂಟೊ, ಆವಯ್ಕ್ ರಡ್ಣ್ಯಾಚೊ ಗುಮ್ಟೊ

ಬಾಪಾಯ್ಚ್ಯಾ ಖಾಂದ್ಯಾರ್ ತೊ ಮೊಗಾಳ್ ಜಾಂಟೊ

ಇಜಿಚೆರಾರ್ ಬಸ್ಲೆಲ್ಯಾ ಆಬಾಕ್ ಫಟಯ್ತಾ

ಎಕಾ ರಡ್ಣ್ಯಾನ್ ಸೆಜಾರ್‍ಚಾ ಲೊಕಾಕ್ ಜಾಗಯ್ತಾ

ಕಾವ್ಳ್ಯಾಚೆಂ ಆವ್ಕ್ ಭರುನ್ ಆಯ್ಲೆಂ ದಿಂಡ್ಯಾ ಮಾನಾಯ್ಕ್

ಧವ್ಯಾ ನೆಸ್ಣಾನ್ ಸೊಭಯ್ಲೆಂ ಶಿರ್‍ಲೆಚ್ಯಾ ರುಪ್ಣ್ಯಾಕ್

ಸುಕ್ಣ್ಯಾ ಪಯ್ಕಿ ಸುಕ್ಣೆಂ, ಬುದ್ವಂತ್ ಸುಕ್ಣೆಂ

ಮಿಂಗೆಲಿಚ್ಯಾ ಧಾದೊಶಿ ಮನಾಕ್ ಕಾವ್ಳ್ಯಾಚೆಂ ಮನ್ ಪಿಕ್ಲೆಂ

ಕಾ, ಕಾ, ಕಾ, ಕಾ ಕಾವ್ಳ್ಯಾಂಚಿ ರಾಸ್

ಏಕ್ ಮೂಟ್ ಶಿತಾಕ್ ಸರ್ವಾಂಚೊ ಸಂತೊಸ್

ಎಕ್ವಟಾನ್ ರಾವ್ಯಾಂ ಧಾದೊಶಿ ಜೆವ್ಯಾಂ

ದೆವಾನ್ ದಿಲಾಂ ಸರ್ವಾಂಕ್ ಪೊಟ್ ಭರ್‍ಯಾಂ

ಮನ್ಶ್ಯಾನ್ ವಾಂಟ್ಲ್ಯೊ ಪೊಟ್ಲ್ಯಾನ್ ಪೊಟ್ಲ್ಯೊ

ರಸ್ತ್ಯಾರ್ ಭುಖೆಲ್ಲ್ಯಾಂಕ್ ಜೆವ್ಣಾಚ್ಯೊ ವಾಟ್ಲ್ಯೊ

ಕೊರೊನಾ ಪಿಡೆಂತ್ ದೇಶ್ ಥಾಂಬ್ಲೊ

ಮನ್ಶ್ಯಾಚೆಂ ಮನ್ ಪಳೆವ್ನ್ ಕಾವ್ಳೊ ಶೆರ್‍ಮೆಲೊ

ದಾನ್ ದಿತಾನಾ ಮಾನ್ ಧಾಂಪುಂಕ್ ಧವಿ ಮುಸ್ತಾಯ್ಕಿ

ತಸ್ವೀರೆ ಮುಕಾರ್ ಸೊಭ್ತಾತ್ ದಿಂಡೆ ಮಾನಾಯ್ ನಿಜಾಯ್ಕಿ

ತುಂ ಕಾವ್ಳ್ಯಾಚೆಂ ಆವ್ಕ್ ಘೆಶಿ

ತುಂ ಕಾವ್ಳ್ಯಾಚೆಂ ರೂಪ್ ಘೆಶಿ

ತುಂ ಕಾವ್ಳ್ಯಾಚಿ ಬೂದ್ ಸಯ್ತ್ ಘೆಶಿ

ಹೆಂ ಸರ್ವ್ ಘೆವುನ್ ಮಾನೆಸ್ತ್/ಮಾನಾದಿಕ್ ಜಾಶಿ

ಅರೆ ಪಾಪ್ಯಾ ಕಾವ್ಳ್ಯಾಚೆಂ ಧಾದೊಶಿ ಮನ್...

ತುಜೆ ಧಾ-ದೊಶಿ ಗುಣ್

- ಪ್ರೇಮ್ ಮೋರಸ್. [ಜುಲಾಯ್, 2020]