ಜಿವಿತ್ ಕವಿತಾ [ಸುನೇತ್ರಾ ಜೋಗ್]

ಜೆದ್ನಾಂ ’ಜಿವಿತ್’ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಸಮ್ಜತಾ ತೆದ್ನಾಂ ’ಕವಿತಾ’ ಅಪ್ಶಿಚ್ ಉದೆತಾ ಮಾತ್ರ್ ನ್ಹಯ್, ತಿ ಕವಿತಾ ಉಲಂವ್ಕ್ ಲಾಗ್ತಾ.

ಸಮಾಜೆಂತ್ ’ಕವಿ’ ಮ್ಹಳ್ಳೆ ಏಕ್ ವೆಗ್ಳೊ ಮನಿಸ್. ತಾಚಿ ದೀಶ್ಟ್ ವೆಗ್ಳಿ, ತಾಚಿ ಸಮ್ಜಣಿ ವೆಗ್ಳಿ, ತಾಚಿ ತಾನ್-ಭುಕ್ ವೆಗ್ಳಿ. ದೆಕೂನ್ ಜಾಣಾರಿ ಸಾಂಗ್ತಾತ್; ’ರವಿನ್ ದೆಖಾನಾಸ್ಚೆಂ ಕವಿ ದೆಖುಂಕ್ ಸಕ್ತಾ’.

ಹಾಂಗಾಸರ್‌ಯೀ ಅಸಲಿಚ್ ಕವಿತಾ ಆಸಾ, ಜಿ ಜಿವಿತಾವಿಶಿಂ ಸಮ್ಜಯ್ತಾ, ಆನಿ ಏಕ್ ಕವಿತಾ ಕಶಿ ಸಮ್ಜುವೆತಾ ಮ್ಹಳ್ಳೆವಿಶ್ಯಾಂತ್ ಸಾಂಗ್ತಾ. ಬಾಯ್ ಸುನೇತ್ರಾ ಜೋಗ್ ಗೊಂಯ್ಚಿ ಏಕ್ ನಾಮ್ಣೆಚಿ ತರ್ಜಣ್‌ಕಾರ್ನ್, ಬರವ್ಪಿಣ್, ಕವಯತ್ರಿ. ತಿಚ್ಯಾ ಕವಿತೆಚೊ ಸ್ವಾದ್ ಚಾಕುಂಕ್ ಆತಾಂ ತುಮ್ಕಾಂಚ್ ಸೊಡ್ತಾಂ.

[ಕವಿತಾ] ಜಿವಿತ್ ಕವಿತಾ [ಸುನೇತ್ರಾ ಜೋಗ್]

ಹಾಲಿಂ ಹಾಲಿಂ ಮ್ಹಾಕಾ ಮಾತ್ಶೆಂ ಜಿವಿತ್ ಕಳೂಂಕ್ ಲಾಗ್ಲಾಂ

ಕೊಣ್ ಕೊಣಾಚೊ ನಾಸ್ತಾ ಹೆಂ ಸತ್ಯ್ ಹೊಲ್ಮೂಂಕ್ ಲಾಗ್ಲಾಂ

ಘೊವ್, ಬಾಯ್ಲ್, ಧೂವ್, ಪೂತ್ ಸಗ್ಳಿಂ ನಾತಿಂ ಫಟ್

ಸಗ್ಳ್ಯಾಂ ವಾಂಗಡಾ ಆಸೂನ್ ಲೆಗೀತ್ ಎಕ್ಟೆಂ ದಿಸೂಂಕ್ ಲಾಗ್ಲಾಂ..

ಆಪ್ಲೆ ಮ್ಹಣೂನ್ ಜಾಂಚೊ ಕೆಲೊ ಮೊಗ್ ಆಯ್ಜಮೆರೆನ್

ತಾಂಕಾಂ ಲೆಗೀತ್ ಆತಾಂ ಮ್ಹಜೆಂ ವೊಜೆಂ ಜಾವಂಕ್ ಲಾಗ್ಲಾಂ

ಧ್ಯಾಸ್ ಎಕ್ ಮನಾಂತ್ ಘೆವ್ನ್ ಜೀವ್ ಜಳಯ್ಲೊ

ಆತಾಂ ದಿಸ್ತಾ ಖಂಯ್ತರಿ ಮ್ಹಜೆಂಚ್ ಚುಕೂಂಕ್ ಲಾಗ್ಲಾಂ..

ಕಾಳ್ಜಾಂತ್ಲ್ಯಾನ್ ದೆಖಿಲ್ಲೆಂ ಸೊಬೀತ್ ಸುಂದರ್ ಸಪನ್

ಪೂರಾಯ್ ನಾ ಜಾಯ್ತ್ ಹ್ಯಾ ಭಂಯಾನ್ ಕಾಳೀಜ್ ರಡೂಂಕ್ ಲಾಗ್ಲಾಂ..

ದುಃಖ್ ಮ್ಹಜೆಂ ಉತ್ರಾಂ ಜಾವ್ನ್ ಜೆನ್ನಾ ಯೆವಂಕ್ ಲಾಗ್ಲಾಂ

ಹಾಂವ್ ತಾಕಾ ಎಕ್ ಬರಿ ಕವಿತಾ ಸಮ್ಜೂಂಕ್ ಲಾಗ್ಲಾಂ....

- ಸುನೇತ್ರಾ ಜೋಗ್ [ಜ್ಯೂನ್ 2018]