ಕವಿತಾकविताPoem

जीण कोणाक नाका व्हय? (- एच. मनोज जे)

[कविता] जीण कोणाक नाका व्हय? (- एच. मनोज जे)

जीण म्हळ्यार फकत अपूण, अपणाचें आनी अपणाखातीर म्हळ्ळ्या सुराती चिंतपान जियेतेल्यांक एक घडी चिंतुंक कर्ची कविता ही. आमी शिकून आयिल्लीं लिसांवां फकत बुकांनी कयद मात्र आसचीं वा तीं केदना तर‌यी पाळुंक आसचीं? हेच सवालांचेर उभी केल्ली कविता ही.

[कविता] जीण कोणाक नाका व्हय? (- एच. मनोज जे)

जीण कोणाक नाका व्हय?

संवसार तीचो उक्तडार

भुरगीं उघडी नागडी तीन चार

पोटाची खळगी भरुंक

ना कोणाचो आदार

कोणुंय वाटसूरो उडयता

पाच दा रुपय हातार

तरी ती मानता देवाचे उपकार

जीण तीका नाका व्हय?

बाबडो जाणटो घरचो आंथरुणार

दुयेंसानी ताका लायला फांस

दिता दोतोर वखदां खास

भुरगीं बाळां नातरां पोणटुरां

मागता मागणे, देवा सुटका कर

पूण जाणटो मागता नातीचें

लग्न पळोवंक सायबा दवर

जीण कोणाक नाका व्हय?

अकस्मात तुटलो तीचो म्हुर्तमणी

ताचे विणे जीण अळणी अळणीशी

सानुलें मोगाचें प्रतीक तीचे व्हटयेंत

घोवाच्यो यादी लायता भुलवणी

आतां जिण फकत ताच्या उगडासानी

करुंक बरो फुडार त्या धाकल्या जिवाचो

दिता आदार तीचो आत्मविश्वास

जीण तीका नाका व्हय?

जल्माक येत सावन

मनीसजात हांगा जियेता

रचतल्यान ही संद

सगल्यांक फावो केल्यात

सैमांतली जण एक वस्त

भोगपाक आमी आतुरता

तीची जतनाय घेवंक

कित्याक आमी फाटीं सरता?

जीण कोणाक नाका व्हय?

जीण फकत मनशांक व्हय?

ती तर सगल्यांक सारकीच

धरतरेवेल्या जण एक जीवांक

जगूंक जाय होच नेम

मनशान पाळपाक जाय

तांकाय जगपाक आदार दिव जाय

सैम राखपाचो होच उपाय

जीण कोणाक नाका व्हय?

आपली जीण सोबोवंक

जण एकलो झटता

एकामेकाक आदार दित जाल्यार

घडटा बरो फुडार

गरीब तसोच पयशेकार

करीत बरो वावर

जातली जीण साकार

जीण कोणाक नाका व्हय?

- एच. मनोज जे. [माय, २०२०]