Jinn [Kironn Mhambre]

Zaiteamni jinnyevixeant zaitem boroilam. Konnak jinnem fulanchi gojddi tor konnak kantteanchi. Konnak choddnni tor konnak demvnni. Konn hasta tor konn roddta punn konnachench jinne ek sarkem asana. Dis somptoch rat, toxench horek rat somptoch dis astoloch.

Bai kironn mhambre gõychi namnnechi torzonn‌kar, kanniegar, toxench kovi. Hi kovita horek pauttim vachtana ek novench rup dolleamsomor ubhem zata. Dekun hea kovitechi sokot toxench gunddai somzunk porot ek pauttim vachunk korta. Ani vach‌l'leporinch kovitechi sobhai doddti zata. Hi sobhai chakunk tukach soddtam.

[Kovita] Jinn  [Kironn Mhambre]

Jinn

eka monn'nnar mathear ximvr

fulancho pormollit

tech vatter dusrea monn'nnar

payank kantte kuchkuchit

jinn!

jinnechi vatt opekxank somantor

opekxa nirontor

na divcheo jinnek ontor

jinn!

deger rang sopnanchi

vatter pennim huppachim

jinnent bhomvre bhomvreant jinn

konnacho rag konnacho xinn

jinn!

bhaunechea bhorant

utthaboxo ratdis

upkarachea vojeamullant

ken'na jivo khasavis

jinn!

ek fautt fatt vollun

jinn zokhta bhutkall

soxil'le ghai ani

kel'lea varanchi kholai

har zoit, zoit har

har zoitachi korondai

monachea kxitizar

ek kalliz roktobomball

jinn!

jinn gaita mhomvall git

jinnechim pakham rongit

jinneche gorbhokuddint

kaim yadi obadhit

- Kironn Mhambre [Janer, 2019]

Kironn Mhambre: Gõychi namnnechi kannyegar, kovi ani torzonn‌kar. ’Soimangonnant’ hicho porgott‌l'lo kovitazomo. Hech kovitazomeak konkonni bhaxa monddollacho puroskar labhla. Gõychea choddtavo potramni hichim borpam porgott zaun asat. Konkonni vortulant kareall zaunasa.