जीण [किरण म्हांबरे]

जायत्यांनी जिण्येविश्यांत जायतें बरयलां. कोणाक जिणें फुलांची गजडी तर कोणाक कांट्यांची. कोणाक चडणी तर कोणाक देंवणी. कोण हासता तर कोण रडता पूण कोणाचेंच जिणे एक सार्कें आसाना. दीस संप्तच रात, तशेंच हरेक रात संप्तच दीस आसतलोच.

बाय किरण म्हांबरे गोंयची नामणेची तर्जण‌कार, काणियेगार, तशेंच कवी. ही कविता हरेक पावटीं वाचताना एक नवेंच रूप दोळ्यांसमोर उभें जाता. देकून ह्या कवितेची सकत तशेंच गुंडाय समजुंक परत एक पावटीं वाचुंक कर्ता. आनी वाच‌ल्लेपरिंच कवितेची सोभाय दोडती जाता. ही सोभाय चाकुंक तुकाच सोडतां.

[कविता] जीण [किरण म्हांबरे]

जीण

एका मोण्णार माथ्यार शिंवर

फुलांचो परमळीत

तेच वाटेर दुसऱ्या मोण्णार

पायांक कांटे कुचकुचीत

जीण!

जिणेची वाट अपेक्षांक समांतर

अपेक्षा निरंतर

ना दिवच्यो जिणेक अंतर

जीण!

देगेर रांग सपनांची

वाटेर पेणीं हुपपाचीं

जिणेंत भोंवरे भोंवऱ्यांत जीण

कोणाचो राग कोणाचो शीण

जीण!

भावनेच्या भरांत

उठाबशो रातदीस

उपकाराच्या वज्यामुळांत

केन्ना जीव खासावीस

जीण!

एक फावट फाट वळून

जीण जोखता भूतकाळ

सोशिल्ले घाय आनी

केल्ल्या वारांची खोलाय

हार जैत, जैत हार

हार जैताची करंदाय

मनाच्या क्षितिजार

एक काळीज रक्तबंबाळ

जीण!

जीण गायता म्होंवाळ गीत

जिणेचीं पाखां रंगीत

जिणेचे गर्भकुडींत

कांय यादी अबाधीत

- किरण म्हांबरे [जनेर, २०१९]

किरण म्हांबरे: गोंयची नामणेची काण्येगार, कवी आनी तर्जण‌कार. ’सैमांगणांत’ हिचो पर्गट‌ल्लो कविताजमो. हेच कविताजम्याक कोंकणी भाशा मंडळाचो पुरसकार लाभला. गोंयच्या चडताव पत्रांनी हिचीं बर्पां पर्गट जावन आसात. कोंकणी वर्तुलांत काऱ्याळ जावनासा.