ಜೀಣ್ [ ಕಿರಣ್ ಮ್ಹಾಂಬ್ರೆ]

ಜಾಯ್ತ್ಯಾಂನಿ ಜಿಣ್ಯೆವಿಶ್ಯಾಂತ್ ಜಾಯ್ತೆಂ ಬರಯ್ಲಾಂ. ಕೊಣಾಕ್ ಜಿಣೆಂ ಫುಲಾಂಚಿ ಗಜ್ಡಿ ತರ್ ಕೊಣಾಕ್ ಕಾಂಟ್ಯಾಂಚಿ. ಕೊಣಾಕ್ ಚಡ್ಣಿ ತರ್ ಕೊಣಾಕ್ ದೆಂವ್ಣಿ. ಕೊಣ್ ಹಾಸ್ತಾ ತರ್ ಕೊಣ್ ರಡ್ತಾ ಪುಣ್ ಕೊಣಾಚೆಂಚ್ ಜಿಣೆ ಏಕ್ ಸಾರ್ಕೆಂ ಆಸಾನಾ. ದೀಸ್ ಸಂಪ್ತಚ್ ರಾತ್, ತಶೆಂಚ್ ಹರೇಕ್ ರಾತ್ ಸಂಪ್ತಚ್ ದೀಸ್ ಆಸ್ತಲೊಚ್.

ಬಾಯ್ ಕಿರಣ್ ಮ್ಹಾಂಬ್ರೆ ಗೊಂಯ್ಚಿ ನಾಮ್ಣೆಚಿ ತರ್ಜಣ್‌ಕಾರ್, ಕಾಣಿಯೆಗಾರ್, ತಶೆಂಚ್ ಕವಿ. ಹಿ ಕವಿತಾ ಹರೇಕ್ ಪಾವ್ಟಿಂ ವಾಚ್ತಾನಾ ಏಕ್ ನವೆಂಚ್ ರೂಪ್ ದೊಳ್ಯಾಂಸಮೊರ್ ಉಭೆಂ ಜಾತಾ. ದೆಕುನ್ ಹ್ಯಾ ಕವಿತೆಚಿ ಸಕತ್ ತಶೆಂಚ್ ಗುಂಡಾಯ್ ಸಮ್ಜುಂಕ್ ಪರತ್ ಏಕ್ ಪಾವ್ಟಿಂ ವಾಚುಂಕ್ ಕರ್ತಾ. ಆನಿ ವಾಚ್‌ಲ್ಲೆಪರಿಂಚ್ ಕವಿತೆಚಿ ಸೊಭಾಯ್ ದೊಡ್ತಿ ಜಾತಾ. ಹಿ ಸೊಭಾಯ್ ಚಾಕುಂಕ್ ತುಕಾಚ್ ಸೊಡ್ತಾಂ.

[ಕವಿತಾ] ಜೀಣ್ [ಕಿರಣ್ ಮ್ಹಾಂಬ್ರೆ]

ಜೀಣ್

ಎಕಾ ಮೊಣ್ಣಾರ್ ಮಾಥ್ಯಾರ್ ಶಿಂವ್ರ್

ಫುಲಾಂಚೊ ಪರ್ಮಳೀತ್

ತೆಚ್ ವಾಟೆರ್ ದುಸ್ರ್ಯಾ ಮೊಣ್ಣಾರ್

ಪಾಯಾಂಕ್ ಕಾಂಟೆ ಕುಚ್ಕುಚೀತ್

ಜೀಣ್!

ಜಿಣೆಚಿ ವಾಟ್ ಅಪೆಕ್ಷಾಂಕ್ ಸಮಾಂತರ್

ಅಪೆಕ್ಷಾ ನಿರಂತರ್

ನಾ ದಿವ್ಚ್ಯೊ ಜಿಣೆಕ್ ಅಂತರ್

ಜೀಣ್!

ದೆಗೆರ್ ರಾಂಗ್ ಸಪ್ನಾಂಚಿ

ವಾಟೆರ್ ಪೆಣಿಂ ಹುಪ್ಪಾಚಿಂ

ಜಿಣೆಂತ್ ಭೊಂವ್ರೆ ಭೊಂವ್ರ್ಯಾಂತ್ ಜೀಣ್

ಕೊಣಾಚೊ ರಾಗ್ ಕೊಣಾಚೊ ಶೀಣ್

ಜೀಣ್!

ಭಾವ್ನೆಚ್ಯಾ ಭರಾಂತ್

ಉಠಾಬಶೊ ರಾತ್ದೀಸ್

ಉಪ್ಕಾರಾಚ್ಯಾ ವಜ್ಯಾಮುಳಾಂತ್

ಕೆನ್ನಾ ಜೀವ್ ಖಾಸಾವೀಸ್

ಜೀಣ್!

ಎಕ್ ಫಾವ್ಟ್ ಫಾಟ್ ವಳೂನ್

ಜೀಣ್ ಜೊಖ್ತಾ ಭೂತ್ಕಾಳ್

ಸೊಶಿಲ್ಲೆ ಘಾಯ್ ಆನಿ

ಕೆಲ್ಲ್ಯಾ ವಾರಾಂಚಿ ಖೊಲಾಯ್

ಹಾರ್ ಜೈತ್, ಜೈತ್ ಹಾರ್

ಹಾರ್ ಜೈತಾಚಿ ಕರಂದಾಯ್

ಮನಾಚ್ಯಾ ಕ್ಷಿತಿಜಾರ್

ಎಕ್ ಕಾಳೀಜ್ ರಕ್ತಬಂಬಾಳ್

ಜೀಣ್!

ಜೀಣ್ ಗಾಯ್ತಾ ಮ್ಹೊಂವಾಳ್ ಗೀತ್

ಜಿಣೆಚಿಂ ಪಾಖಾಂ ರಂಗೀತ್

ಜಿಣೆಚೆ ಗರ್ಭಕುಡೀಂತ್

ಕಾಂಯ್ ಯಾದಿ ಅಬಾಧೀತ್

- ಕಿರಣ್ ಮ್ಹಾಂಬ್ರೆ [ಜನೆರ್, 2019]

ಕಿರಣ್ ಮ್ಹಾಂಬ್ರೆ: ಗೊಂಯ್ಚಿ ನಾಮ್ಣೆಚಿ ಕಾಣ್ಯೆಗಾರ್, ಕವಿ ಆನಿ ತರ್ಜಣ್‌ಕಾರ್. ’ಸೈಮಾಂಗಣಾಂತ್’ ಹಿಚೊ ಪರ್ಗಟ್‌ಲ್ಲೊ ಕವಿತಾಜಮೊ. ಹೆಚ್ ಕವಿತಾಜಮ್ಯಾಕ್ ಕೊಂಕಣಿ ಭಾಶಾ ಮಂಡಳಾಚೊ ಪುರಸ್ಕಾರ್ ಲಾಭ್ಲಾ. ಗೊಂಯ್ಚ್ಯಾ ಚಡ್ತಾವ್ ಪತ್ರಾಂನಿ ಹಿಚಿಂ ಬರ್ಪಾಂ ಪರ್ಗಟ್ ಜಾವ್ನ್ ಆಸಾತ್. ಕೊಂಕಣಿ ವರ್ತುಲಾಂತ್ ಕಾರ್ಯಾಳ್ ಜಾವ್ನಾಸಾ.