ಹುಸ್ಕೊ (- ಅತಿಶಾ ಸುರ್ಲೀಕಾರ್)

[ಕವಿತಾ] ಹುಸ್ಕೊ (- ಅತಿಶಾ ಸುರ್ಲೀಕಾರ್)

ಮನಿಸ್ ಅಪ್ಣಾಕ್ ಮರಣ್‌ಚ್ ನಾ ಮ್ಹ್ಳ್ಳೆಂ ಚಿಂತನಾಂನಿ ಧಾಂವ್ಣೆರ್ ಆಸ್ಲೊ. ಕೊಣಾಚಿಚ್ ವ ಕಸಲ್ಯಾಚಿಚ್ ಫಿಕಿರ್ ನಾಸ್ತಾನಾ ಅಪುಣ್‌ಚ್ ವರ್ತೊ ಮ್ಹಣುನ್ ಧರ್ತೆಕ್ ಮುಟಿಂಬ್ ಧರುನ್ ಚಂದ್ರ ತಾರಾಂಕ್ ಸಯ್ತ್ ಅಪ್ಲೆ ತಾಬೆಂತ್ ಧರುಂಕ್ ಚಿಂತುನ್ ಆಸ್ತಾನಾಂಚ್ ಏಕ್ ಲ್ಹಾನ್ ವಯ್ರಸಾನ್, ಜ್ಯೆಂ ಕೊಣಾಕ್‌ಚ್ ದಿಸಾನಾಸ್ಚೆಂ ವಯ್ರಸ್, ಅಖ್ಖ್ಯಾ ಸಂಸಾರಾಕ್ ಆಜ್ ಇತ್ಲ್ಯಾ ಭಿರಾಂತಿಚೆ ದೀಸ್ ದೀಂವ್ಕ್ ಪಾವ್ಲೆಂ ಮ್ಹಳ್ಯಾರ್ ದರೇಕ್ ಮನೀಸ್ ಅಪ್ಲ್ಯಾಚ್ ಘರಾಂತ್ ಬಂಧಿ ಜಾತಾನಾ ಅಪಣಾಥಾವ್ನ್ ವಿವಿಧ್ ರಿತಿಚ್ಯಾ ಬಂಧ್ಖಣೆಕ್ ದಿಲ್ಲ್ಯೊ ಯಾದಿ ಕಾಡುನ್ ಸಾರುಂಕ್ ಪಡ್ಚೆಂ ಕಿತ್ಲೆಂ ವಿಪರ್ಯಾಸ್ ನ್ಹಯ್?

ಬಾಯ್ ಆತಿಶಾ ಸುರ್ಲೀಕಾರ್ ವೃತ್ತೆನ್ ಏಕ್ ಶಿಕ್ಷಕಿ ದೆಕುನ್ ಹಿಚ್ಯಾ ಕವಿತೆಚೆಂ ಲಿಸಾಂವ್ ಸಮೇಸ್ತಾಂಕ್ ಗಮ್ತೆಲೆಂ ಮ್ಹಳ್ಳೊ ಮ್ಹಜೊ ಭರ್ವಸೊ.

[ಕವಿತಾ] ಹುಸ್ಕೊ (- ಅತಿಶಾ ಸುರ್ಲೀಕಾರ್)

ಹುಸ್ಕೊ

ಬಂದ್ಖಣೀತಲಿ ಜೀಣ್ ಕಿರಾ

ಆತಾ ಕಳುನ್ ಆಯ್ಲಿ

ಸ್ವತಾ ಬಂದ್ಖಣ್ ಭೊಗ್ತನಾ

ತಳ್ಮಳ್ ತುಜಿ ಸಮ್ಜಲಿ..

ಕೆಲ್ಲ್ಯಾ ಮಾಪಾನ್ ಭರ್ತಲಿ

ಬಿರ್ಮುತ್ ರೆ ಕಿರಾ ಫುಟ್ಟಲಿ

ಕಾಮ್ ಧಂದೊ ಸೊಡೂನ್

ಸಗ್ಳಿ ಘರಾ ಬಸ್ತಲಿ ..

ಶಿರಾಪ್ ತೆ ಸೈಮಾಚೆ

ಲಾಗ್ಲೆ ಬೆಭಾನ್ ಮನ್ಶಾಕ್ ರೆ

ಸೈಮ್ ಮೆಕ್ಳೊ ಸ್ವಾಸ್ ಘೆತಾ

ಆಮಿ ಭೊಗ್ತಾ ಬಂದ್ಖಣ್ ರೆ..

ಪಳೊವ್ ನಜೊ ಕ್ವೊರೆಂಟಾಇನ್ ಜೀಣ್

ಹಾಸತ್ ಖೆಳತ್ ಸಾರ್ತಾ ಖೀಂಣ್

ಹುಸ್ಕ್ಯಾ ಮೆಕ್ಳೊ ಜಾವ್ನಾ ಆಜುನ್

ದಗ್ ದಗ್ ಪೊಟಾನ್ ಬಸ್ಲಾ ಫುಗೂನ್...

ದಿಸವ್ಡ್ಯಾಚೆರ್ ಭಾಗಯ್ತಾಲೊ

ಜೆವ್ಣಾಂ ಖಾಣಾಂಚೊ ಶೀಣ್

ಫಾರೀಕ್ ಕಶೆ ಜಾತ್ಲೆ?

ಬುಡ್ಡೀಲ್ಲೆ ತೆ ರೀಣ್....

ರಾಂಧ್ಲಿ ಪೆಜ್, ಭಾಜ್ಲೆಂ ಖಾರೆಂ

ದೊಂಗರ್ ಪೊರ್ಸಾಂತಲೆ ಹಾಡ್ಲೆ ವಜೆಂ

ಕೊಣೆ ಶಿವ್ರಾಕ್ ತರ್

ಕೊಣೆಂ ಸುರ್ಬುಸ್ ಖಾಲೆಂ ನುಸ್ತೆಂ...

ಕಿತ್ಲೆ ದೀಸ್ ಅಶೆ ಚಲ್ತಲೆಂ?

ಹುಸ್ಕಯಾಚೆ ದೀಸ್ ಕೆನ್ನಾ ಸೊಪ್ತಲೆ?

ಘರಾಂತ್ ಬಸುನ್ ಕಶೆ ಕಾಯ್

ಸಂವ್ಸಾರ್ ಗಾಡೆ ಚಲ್ತಲೆ?

ಪಯ್ಸೊ ಆಡ್ಕೊ ಸೊಪ್ಪಾಕ್ ಪಾವ್ಲೊ

ಪಾವ್ಸ್ ಮಾಥ್ಯಾರ್ ತೆಕತ್ ಆಯ್ಲೊ

ಪುರೂಮೆತಾಂಚೊ ವೆಪಾರ್ ದೆವಾ

ಘರಾಂತ್, ಆಂಗ್ಣಾತ್ ಕುಸ್ಪಾಕ್ ಲಾಗ್ಲೊ...

ಸುಖ್ರುಪ್ ಉರ್ಚೊ ಘರಾಬೊ ಆಮ್ಚೊ

ಗರೀಬಾಂಚೊ ಮಾತ್ ಹುಸ್ಕೊ ವೆಗ್ಳೊ

ಲೊಕ್ಡಾವನ್ ಜರ್ ಸೊಪ್ಲೊ ನಾ ಬೆಗೀನ್

ಪಾತೀಶೆರ್ ಜಾತ್ಲೊ ಭಾವ್ - ಭಯ್ಣ್ ಸಗ್ಳೊ....

ಅರೀಶ್ಟಾಂಕ್ ತೊಂಡ್ ದೀತ್

ವಾಜಯ್ಲ್ಯೊ ತಾಟ್ - ಥಾಲ್ಯೊ

ಅದಿ - ಮದಿ ಪೆಟೀತ್ ತಾಳ್ಯೊ

ಗೊ ಕೊರೊ ನಾಚ್ಯೊ ಗಾಯ್ಲ್ಯೊ ಹೊವ್ಯೊ...

ಲೊಕ್ಡಾವನಾಚ್ಯಾ ಕಾಳಾರ್

ಖರೆಂ - ಖೊಟೆಂ ಆಯ್ಲೆ ಮುಖಾರ್

ಇಲೆಸಾವಾಂಕ್ ಸೊಪೂತ್ ಘೆವ್ಪಿ

ದಿಲ್ಲ್ಯಾ ಉತ್ರಾಕ್ ಗೆಲೆ ನೆಗಾರ್ ....

ಸಾಖರ್, ಪಾಲೊ, ತಾಂದ್ಳಾ ಗೊಟೊ

ಕಾಟ್ಯಾ ಖುಟ್ಯಾತ್ಲ್ಯಾನ್ ಆಮಿ ಹಾಡ್ಲೊ ಖರೊ

ಖಂಯ್ ರೆ ಗೆಲೊ ಗಾಂವ್ಚೊ ಧನಿ?

ದಿವ್ಚೆ ಸೊಡೂನ್ ಪೆಜ್ - ಪಾಣಿ

ಇಲೆಸಾಂವಾಚೆ ಇಜ್ಮೊಲ್ ಮಾಗೀತ್

ಭೌವ್ಲೊ ತುಂ ರಾತ್ - ದೀಸ್

ಗರಜ್ ತುಜಿ ಆಸ್ತನಾ

ಕಿದ್ಯಾಕ್ ಲಿಪ್ಲೊ ದಾರಾ ಖಾಚೀಕ್?

ಮನಾಂತ್ ಘೊಳ್ಟಾ ಎಕುಚ್ ವಿಚಾರ್

ಆತಾ ಕಿದೆ ಜಾತ್ಲೆ ಮುಖಾರ್?

ಕೊರೊನಾಚೊ ಖೆತ್ರಿ ತಿಠ್ಯಾರ್

ಕೌಲ್ ಆಮಿ ಘೆಯ್ನಾಜಾಲ್ಯಾರ್

ಬೆತ್ಕಾಡಯೊ ಪಡಟ್ಲ್ಯೊ ಹಾತಿ ಪಾಯಾರ್...

ವಿಚಾರಾಂಚೆ ಚಕ್ರ್ ಹೆ ಥಾಂಬ್ನಾ

ಕಿದೆ ಕರ್ಚೆ ಆಜೂನ್ ಕಳ್ನಾ

ಕೊರೊನಾಚೆ ಚಕ್ರವ್ಯುಹ್ ಮೊಡ್ನಾ

ಘರಾ ಆಮಿ ಬಸ್ಲ್ಯಾ ಶಿವಾಯ್

ಪರ್ಯಾಯ್ ದುಸ್ರೊ ಸುಚ್ನಾ....

ಭೊಗ್ಶಿ ದೆವಾ, ಭೊಗ್ಶಿ ಆಮಂಕಾ

ಮಾಗ್ತಾ ಭೊಗ್ಸಣ್ ಭುರ್ಗಿಂ ತುಜಿ

ಆತಾ ಆನೀಕ್ ಸೊಸ್ನಾ

ಹುಸ್ಕ್ಯಾನ್ ಭರ್ಲೆಲಿ ಜೀಣ್ ಆಮ್ಚಿ.....

- ಅತಿಶಾ ಸುರ್ಲೀಕಾರ್. [ಎಪ್ರಿಲ್, 2020]