ಕವಿತಾकविताPoem

Ghor mhojem nolleachem (- Avinash Kunkolkar)

[kovita] Ghor mhojem nolleachem (- Avinash Kunkolkar)

Kallachim rodam ghumvol'leporim monis bodlaunnechea vengent oponnak visorun gela. Ek kall aslo kolovachem pakem aslo kall to. Magir nolleanchim pakim zalim, simentt-kankrettichim pakim zalim.... Punn hangasor kovichi nodor hea bodlaunnecher nhoi bogor, opunn nolleachea ghorant ravun boglechea ghorant aschea cholio ul'lek korotana ek opurbhayecho kovita vhalloch vhalloitana kovitarosik khorech zaun sontosan kovitecho osvad korotat.

Bab Avinash Kunkolkarochi onyek ut'tim' kovitek vachunk atam tuka ulo ditam.

[kovita] Ghor mhojem nolleachem (- Avinash Kunkolkar)

Ghor mhojem nolleachem.

Tachea ghora samkaruch mhojem ghor

ghor mhojem nolleachem

angnna kuxikuch porsu asa

porsu mogrea kolleachem.

Tachea angnnatolo dhovo chapo

mogreak mhojea bhuloita

mogryey tache bhul'losunnen

ostitv aple fuloita.

Sokallchea vellar jen'na

khiddke mhoreant tem

sodach mhaka dista

ken'na tem kems ugoita

tor ken'na kesatleo vuyo venchta.

Dogamychi nodor ek zatach

lojechea zhadda vori

donuy hat dolleacher dhapun

jen'na mhaka polloun tem lojta

ten'na mhojea hodd'ddeat

kallzachi ghatt zaun

khinna-khinnak vajta.

Lhovuch dolleavoilem hat kaddun

nodrechi khunnam korun

polloun mhaka te hamsta

tambdde,holldulle amur pikea

tomatta vori...

Gol gubgubit gal tache

galar chep dista.

Koplar tikli,

angar angobhor votra

mekop nastona legit

chehro tacho...

Sureache tez pil'lea vori chokchokota

ten'na sury legit...

Tachea mukhamollak polloun dipkauta.

Oxem tache mon bhulounne rup

hamv sodach polloita

hem bhagy mhojea dolleachem

tachea ghora samkaruch mhojem ghor

ghor mhojem nolleachem

ghor mhojem nolleachem.

- Ovinax Kunkolkar. [Mar, 2020]