ಫಾತೊರ್ [ರುಜಾರಿಯೊ ಪಿಂಟೊ ಸಿಂಧುದುರ್ಗ್]

ಕವಿ ಮ್ಹಳ್ಯಾರ್ ಕೊಣ್? ತೆಚ್ಚ್ ಸಮಾಜೆಚೊ ಏಕ್ ವಾಂಟೊ ನ್ಹಯ್? ಆತಾಂ ಕವಿ ಸಮಾಜೆಚೊ ವಾಂಟೊ ತರ್, ಸಮಾಜೆಚ್ಯಾ ಎಕೆಕಾ ಸಂವೇದನಾಕ್ ಅಪಲೆ ಕಾನ್, ಜೀಬ್, ದೊಳೆ, ನಾಕ್, ಮತ್ ದಿತಲೊ ನ್ಹಯ್? ಸಮಾಜೆಂತ್ ದಣಸತೆಲ್ಯಾಂಚೆರ್ ವ ಕಶಟಾತೆಲ್ಯಾಂಚೆರ್ ದಯಾ ಭಿರಮತೆಚೊ ದುಕೊಳ್ ಪಡಲೆಲ್ಯಾ ಸಮಾಜೆಂತ್ ಆರಸೊ ಧಾಖಂವಚೊ ನ್ಹಯ್? ಹಾಂಗಾಸರ್‌ಯೀ ಏಕ್ ಅಸಲಿಚ್ ಖೂಬ್ ಸಂಗರ್ಷಾಚಿ ಕವಿತಾ ಕವಿನ್ ಉಭಿ ಕೆಲ್ಯಾ. ಆಮಚೆ ಸಮಾಜೆಂತ್ ಸದಾಂಯ್ ಮ್ಹಳ್ಳೆಪರಿಂ ಆಮಿ ಅಸಲೆ ಅಸ್ತುರೆಕ್ ಪಳೆತಾಂವ್ ಪುಣ್ ತೀ ಕೊಣ್ ಕೊಣ್ಣಾ ಮ್ಹಣುನ್ ತಿಚೆ ಗಣ್ಣೆ ಆಮಿ ಕರುಂಕ್ ವ್ಹಚನಾಂವ್. ಪುಣ್ ಕವಿ ತೊ ಕವಿ, ಜೊ ದೆಖುಂಕ್ ಸಕತಾ ರವಿನ್ ದೆಖುಂಕ್ ಸಕಾನಾತಲೆಂ.

ಬಾಬ್ ರೊಸಾರಿಯೊ ಪಿಂಟೊ ಮಾಲ್ವಾಣಿಚೊ ನಾಮಣೆಚೊ ಕವಿ. ಹ್ಯಾ ಕವಿತೆಚ್ಯಾ ಆತಮ್ಯಾಕ್ ಪಳೆಂವಚೆಂ ತುಜೆರ್ ಸೊಡತಾಂ.

[ಕವಿತಾ] ಫಾತೊರ್ [ರುಜಾರಿಯೊ ಪಿಂಟೊ ಸಿಂಧುದುರ್ಗ್]

ಫಾತರ್

ರಸ್ತ್ಯಾಚೆ ಫಾತರ್ ಫೊಡ್ನ್

ಸಂವಸಾರ್ ತೀ ಚಲಯತಾ

ರಸ್ತ್ಯಾಚೀ ಧೂಳ್, ಡಾಂಬಾರಾಚೊ ವಾಸ್

ಖೊರೆ, ಕುದಳ್, ಫಾತರಾಚೀ ರಾಸ್

ಏಕ್ ಭುರ್ಗೆಂ ಮಾತಯೆತ್ ಖೆಳತಾ

ದುಸರೆ ತಿಣೆ ಪಾಟೀರ್ ಬಾಂಧ್ಲಾ

ಫಾತರ್ ಫೊಡ್ನ್ ಹಾತ್‌ಯೀ ಫುಟಲಾ

ಆಂಗಾರ್ ಮಾರಾಚೊ ವಳ್ ಉಠ್‌ಲಾ

ವಯಲ್ಯಾಂನ್ ಸುರ್ಯೊ ಭಾಜೂನ್ ಕಾಡತಾ

ಕಾಮಾರ್ ತಿಕಾ ಪಾತೊರಚ್ ನಾಡತಾ

ಸಗಳೆ ತೀ ಸಂಸೂನ್ ಸೊಸತಾ

ಆಪಲ್ಯಾ ಕಸತಾರ್ ಭುರಗ್ಯಾಂಕ್ ಪೊಸತಾ

ಪಿಯೆವನ್ ಘೊವ್ ಸದಾಯ್ ಮಾರತಾ

ಜಾಯ್ ತೆನ್ನಾ ಲಾಗಿಂ ವೊಡತಾ

ವರ್ಸಾಕ್ ಏಕ್ ಭುರಗೆ ವಾಡತಾ

ಜಾಯತೀ ವರ್ಸ್ ಅಸೆಚ್ ಘಡತಾ

ಸಗಳೊ ರಾಗ್ ತೀ ಫಾತರಾರ್ ಕಾಡತಾ

ದಿಸ್‌ಭರ್ ಮಾಗೀರ್ ಫಾತರ್ ಫೊಡತಾ

ರಾಗಾಂನ್ ಮಾಗೀರ್ ಫಾತರ್ ಫೊಡತಾ

ಸಗಳೊ ದಿಸ್ ಫಾತರ್ ಫೊಡತಾ

- ರೊಜಾರಿಯೊ ಪಿಂಟೊ, ಸಿಂಧುದುರ್ಗ [ಎಪ್ರಿಲ್ 2018]

ರೊಜಾರಿಯೊ ಪಿಂಟೊ: ಮಾಲ್ವಾಣಿ ಪ್ರಾಂತ್ಯಾಂತ್ ಜಾಯ್ತೆ ಕೊಂಕ್ಣಿ ಲೋಕ್ ತಶೆಂಚ್ ಕೊಂಕ್ಣಿ ಸಾಹಿತ್ ರಚ್ಪಿ ಆಸಾತ್, ಬಾಬ್ ರುಜಾರಿಯೊ ಪಿಂಟೊ ಏಕ್ ನಾಮ್ಣೆಚೊ ಕವಿ, ’ದರ್‍ಯಾದೆಗೆರ್’, ’ಮಾವುಲೀ’, ’ಆಮೀ ಮಾಲ್ವಾಣೀ’ , ಮ್ಹಾಜಾ ಕೊಕಣಾ (ಮಾಲ್ವಾಣಿ ಗಾಣಾ), ’ಆಮೀ ಮಾಲ್ವಾಣೀ’ ಹಾಚಿಂ ಪರ್ಗಟ್ ಜಾಲ್ಲಿಂ ಪ್ರಮುಕ್ ಪುಸ್ತಕಾಂ. ಜಾಯ್ತ್ಯಾ ಕವಿಗೋಶ್ಟಿಂನಿ ಹಾಣೆಂ ವಾಂಟೊ ಘೆತ್ಲಾ.