ಕವಿತಾकविताPoem

Ekveriyom' (- Urjita Bhobe)

[kovita] Ekveriyom' (- Urjita Bhobe)

Az somsaran fudd korcho ek vhodd somosso ho. Sorv songtek molaunko sokta dekun az dudduch sorvosv korun monis monxamolak vikun jieta. Svabhiman, ghonota, osmitai ekachiyi porova nasotana monis atam prokriticho dhesvat korun asa. Gudde dongor portita, xetam-bhattam purota fokot duddva khatir ani duddvak lobdun. Hea marekar songtecho virod korcho eka kovicho pramannik kaido ani hangasor kovin to bhovo opurbhayen kel'lo disun yeta.

Bab romex goddi somajik zagvonn dimvcho kovi. Tachea kovitemni ascho somajik husko uttun disota dekun hi kovita ek somajik zagvonn korchedixechi bob zata. Hea bobek aikunk atam tukach ulo ditam.

[kovita] Sangat ken'nam utthtthole re (- Romex Saju Goddi)

Sangat ken'nam utthtthole re

pres vaddle bhattanche

pixem laglem nottanchem

xetam-zomnim lagle purunk

ovchin futtkea pottache .

Duddvam axent gamv vikchem

duyes bhol'lem gõy bhor

hozar vorsam adlea xetant

ghalunk lagle matye-bhor .

Dollea fudde dista oristt

tori-i konnank zhollkonam

poixeanche he axe fudde

bhavo bhavank vollkhona..

Dongra ranam kapun kapun

sangat poixe kelet konnim

ranam soddun lagle disunk

gavant atam vanor - ghonni.

Kumbanim zom-i piklem bhat

khajnnachi tea laili vatt

sukun gele vojre zhori

vhall muxi udka patt.

Sangant ken'nam utthtthole re

mai bhumychem chit'tole re

xelle rogot tumchem bhava

sangat ken'nam xijtole re?

- Romex Saju Goddi. [Zoner, 2020]

Romex Saju Goddi: likhnne namvakhal boromvcho romex sohodevo goddi pattlea pondra vorsam thaun bimb, zag, gulab, sunaporant toxench bhangar‌bhum-i potramni boroun aila. Sobhar kovisom'mellonamni toxench kovigoxttimni kovita sador keleat toxench choloun veleat. Kovitexivoi kannio toxench lekonam boromvchea hachea kovitencho zomo ’auy zalea zannti’ porgottnner osa.