ಕವಿತಾकविताPoem

ಸಾಂಗಾತ್ ಕೆನ್ನಾಂ ಉಠ್ಠಲೆ ರೆ (- ರಮೇಶ್ ಸಾಜು ಗಡಿ)

[ಕವಿತಾ] ಸಾಂಗಾತ್ ಕೆನ್ನಾಂ ಉಠ್ಠಲೆ ರೆ (- ರಮೇಶ್ ಸಾಜು ಗಡಿ)

ಆಜ್ ಸಂಸಾರಾನ್ ಫುಡ್ ಕರ್ಚೊ ಏಕ್ ವ್ಹಡ್ ಸಮಸ್ಸೊ ಹೊ. ಸರ್ವ್ ಸಂಗ್ತೆಕ್ ಮೊಲಾಂವ್ಕ್ ಸಕ್ತಾ ದೆಕುನ್ ಆಜ್ ದುಡುಚ್ ಸರ್ವಸ್ವ್ ಕರುನ್ ಮನಿಸ್ ಮನ್ಶಾಮೊಲಾಕ್ ವಿಕುನ್ ಜಿಯೆತಾ. ಸ್ವಾಭಿಮಾನ್, ಘನತಾ, ಅಸ್ಮಿತಾಯ್ ಎಕಾಚಿಯೀ ಪರವಾ ನಾಸತಾನಾ ಮನೀಸ್ ಆತಾಂ ಪ್ರಕೃತಿಚೊ ಧೆಸ್ವಾತ್ ಕರುನ್ ಆಸಾ. ಗುಡೆ ದೊಂಗೊರ್ ಪರ್ತಿತಾ, ಶೆತಾಂ-ಭಾಟಾಂ ಪುರತಾ ಫಕತ್ ದುಡ್ವಾ ಖಾತಿರ್ ಆನಿ ದುಡ್ವಾಕ್ ಲಬ್ದುನ್. ಹ್ಯಾ ಮಾರೆಕಾರ್ ಸಂಗ್ತೆಚೊ ವಿರೋದ್ ಕರ್ಚೊ ಎಕಾ ಕವಿಚೊ ಪ್ರಾಮಾಣಿಕ್ ಕಾಯ್ದೊ ಆನಿ ಹಾಂಗಾಸರ್ ಕವಿನ್ ತೊ ಭೋವ್ ಅಪುರ್ಭಾಯೆನ್ ಕೆಲ್ಲೊ ದಿಸುನ್ ಯೆತಾ.

ಬಾಬ್ ರಮೇಶ್ ಗಡಿ ಸಮಾಜಿಕ್ ಜಾಗ್ವಣ್ ದಿಂವ್ಚೊ ಕವಿ. ತಾಚ್ಯಾ ಕವಿತೆಂನಿ ಆಸ್ಚೊ ಸಮಾಜಿಕ್ ಹುಸ್ಕೊ ಉಟುನ್ ದಿಸತಾ ದೆಕುನ್ ಹಿ ಕವಿತಾ ಏಕ್ ಸಮಾಜಿಕ್ ಜಾಗ್ವಣ್ ಕರ್ಚೆದಿಶೆಚಿ ಬೋಬ್ ಜಾತಾ. ಹ್ಯಾ ಬೊಬೆಕ್ ಆಯ್ಕುಂಕ್ ಆತಾಂ ತುಕಾಚ್ ಉಲೊ ದಿತಾಂ.

[ಕವಿತಾ] ಸಾಂಗಾತ್ ಕೆನ್ನಾಂ ಉಠ್ಠಲೆ ರೆ (- ರಮೇಶ್ ಸಾಜು ಗಡಿ)

ಸಾಂಗಾತ್ ಕೆನ್ನಾಂ ಉಠ್ಠಲೆ ರೆ

ಪ್ರೆಸ್ ವಾಡ್ಲೆ ಭಾಟಾಂಚೆ

ಪಿಶೆಂ ಲಾಗ್ಲೆಂ ನೊಟಾಂಚೆಂ

ಶೆತಾಂ-ಜಮ್ನಿಂ ಲಾಗ್ಲೆ ಪುರೂಂಕ್

ಅವ್ಚೀನ್ ಫುಟ್ಕ್ಯಾ ಪೊಟಾಚೆ .

ದುಡ್ವಾಂ ಆಶೆಂತ್ ಗಾಂವ್ ವಿಕ್ಚೆಂ

ದುಯೆಸ್ ಭಲ್ಲೆಂ ಗೊಂಯ್ ಭರ್

ಹಜಾರ್ ವರ್ಸಾಂ ಆದ್ಲ್ಯಾ ಶೆತಾಂತ್

ಘಾಲೂಂಕ್ ಲಾಗ್ಲೆ ಮಾತ್ಯೆ-ಭರ್ .

ದೊಳ್ಯಾ ಫುಡೆ ದಿಸ್ತಾ ಅರೀಸ್ಟ್

ತರೀಯ್ ಕೊಣಾಂಕ್ ಝಳ್ಕನಾಂ

ಪಯ್ಶ್ಯಾಂಚೆ ಹೆ ಆಶೆ ಫುಡೆ

ಭಾವ್ ಭಾವಾಂಕ್ ವಳ್ಖನಾ..

ದೊಂಗ್ರಾ ರಾನಾಂ ಕಾಪೂನ್ ಕಾಪೂನ್

ಸಾಂಗಾತ್ ಪಯ್ಶೆ ಕೆಲೆತ್ ಕೊಣಿಂ

ರಾನಾಂ ಸೊಡೂನ್ ಲಾಗ್ಲೆ ದಿಸೂಂಕ್

ಗಾವಾಂತ್ ಆತಾಂ ವಾನರ್ - ಘೊಣಿ.

ಕುಂಬಾನಿಂ ಜಂಯ್ ಪಿಕ್ಲೆಂ ಭಾತ್

ಖಾಜ್ಣಾಚಿ ತ್ಯಾ ಲಾಯ್ಲಿ ವಾಟ್

ಸುಕೂನ್ ಗೆಲೆ ವಜ್ರೆ ಝರಿ

ವ್ಹಾಳ್ ಮುಶಿ ಉದ್ಕಾ ಪಾಟ್.

ಸಾಂಗಾಂತ್ ಕೆನ್ನಾಂ ಉಠ್ಠಲೆ ರೆ

ಮಾಯ್ ಭುಂಯ್ಚೆಂ ಚಿತ್ತಲೆ ರೆ

ಶೆಳೆ ರಗತ್ ತುಮ್ಚೆಂ ಭಾವಾ

ಸಾಂಗಾತ್ ಕೆನ್ನಾಂ ಶಿಜ್ತಲೆ ರೆ?

- ರಮೇಶ್ ಸಾಜು ಗಡಿ. [ಜನೆರ್, 2020]