[ದೋನ್ ಕವಿತಾ..]

 [ಕವಿತಾ] ಏಕ್ ವಿಶಯ್.. ದೋನ್ ಕವಿತಾ..

ಸಂಸಾರಾಂತ್ ಆಜ್ ಭೋವ್ ಮಾರೆಕಾರ್ ವೀಕ್ ಪಾಚಾರುನ್ ಆಸಾ. ಕೊರೊನಾಚ್ಯಾಕೀ ಹಜಾರ್ ವಾಂಟ್ಯಾನ್ ತೆಂ ವಿಸ್ತಾರುನ್ ಮನಶಾಪಣಾಚೊ ಭೊಂಗೊಸ್ತೊಳ್ ಕರುನ್ ಆಸಾ. ಬಳ್ವಂತ್ ಅಪ್ಲಿ ಸಕತ್ ಗಳ್ಸುನ್ ಸಮಾಜೆಚಿಂ ಹೆರ್ ನೇಮಾಂ ಅಪ್ಲ್ಯಾ ಫಾಯ್ದ್ಯಾಕ್ ಲಾಗುನ್ ಕರುನ್ ಆಸಾತ್. ಹ್ಯಾ ಸಕ್ತೆಕ್ ಗಳ್ಸುನ್ ಕೊಣ್ ಸರ್ಕಾರ್ ರಚ್ತಾ. ಕೊರೊನಾಚ್ಯಾ ಭಿರಾಂತೆನ್ ಫಕತ್ ತೊಂಡ್ ಧಾಂಪ್ಲ್ಯಾರ್ ಪಾವ್ತಾ ಪುಣ್ ಹಾಂಗಾ ಸರ್ಕಾರ್ ದೊಳೆ, ಕಾನ್ ಸಯ್ತ್ ಧಾಂಪ್ತಾ. ಹಾಂಗಾಸರ್ ದೋನ್ ಇಮಾಜ್ಯೊ, ದೋನ್ ತಾಳೆ, ದೋನ್ ಕಾಣಿಯೊ ಘಡ್ತಾತ್; ಏಕ್ ಹಕೀಗತ್ ಜಿ ಗುಪ್ತಿಂ ಆಸುಂಕ್ ಪುಣ್ ದುಸ್ರಿ ಸಂಸಾರಾಕ್ ದಾಕಂವ್ಕ್ ಆನಿ ಲೊಕಾಕ್ ಬನಾಂವ್ಕ್. ದೆಕುನ್ ಅಮೆರಿಕಾಂತ್ ಕಾಂಯ್ ಶೆಕಡ್ಯಾದಿಂ ಪಾಲ್ವಲ್ಲೊ ಮ್ಹಳ್ಳೊ ಜಾತಿ-ಕಾತಿಚೊ ಉಜೊ ಆತಾಂ ಪರತ್ ಜಳುಂಕ್ ಲಾಗ್ಲಾ. ಅಸಲೊಚ್ ಉಜೊ ಸಂಸಾರಾಚ್ಯಾ ಹೆರ್ ದೇಶಾಂನಿ ಜಳ್ಚೆಂ ಖರೆಂಚ್ ಜಾವ್ನ್ ಮನ್ಶಾಪಣಾಚೆರ್ ಮಾರೆಕಾರ್ ಸವಾಲ್ ಕಶೆಂ ಉಭೆಂ ಜಾಲಾಂ. ಆಮ್ಚ್ಯಾ ದೇಸಾಂತ್ ಸಯ್ತ್ ಸಂಸ್ರಾಕ್ ದಾಕಂವ್ಕ್ ತಶೆಂಚ್ ಸಾಂಗುಂಕ್ ಜಾಯ್ತೊ ಕಾಣಿಯೊ ಆಸಾತ್. ಅಸಲಿಂ ಘಡ್ಪಾಂ ರಚುನ್ ಖೂಪ್ ಕಮಾಂವ್ಚೆ ಭಡ್ವೆಯ್ ಸಮಾಜೆಂತ್ ಯಥೇಶ್ಟ್ ಮಾಪಾನ್ ಆಸಾತ್. ತಾಂಕಾಂ ಫಾಲ್ಯಾಂಚೊ ಫುಡಾರ್, ಫಾಲ್ಯಾಂಚೆಂ ಬರೆಂಪಣ್ ಕಿತೆಂಚ್ ಪಡೊನ್ ಗೆಲ್ಲೆಂ ನಾ. ಕಾನಾಂಕ್, ದೊಳ್ಯಾಂಕ್ ಕಶಿಯ್ ಪಟ್ಟಿ ಭಾಂದ್‌ಲ್ಲೆ ಹೆ ದಳ್ದಿರ್ ಸೊಡ್ವೊಣ್ದಾರ್ ಆತಾಂ ಲೊಕಾಂಚ್ಯಾ ದೊಳ್ಯಾಂಕ್, ಕಾನಾಂಕ್ ಸಯ್ತ್ ಪಟ್ಟಿ ಭಾಂದುಂಕ್ ಲಾಗ್ತಾನಾ ಖರೆಂಚ್ ಜಾವ್ನ್ ಮನ್ಶಾಪಣ್ ಚಿರ್ಡತಾ ಆನಿ ಉರ್ಡತಾ.

’ಆತ್ಮ್ ನಿರ್ಭರ್’ ಹ್ಯಾ ಫಟಿಂಚ್ಯಾ ಸಾಂಕಳೆಚಿ ನವಿ ಗಾಂಚ್. ಹಾಂಗಾ ಮನಿಸ್ ಜಿಯೆಂವ್ಚೊ ಭರ್ವಸೊ ಸಾಂಡುನ್ ದೀಸ್ ಕಾಡುನ್ ಆಸ್ತಾನಾ ಥಂಯ್ ದಾಕವ್ಪಾಚೊ ಡೋಂಗ್ ಕರುನ್ ದೀಸ್ ಲೊಟ್ಚೆ ಆಡಳ್ತೆದಾರ್ ದಿಸಾಕ್ ಎಕ್ ನವಿ ಕಾಣಿ ಘಡುನ್ ಲೊಕಾಚ್ಯಾ ಕಾನಾಂಕ್ ವಾಂಯ್ಗಿ ಭಾಂದ್ಚೆಂ ಕಾಮ್ ಕರುನ್ ಆಸಾ.

’ಅಲ್ತಡ್-ಪಲ್ತಡ್’ ಅಂಕಣಾಂತ್, ಎಕಾ ಸಕಾಳಿಕ್ ವಿಶ್ಯಾಚೆರ್ ದೊಗಾಂನಿ ಬರಯಿಲ್ಲ್ಯೊ ಕವಿತಾ ಆಮಿ ಫಾಯ್ಸ್ ಕರ್ತೆಲ್ಯಾಂವ್. ಪಯ್ಲ್ಯಾ ಆಂಕ್ಡ್ಯಾಂತ್ ವಿಶಯ್ ’ಆತ್ಮ್ ನಿರ್ಭರ್’ ಆನಿ ಹ್ಯಾ ವಿಶ್ಯಾಚೆರ್ ದೋನ್ ಕವಿತಾ ಬರಯ್ಲ್ಯಾತ್ ಬಾಬ್ ಶಯ್ಲೇಂದ್ರ ಮೆಹ್ತಾ ಆನಿ ವಲ್ಲಿ ಕ್ವಾಡ್ರಸ್ ಹಾಣಿಂ.

ಅತ್ಮೊ ನಿರ್ಭರ್ (- ವಲ್ಲಿ ಕ್ವಾಡ್ರಸ್)

ಸೆಜ್ರಾಚ್ಯಾ ಗಾಂವಾಂನಿ ಜಿವ್ದಾಳಿ ರಿಗ್‌ಲ್ಲ್ಯೊ

ಜಿವ್ದಾಳಿ ಚಾಬುನ್ ಲೊಕಾಂಚಿಂ ಮೊಡಿಂ ಪಡ್ತಾಲಿಂ

ಆಮ್ಚ್ಯಾ ಗಾಂವಾಂತ್ ಶೆಜ್ರಾಚೊ ರಾಯ್ ಯೆಂವ್ಚಾರ್ ಆಸ್ಲೊ

ಗಾಂವ್‌ಭರ್ ಮನ್ಶಾಂ ರಸ್ತೆ ಸುಂರ್ಗಾರಾಂವ್ಕ್ ಲಾಗ್‌ಲ್ಲಿಂ

ಜಿವ್ದಾಳಿನ್ ಗಾಂವಾಕ್ ರಿಗುನ್‌ಯೀ ಜಾಲ್ಲೆಂ

ಗಾಂವ್ಚ್ಯೊ ಗಡಿ ಘರ್ಚಿಂ ದಾರಾಂ ಬಂದ್ ಜಾಲಿಂ

ಘರಾಂಚ್ ನಾತ್ಲೆಲ್ಯಾಂಕ್ ರಸ್ತ್ಯಾರ್ ಮೊರುಂಕ್ ದಿಲೆಂ

ಆಮಿ ಘರಾಭಿತರ್ ರಾವುನ್ ವಾತಿ ಪೆಟಯ್ಲ್ಯೊ

ಶೆರಾಕ್ ತಿಂ ಜಡ್ ಮ್ಹಣುನ್ ಪಾಟಿಂ ಗಾಂವ್ಚಿ ವಾಟ್ ವಿಂಚ್ಲಿ

ರಸ್ತೆ ಧರ್ಲೆ ಖಾಂದಿಂ ಬಾಳಾಂಕ್ ಘೆವ್ನ್

ತಾಂಚ್ಯೊ ಕಾತಿ ಝರ್ಲ್ಯೊ ಪಾಂಯಾಂ ಖೊಟೊ ಫುಟ್ಲ್ಯೊ

ಆಮಿ ಬಾಲ್ಕನಿಂತ್ ರಾವುನ್ ತಾಳಿಯೊ ಪೆಟ್ಲ್ಯೊ

ಪರ್ಕಿ ಶೆರಾಂತ್ ಎಕೆಕ್‌ಚ್ ಹೊಗ್ಡಾಯ್ಲೆಂ

ಪಯ್ಲೆಂ ಕಾಮ್ ಪಾಕೆಂ ಅಪ್ಲಿಂ ಪೆಲಿಂ

ತೊಂಡಾರ್ ಮಾಸ್ಕ್ ನ್ಹೆಸುನ್ ಭುಕ್ ಲಿಪಯ್ಲಿ

ಪೊಟಾಂತಲ್ಯಾ ಕಿಡಿಂಕ್ ಕಶೆಂ ಸಮ್ಜತೆಲಿ

ಆನಿ ಬಾಳಾಂಕ್ ಆವಯ್ ನಾ ಭಾಪಾಯ್ಕ್ ಧುವ್ ನಾ

ಗಾಂವಾಂತ್ ರೀಗ್ ನಾ ವಿಚಾರ್ತಲೊ ಕೋಣ್ ನಾ

ಪ್ರಾಣ್ ಮಾತ್ ಬಾಕಿ ಉರ್ಲಲ್ಯಾ ಕುಡಿಕ್ ಆತಾಂ

ಆತ್ಮೊ ನಿರ್ಭರ್ ಕಂಯ್ ಪುಣ್ ಅತ್ಮೊ ಉರ್ಲಾ ಖಂಯ್?

ಆತ್ಮೊ ನಿಬರ್ (ಶಯ್ಲೇಂದ್ರ ಮೆಹ್ತಾ)

ವಾಂಕ್ಡೆ ಮೆಢೀಂಚೆಂ ವಾಂಕ್ಡೆಂ ನೆಮ್

ತೆಚ್ಪರಿಂ ಸಮಾಜನೆಮ್

ಸರಳ್ ಚಾಲ್ ವಿಸ್ರಾವನ್

ಪಾತಕ್ಡ್ಯಾಂಚೆರ್ ಹಾಡ್ಲಿ ಝೆಮ್

ಸುಟ್ಟಾ ಖಾಜ್, ಖಾಜೊವಂಕ್ ಮನಾಯ್

ಸಾಮಾಜಾಕಾತೀರ್ ದಾಟ್ಲಿಂ ಚವ್ನಾಂ

ವಿಸ್ರಾಯೆರ್ ಘಾಲೂಂಕ್ ವೆದ್ನಾ

ಮಠಾಮಠಾಂನಿ ಭಕ್ತಿ ಕವ್ನಾಂ

ದಾಗ್ ರಗ್ತಾಚೆ ರಸ್ತ್ಯಾರ್ಸ್ತ್ಯಾರ್

ಪೂಣ್ ಉರ್ತಾ ದಾಮೂನ್ ದರೆಕ್ ಖಬರ್

ಕುಡ್ಡಿ ಭಕ್ತಿ ರಿಗ್ಲ್ಯಾ ಮೆಂದ್ವಾಂತ್

ಆತ್ಮೊ ಕೆನ್ನಾಚ್ ಜಾಲಾ ನಿಬರ್

ಮೂಳ್ ಕಾಣ್ಯೆಗಾರ್ ತರ್‌ಯೀ, ಕವಿತಾಶೆತಾಂತ್ ಅಧ್ಯಯನ್, ವಿಶ್ಲೇಷಣಾಚೊ ವಾವ್ರ್. ’ಚ್ಯಾರ್ ಮುಖಾಂ’ (2002), ’ಕಟ್‌ಪುತ್ಳಿ’ (2004), ’ದರ್ಭಾರಾಂತ್ಲಿ ಪಿಂರ್‍ಗೊಣ್’ (2006), ’ಬಜಾರ್’ (2017), 'ಭಿತರಲೊ ಕವಿ' (2020) ಪರ್ಗಟ್‌ಲ್ಲೆ ಸ್ವತಾಚೆ ಕವಿತಾಜಮೆ. ’ಕವಿತಾಪಾಠ್’ (2005), ’ದರ್‍ಯಾಕ್ ಉದಾಕ್’ (2006), ’ಕಾಳೊಕ್ ನಾತ್‌ಲ್ಲೊ ಗಾಂವ್’ (2007), ’ಮುಗ್ದನಾತ್‌ಲ್ಲಿಂ ಗಿತಾಂ’ (2017), 'ಸುಕ್ತಿ ಭರ್ತಿ' (2018) ಎದೊಳ್ ಪರ್ಗಟ್‌ಲ್ಲೆ ಕವಿತಾ ಅಧ್ಯಯನಾಚೆ ಬೂಕ್. ಕೊಂಕ್ಣೆಶಿವಾಯ್ ಕಾನಡಿ, ಇಂಗ್ಲಿಶ್, ಹಿಂದಿ ಭಾಸಾಂನಿ ಸಯ್ತ್ ಕವಿತಾ ಬರಯ್ಲ್ಯಾಂತ್.

ಶಯ್ಲೇಂದ್ರ ಮೆಹ್ತಾ

ಪೊಲಿಟಿಕಲ್ ಸಾಯನ್ಸಾಚೊ ಅಧ್ಯಾಪಕ್ ಜಾವ್ನ್ ವಾವ್ರ್ ಕೆಲ್ಲೊ ಹೊ ಅಂಕಣ್‌ಕಾರ್, ಕವಿ, ಸಮೀಕ್ಷಕ್, ತರ್ಜ‌ಕಾರ್ ತಶೆಂಚ್ ಕೊಂಕಣಿ ವಾವ್ರಾಡಿ. ಗೊಂಯ್ ಮುಳಾಚೊ ಸದ್ದ್ಯಾಕ್ ಮುಂಬಂಯ್ತ್ ವಾವ್ರ್ ಕರುನ್ ಆಸಾ. ಚಾಳಿಸ್ ವರಸಾಂ ಥಾವ್ನ್ ಮರಾಠಿ, ಕೊಂಕಣಿಂತ್ ಬರಯ್ತಾ. ’ಸಿಸಿಫಸ್ ತೆಂಗ್‌ಶೆರ್’ ತಾಚ್ಯಾ ಕೊಂಕಣಿ ಕವಿತೆಂಚೊ ಜಮೊ.