ಕವಿತಾकविताPoem

Ek Tollem (- Vincy Quadros)

[kovita] Ek Tollem (- Vincy Quadros)

Ek tollem jem dubllikayechem punn sota-nitichem, moga-moipasachem. Punn kall bodol'leporim prokrotiche virod gel'leak lagun bhouxa az sokkodd vibhadd zalam. Monis zoxem zanvar legun kongal zala ani porot tea tolleak pattim vochunk axeunko lagla.

[kovita] Ek Tollem (- Vincy Quadros)

Ek Tollem

Tollem ek aslem thoim gorib vostient

Choltalem dhuvop nhavop gorovop

Zatali gorvam ani pajipaleachi ximpnni

Somaz purvonnek poromporik xeti korop

Ek dis ek vhoddlo ttrok ailo vatt kaddit

Gelo khuinchem tori addvarlolem otoun

Produxonn ani ghatok zalem vatavoronn

Vostientlea konnak yeunche adim kollon

Ougea don disamni melem barik nustem

Vostientlea lokachea pottak chimtto ailo

Tednanch anik ek ttrok pavlo jipi soit

Fintacho vhoddil svota rokoun gelo

Vostientla lokamni kolloilem ponchayotik

Nam pollevnni nam vicharnni sogllem sust

Tisrea ttrokan sobond nusteak marlem

Poixekaranchem padd-mon jikhlem just

Udok vaportoleanche hat lagle ibaddonk

Pinzle kopdde ani sounnim-i kaim melim

Vaddea velim zonavoram poddlim bhokik

Vellar tankam nitoll udkan salvar kelim

Atam tollea koddem konnuch vochonam

Goir kam’ kortoleanchem aitench xizlem

Tollem ord puroun kele hal samnyanche

Ganvchea baim-iamni vosti-jivon rakhlem

‘Dev nhidla kai?’ bhukel’lea pottacho vilap

Nhidloleak aili zag ghantt vazli amoriechi

Teach vellar mahamari Kovid-19-ak lagun

Ambolbojavnni ‘Lockdown’ ghoxnnechi

Tolleachi khobor pavli montria meren

Nitoll kelem bekar sorkari kamdaramni

Zhori futtlio udkak keli vatt vhanvunk

Zagrut Devan keli gorib vostichi bandnni

Porot ek pautt ful’lim sallkam vostient

Nhaunk gorounk kopdde dhuunk apoita

Futtum kedoi vhodd dukhacho bomb

Eka tolleachi doivotuch rakhonn korta

- Vincy Quadros. [Apr, 2020]

Vincy Quadros: Bab Vincy Quadros Gõycho namnnecho konknni vauraddi, mukheli, boroinnar, kovi tosoch somaz-sudharok chintpi. Yedoll‌ch tache kaim tisamlagim buk konknnent porgottleat. Ailevar tachea ’zaduchem pettul’ ball sahit bukakhatir kendr sahit okaddemichi proxosthi labhlea. Indhorant chol‌l'lea okhil bharoti-i kovigoxttint konkonni kovitavachon kelam.