ದೂಕ್ (- ಕಲ್ಪೇಶ್ ವೆರೆಂಕಾರ್)

[ಕವಿತಾ] ದೂಕ್ (- ಕಲ್ಪೇಶ್ ವೆರೆಂಕಾರ್)

ಮನಿಸ್ ಚಡ್ತಾವ್ ಜಾವ್ನ್ ಅಪ್ಲ್ಯಾ ಜಿಣ್ಯೆಂತ್ ಕೆದ್ನಾಂಚ್ ಅಪ್ಣಾನ್ ಕೆಲ್ಲ್ಯಾ ಚುಕಿಂಕ್ ಸಮ್ಜುನ್, ತಿ ತಿದ್ವುಂಕ್ ವಚಾನಾ ಬಗರ್ ತ್ಯಾ ಚುಕಿಕ್ ಹೆರಾಂಚೆರ್ ದೋಶ್ ದಿತಾ. ಜಾಂವ್ ತೊ ಕಾಳ್, ಜಾಂವ್ ದುಡು ವಾ ಹೆರ್. ದೆಕುನ್ ಮನಿಸ್ ಮನಶಾಪಣಾಕ್ ಸೊಲುನ್, ಅಪ್ಲ್ಯಾ ಅಬ್ಲೇಸ್ಪಣಾಕ್ ಲಾಗುನ್ ಹೆರಾಂಚ್ಯಾ ಮಿನತೆಕ್ ಪಿಳುನ್ ಜಿಯೆಂವ್ಚೆಂ ಚಿಂತಪ್ ಹ್ಯಾ ಕವಿತೆಂತ್ ಆಸಾ.

[ಕವಿತಾ] ದೂಕ್ (- ಕಲ್ಪೇಶ್ ವೆರೆಂಕಾರ್)

ದೂಕ್

ಚಾರ್ ದಿಸಾಚ್ಯಾ ಹ್ಯಾ ಸಂವ್ಸಾರಾಂತ್

ಕೊಣ್ ಕೊಣಾಕ್ ವಳ್ಖನಾ

ಪಯ್ಶಾಕ್ ಲಾಗೂನ್ ಮನೀಸ್

ಖೂನ್ ಕರ್ಪಾಕ್ ಆಯ್ಕನಾ

ಅಶೆಂ ಕಿತೆಂ ಆಸಾ ಹ್ಯಾ ಪಯ್ಶಾಂನಿ

ಇತ್ಲೊ ಪಿಸೊ ಕರ್ತಾ ಮನ್ಶಾಕ್

ಇಲ್ಲ್ಯಾಶಾ ದುಡ್ವಾಂಕ್ ಲಾಗೂನ್

ಘೊವ್ ಲಾಗ್ಲಾ ಬಾಯ್ಲೆಕ್ ವಿಕ್ಪಾಕ್

ಪಯ್ಶಾಕ್ ಲಾಗೂನ್ ಘರಾಂತ್ ಝಗ್ಡಿಂ

ಬಾಪೂಯ್ ಮಾರ್ತಾ ಆವ್ಯ್ರ್ ಬಡಿ

ಪಯ್ಶಾನ್ ಕೆಲಾ ತಾಚೆರ್ ವರ್ಚಸ್ವ್

ತೊ ಮಾನ್ಪಾಕ್ ಲಾಗ್ಲಾ ತಾಕಾ ಸರ್ವಸ್ವ್

ಮನೀಸಪಣಾಚೊ ಜಾಲಾ ಅಭಾವ್

ದುಡ್ವಾಕ್ ಆಯ್ಲಾ ಸಗ್ಳೊ ಭಾವ್

ಮನೀಸ್ ಮನೀಸಪಣಾಕ್ ಸೊಡೂಂಕ್ ಲಾಗ್ಲಾ

ಪಯ್ಶಾ ಫಾಟ್ಲ್ಯಾನ್ ತೊ ಧಾವೂಂಕ್ ಲಾಗ್ಲಾ

ಧಾಂವ್ತಾ ಧಾಂವ್ತಾ ಎಕ್ ದೀಸ್ ಪಡ್ಟಲೊ

ಪಡ್ಪಾಚೆ ತೊ ಕಾರಣ್ ಸೊದ್ತಲೊ

ಕಾರಣ್ ಸೊದ್ತಾ ಸೊದ್ತಾ ತಾಕಾ ಕಳ್ಟಲೆಂ

ಪಯ್ಶಾನೀಂಚ್ ತಾಚೆ ಆಯುಷ್ಯ್ ಸೊಪಯ್ಲೆಂ

ದೊಶ್ ದಿವ್ನಾಕಾ ತ್ಯಾ ದುಡ್ವಾಂಕ್

ತಾಚಿ ಕಾಂಯ್ ಚೂಕ್ ನಾ

ಆಮಿ ದಿಲಾ ತಾಕಾ ವಯ್ಲೆಂ ಸ್ಥಾನ್

ತಾಣೆಂ ಕೆಲಾ ಆಮ್ಚ್ಯಾ ಜಿವಾಚೆಂ ರಾನ್

ಕೆನ್ನಾ ಮನೀಸ್ ಸುದಾರತಲೊ

ಹ್ಯಾ ದುಡ್ವಾಚಿ ಫಾಟ್ ಸೊಡ್ಟಲೊ

ಮನೀಸಪಣಾಚಿ ಗುಡಿ ಉಬಾರುನ್ ಹ್ಯಾ

ಸಂವ್ಸಾರಾಂತ್ ಸುಖಿ ತೊ ಜಿಯೆತಲೊ...

- ಕಲ್ಪೇಶ್ ವೆರೆಂಕಾರ್. [ಜುಲಾಯ್, 2020]