ದೆವಾ ದೆವಾ (- ಉದಯ್ ಮಾಂಬ್ರೊ)

[ಕವಿತಾ] ದೆವಾ ದೆವಾ (- ಉದಯ್ ಮಾಂಬ್ರೊ)

ಆಪಣಾಚ್ಯಾಕೀ ಚಡಿತ್ ಸಕ್ತೆವಂತಕ್ ಫುಲ್, ಕಾಣಿಕ್ ವ ಮಾನ್ ಅರ್ಪುನ್ ಸಂತೊಸ್ ಕರಚಿ ಸವಯ್ ಮನಶಾನ್ ಕಾಂಯ್ ಯುಗಾಂ ಪಾಳುನ್ ಆಯಿಲ್ಲಿ. ಜಾಂವ್ ತೊ ರಾಯ್ ವಾ ದೇವ್. ಹಾಂಗಾಸರ್ ದೆವಾಚ್ಯಾ ಪಾಂಯಾಚೆರ್ ಮನಶಾನ್ ಭೆಟಯಿಲ್ಲೆಂ ಫುಲ್ ಸಯ್ತ್ ಕೊಣಾಚ್ಯಾಕೀ ಖುಶೆಕ್ ಲಾಗುನ್ ಜೀವ್ ದಿತಾ. ಹಿ ಕವಿತಾ ಕಾಂಯ್ ಏಕ್ ಪಾವ್ಟಿಂ ವಾಚುನ್ ಏಕ್ ಅರ್ಥ್ ಕರ್ಚೆ ತಸಲಿ ನ್ಹಯ್. ದೆಕುನ್ ಹ್ಯಾ ಕವಿತೆಚಿ ತಾಂಕ್ ವರ್ತಿ.

ಬಾಬ್ ಉದಯ್ ಮ್ಹಾಂಬ್ರೊಚಿ ಅನ್ಯೇಕ್ ಭೋವ್ ಸುಂದರ್ ಕವಿತಾ. ಹ್ಯಾ ಕವಿತೆಚಿ ಸೊಭಾಯ್ ಪಳೆಂವ್ಕ್ ತುಕಾಚ್ ಸೊಡ್ತಾಂ.

[ಕವಿತಾ] ದೆವಾ ದೆವಾ (- ಉದಯ್ ಮಾಂಬ್ರೊ)

ದೆವಾ ದೆವಾ

ದೆವಾಚ್ಯಾ ಪಾಂಯಾರ್ ಒಪಿಲ್ಲೆ ಫುಲ್

ದೆವಾಕಡೆ ಹೊರಾಯ್ತಾಲೆ

ದೆವಾ ದೆವಾ

ತುಜ್ಯಾ ಪಾಂಯಾರ್ ಹಾಂವೆ ಘಾಲೂನ್ ಘೆವಂಕ್ ನಾ

ಮ್ಹಾಕಾ ಬಳ್ಜಬ್ರ್ಯಾಂ ಹಾಡೂನ್ ಒಪ್ಲಾಂ

ಜಾಣೆ ವ್ಹಡಾ ಲಕ್ತುಬಾಯೆನ್

ಆಪ್ಲ್ಯಾ ಪೊರ್ಸಾಂತ್

ಮ್ಹಜ್ಯಾ ಮಾತೃಝಾಡಾಕ್ ರೊಯ್ಲೆ

ಶಿಂಪೂನ್ ವಯ್ರ್ ಕಾಡ್ಲೆ

ತೊ ಮ್ಹಜ್ಯಾ ಫುಲ್ಪಾಚಿ ಸಪ್ನಾಂ

ರಾತ್ಭರ್ ನ್ಹಿದೆಂತ್ ಸಪ್ನೆತಾಲೊ

ಪುಣ್ ತುಜೆ ಭಕ್ತೀನ್

ತಲ್ಲೀನ್ ಜಾಲ್ಲ್ಯಾ ತುಜ್ಯಾ ಭಕ್ತಾನ್

ತಾಚಿ ಸಪ್ನಾಂ ಮಾತ್ಯೆಭರವಣ್ ಕೆಲಿ

ಮ್ಹಜೆಸಾರಕಿ ಕಿತ್ಲೀಂಚ್ ಫುಲಾಂ

ಫುಲ್ಚೆಆದೀಂಚ್ ಖುಂಟ್ಲಿ

ಆನಿ ತುಜ್ಯಾ ಪಾಂಯಾರ್ ಒಂಪ್ಲಿ

ದೆವಾ ದೆವಾ

ತುಜ್ಯಾನ್ ಜಾತಾ ಜಾಲ್ಯಾರ್ ಇತ್ಲೆಂಚ್ ಕರ್

ಮ್ಹಾಕಾ ಪರತ್ ಆಸ್ಲೆಂ ತಶೆಂ

ಮಾತೃಝಾಡಾರ್ ದೆಂಠಾರ್ ಬಸಯ್

ಜಾಣೆ ಭಕ್ತೀಭಾವಾನ್

ಮ್ಹಜ್ಯಾ ಮಾತೃಝಾಡಾಚಿ

ಲಕ್ತುಬಾಯೆನ್ ವಾಡ್ ಕೆಲಿ

ತಾಚ್ಯಾ ತೊಂಡಾರ್ ಹಾಂಸೊ ಖೆಳಯ್

- ಉದಯ್ ಮಾಂಬ್ರೊ. [ಫೆಬ್ರೆರ್, 2020]