ಡಾಯ್ವೊರ್ಸ್ (- ನೂತನ್ ಸಾಖರದಾಂಡೆ)

[ಕವಿತಾ] ಡಾಯ್ವೊರ್ಸ್ (- ನೂತನ್ ಸಾಖರದಾಂಡೆ)

ಮನ್ಶಾ ನಾತಿಂ ಕಿತೆಂ ಏಕ್ ಕರಾರ್ (Deal)? ಜೀಣ್‌ಭರ್ ಎಕಾಮೆಕಾಚ್ಯಾ ಸುಕಾಂತ್ ತಶೆಂತ್ ದುಕಾಂತ್ ಸಾಂಗಾತ್ ದಿಂವ್ಚಿ ಭಾಸ್ ಕರುನ್ ಉಪ್ರಾಂತ್ ಜಿಣ್ಯೆಂತ್ ಹ್ಯ ಭಾಸೆಚಿ ವೀದ್ ವಾವ್ಳಿ ಜಾಂವ್ಚೆಂ ಆಯ್ಚ್ಯಾ ದಿಸಾಂನಿ ಸದಾಂಚೆಂ ಜಾವ್ನ್ ಗೆಲಾಂ. ಕಾಂಯ್ ಕಾಳಾರ್ ದೋನ್ ಕಾಳ್ಜಾಂ ಮಾತ್ರ್ ನ್ಹಯ್, ದೋನ್ ಕುಟ್ಮಾಚಿಂ ಸಯ್ತ್ ಎಕಾಮೆಕಾ ಭಾಂದಾಂತ್ ಸುಕ್-ದುಕಾಂತ್ ವಾಂಟೆಲಿ ಜಾಂವ್ಚೊ ಕಾಳ್ ಬದ್ಲುನ್ ಆಜ್‌ಕಾಲ್ ಮೆಟಾಂ ಮೆಟಾಂಕ್ ನಿಬಾಂ ಉಭಿಂ ಜಾಂವ್ಚೊ ಕಾಳ್. ಆನಿ ಎಕೆಕಾ ನಿಬಾಕ್ ಪಾಟಿಂಬ್ದೊ ದಿಂವ್ಚೆ ಕಾಯ್ದೆ ಕಾನುನಾಂವಿಶಿಂ ಚಿಂತುಂಕ್ ಕೊಣಾಕ್‌ಚ್ ವೇಳ್ ನಾ.

ಕಾಂಯ್ ತೆಂಪಾ ಉಪ್ರಾಂತ್ ಏಕ್ ಅಪುರ್ಭಾಯೆಚಿ ಕವಿತಾ ಘೆವ್ನ್ ಆಯ್ಲ್ಯಾ ಬಾಯ್ ನೂತನ್ ಸಾಖರ‌ದಾಂಡೆ. ಹಿಚ್ಯಾ ಕವಿತೆಚ್ಯಾ ಎಕೆಕಾ ಕದ್ವ್ಯಾಂತ್ಲೆಂ ವಾಸ್ತವ್ ಸಮ್ಜುಂಕ್ ತುಕಾಚ್ ಉಲೊ ದಿತಾಂ.

[ಕವಿತಾ] ಡಾಯ್ವೊರ್ಸ್ (- ನೂತನ್ ಸಾಖರದಾಂಡೆ)

ಡಾಯ್ವೊರ್ಸ್

ಆಜ್ಕಾಲ್ ಕಿತ್ಲೆಂ ಸೊಪೆಂ ಜಾಲಾಂ

ಸಟಾಸಟ್ ಡಾಯ್ವೊರ್ಸ್ ಘೆವ್ಪ್

ಜಶೆಂ ಸೊಪೆಂ ಜಾಲಾಂ ಎಕಾ ಪಕ್ಷಾಂತ್ಲ್ಯಾನ್

ದುಸ್ರ್ಯಾ ಪಕ್ಷಾಂತ್ ಉಡ್ಕಿ ಮಾರಪ್

ರಾತ್ ಥೊಡಿ ಸವಂಗಾ ಚಡ್, ತಶೆಂ

ಲಗ್ನಾಂ ಥೊಡಿಂ ಡಾಯ್ವೊರ್ಸ್ ಚಡ್

ಆನಿ ಡಾಯ್ವೊರ್ಸಾಚಿಂ ಎಕ್ ದೊನ್ ಕಾರ್ಣಾಂ

ಕಾರ್ಣಾಂ ಆಯ್ಕೂನ್ ಆವ್ಯ್ಬಾಪಾಯಚಿಂ ಮರ್ಣಾಂ

ಕೊಣ್ ನ್ಹಾಲ್ಲೊ ತುವಾಲೊ ಖಾಟೀರ್ ಉಡಯ್ತಾ

ಕೊಣ್ ಮೊಬಾಯ್ಲಾಚೆರ್ ವರಾಂಚಿಂ ವರಾಂ ಉಲಯ್ತಾ

ಕೊಣಾ ಎಕ್ಲ್ಯಾಚೆಂ ವಜ್ನಚ್ ಕಮಿ ಜಾಯ್ನಾ

ಕೊಣ್ ವೀಕಎನ್ಡಾಕ್ ಬಾಯ್ಲೆಕ್ ಹಾॕಟೆಲಾಂತ್ ವ್ಹರ್ನಾ

ಆಯ್ಚ್ಯಾ ಪಿಳ್ಗೆನ್ ಲಗ್ನಾಚಿಂ ಕೆಲ್ಯಾಂತ್ ಫಕ್ಣಾಂ

ಸಹ್ಜೀವನಾಚೊ ಅರ್ಥ್ ಹಾಃಕಾ ಖಬ್ರೂಚನಾ

ಲಾಖಾಂನಿ ರೂಪ್ಯಾ ಮೊಡೂನ್ ಚಾರ್ ಪಾಂಚ್ ದೀಸ್ ಸುವಾಳೆ

ಮ್ಹಯ್ನೊ ಜಾತಾಸರ್ ಆಸಾ, ಲಾಗ್ತಾತ್ ಡಾಯ್ವೊರ್ಸಾಚೆ ದುವಾಳೆ

ಖಂಯ್ ಪಾವ್ಲಾ ಹೊ ಸಮಾಜ್ ಆನಿ ಕಿತ್ಯಾಕ್ ಟೀಕ್ನಾತ್ ಲಗ್ನಾಂ?

ಕಾರಣ್ ಎಕುಚ್, "ತಡ್ಜೊಡ್" ಕರೂಂಕ್ ಕೊಣುಚ್ ತಯಾರ್ ನಾ

- ನೂತನ್ ಸಾಖರದಾಂಡೆ. [ಜನೆರ್, 2020]

ನೂತನ್ ಸಾಖರದಾಂಡೆ: ವೃತ್ತೆನ್ ಬ್ಯಾಂಕರ್ ಜಾವ್ನ್ ಪಂಜಾಬ್ ನ್ಯಾಶನಲ್ ಬ್ಯಾಂಕಾಂತ್ CTO ವಾವ್ರ್ ಕರುನ್ ಆಸ್ಚಿ ಬಾಯ್ ನೂತನ್ ಸಾಖರ‌ದಾಂಡೆ ಕೊಂಕಣಿಚಿ ಏಕ್ ನಾಮ್ನೆಚಿ ಕವಿ, ಲೇಖಕ್. ’ಜೀಣ್ ಜಾಲಿ ಕಸ್ತೂರಿ' (1994), ’ಪಾಸ್‌ವರ್ಡ್’ (2010) ಮ್ಹಳ್ಳೆ ಹಿಚ್ಯಾ ಕವಿತೆಂಚೆ ದೋನ್ ಜಮೆ ಪರ್ಗಟ್ಲ್ಯಾತ್. 2012 ಇಸ್ವೆಂತ್ ಫಾಂವ್ಡೇಶನ್ ಅತ್ಯುತ್ತಮ್ ಬೂಕ್ ಪುರಸ್ಕಾರ್, ತಶೆಂಚ್ 2012 ಇಸ್ವೆಚೊ ಮಥಾಯಸ್ ಕುಟ್ಮಾಚೊ ಕವಿತಾ ಪುರಸ್ಕಾರ್ ಹಿಕಾ ಲಾಭ್ಲಾ.