ಕವಿತಾकविताPoem

Bondd (- Songita Naik)

[kovita] Bondd (- Songita Naik)

Eka tempadim mankodd zaun jiemvcho monis opnnan vosti korun aslem ran soddun ailo ani xikop zoddun progotechea paulamni mukar paulo ani vikasachea paulamni dhamvun laglo. Az toch monis khinnan doreachea gorbhak rigunk sokla, chondracher uddki marunk sokla punn hokigotent somajent kitem ghoddun asa? hea vikachem karonn konn oni kitem mholl'llem ami chintchi bhovo gorz asa. Kiteak mhollear monis oplea svarthi chintpan, dhorm', zat, ani veveglle dore ubharit gel'leporinch bhitorle bhitor pokoll zaun yetech asa ani az somajent amchesomor ghoddchim bhirankull ghodditam hachi govai.

’moineacho kovi’ spordheak ayil'li hi poili kovita. Bai songita naik gõychi ek namnnechi boroupinn. Tichea kovitent soit tench rogot vhallta jyem thoddech disadhim hoidorabadant ghettel'lem, toch tallo aikota to adhlea hofteant onixtt monxamni oplea kirkoll kornek lipomvcheak bondh kel'lo. Ani ekek utramni lipun ascheo sorv imazo parkunk tukach soddtam.

[kovita][kovita] Bondd (- Songita Naik)

Bondd
cheddum tum ....

hench koru noka ,

tench koru naka

oxem fattim voddun

tu kortoli mhaka

tujech‌bhaxen ..

chepnnak ghal'li obla.

'bai sor tu fuddem' mhonn,

dharixttoyachem bollgem di

korge mhaka sobla

nazuk kolli,

fulachi paklli,

soxik payatolem zotem,

oxem mhaka vaddhoixit zalear,

urchemna hamv jitem.

Pattli , kanknnam ,bazubond

pettu naka bhangamr.

Teabdola xikoi ge mhaka

zogak gheunk xingar.

Mottar cholounk xikoitana

xikoi ponkchorui kaddunk.

Anik xikoi

vattek yetleanche

hat dokey moddunk.

Loz -bhidd, kouchenxil,

kuttumbachi xan.

Thotandda soglim

sangche adim

xikoi atmosnman.

Bud'd gonzoupi riti bhati

matui xikovo naka.

Zomta toxi dige mhaka

xikxonnachim pakham.

Tona -monacher mhojea

polloupachem nasot hozaramni voll,

zalear ghottmutt ghoddoi mhaka

mongottank divn boll.

Sorbhoutonni zollim mollim

matlea gunddanche zhundd

ai mhaka her kaim

xikoi va xikoi naka

korunk xikoi bondd

korunk xikoi bondd !

- Songita Naik [Dec, 2019]