ಕವಿತಾकविताPoem

ಭೊಗ್ಣಾಂ (- ಜೋನ್ ಸುಂಟಿಕೊಪ್ಪ)

[ಕವಿತಾ] ಭೊಗ್ಣಾಂ (- ಜೋನ್ ಸುಂಟಿಕೊಪ್ಪ)

ಸಾದಿ ಮ್ಹಣ್ ದಿಸ್ಚಿ ಪುಣ್ ಭೋವ್ ಮಾರ್ಮಿಕ್ ವಿಡಂಬನಾತ್ಮಕ್ ಚಿಂತ್ಪಾಚಿ ಕವಿತಾ ಹಿ. ವ್ಹಾ! ಕಿತೆಂ ಸೊಭಾಯ್ ಹ್ಯಾ ಕವಿತೆಚಿ; ಹಾಂಗಾಸರ್ ಆಮ್ಚ್ಯಾ ಬಾಪಾ ವ ನಮಾನ್ ಮರಿಯೆ ಅಲ್ಲಾ ಹು ಅಖ್ಬರ್ ಆಸುಯೆತಾ, ಬಿಸ್ಮಿಲ್ಲಾ ರೆಹ್ಮಾನ್ ರಹೀಮ್ ಆಸುಯೆತಾ, ಹರಿ ಓಮ್ ವ ಆನಿ ಕಿತೆಂಯ್ ಆಸುಯೆತಾ. ಆನಿ ಖುರಿಸ್ ಮ್ಹಳ್ಯಾರ್ ಚಂದ್ರೆಮ್ ಆಸುಯೆತಾ ವಾ ತ್ರಿಶೂಲ್ ಆಸುಯೆತಾ ತೆಂ ಗರ್ಜೆಚೆಂ ನ್ಹಯ್ ಪುಣ್ ಕಿತೆಂ ಗರ್ಜೆಚೆಂ ಮ್ಹಳ್ಯಾರ್; ಕುಡಿಸವೆಂ ಜೀವ್ ಆಸ್ತಾನಾ ಸಂಸಾರಾಂತ್ ಶೃಂಗಾರ್, ಮುಖೊಟಿಂ ನ್ಹೆಸುನ್ ಲಜ್-ಮರ್ಯಾದ್ ಸಾಂಡುನ್, ಆಪ್ಲ್ಯಾ-ಪೆಲ್ಯಾಂಕ್ ಅಪ್ಲಿಂ ಭಗ್ಣಾಂ ಲಿಪವ್ನ್ ಹೆರಾಂಕ್ ದಾಕವ್ಪಾಚೆಂ ಜಿವಿತ್ ಜಿಯೆವ್ನ್ ಆತಾಂ ಕೂಡ್ ಸಾಂಡ್‌ಲ್ಲೊ ಅತ್ಮೊ ತ್ಯಾ ಮೊರೊನ್ ಗೆಲ್ಲ್ಯಾ ಭಗ್ಣಾಂ ಪಾಸತ್ ಮಾಗ್ಣೆಂ ಕರ್ತಾ ಆನಿ ವಿಪರ್ಯಾಸ್ ಮ್ಹಳ್ಯಾರ್ ಫೊಂಡಾವಯ್ಲೊ ಖುರಿಸ್ ತೆಂ ಮಾಗ್ಣೆಂ ಸುರು ಕರ್ತಾ. ಅನ್ಯೇಕಾ ಅರ್ಥಾನ್ ಸಾಂಗ್ಚೆಂ ತರ್, ಹೊ ಧರ್ಮ್ ಮ್ಹಳ್ಳೊ ಡೋಂಗ್ ಮನ್ಶಾಕ್ ಮನ್ಶಾಪಣಾನ್ ಜಿಯೆಂವ್ಕ್ ಸೊಡಿನಾ.

ಕಾಂಯ್ ಲಾಂಬ್ ಕಾಳ್ ಪರ್ಯಾಂತ್ ಯಾದಿಂತ್ ಉರ್ಚೆತಸಲಿ; ಅಮೂರ್ತ್ ಚಿಂತ್ಪಾಚಿ ವಿಡಂಬನಾತ್ಮಕ್ ಕವಿತಾ ಬರಂವ್ಚ್ಯಾ ಬಾಬ್ ಜೋನ್ ಸುಂಟಿಕೊಪ್ಪಾಚ್ಯಾ ಹ್ಯಾ ಕವಿತೆಚ್ಯಾ ಎಕೆಕಾ ಸಬ್ಧಾಕ್ ತುಕ್ಚೆಂ ಕಾಮ್ ತುಜೆರ್ ಸೊಡ್ತಾಂ.

[ಕವಿತಾ] ಭೊಗ್ಣಾಂ (- ಜೋನ್ ಸುಂಟಿಕೊಪ್ಪ)

ಭೊಗ್ಣಾಂ

ಏಕ್ ಆಮ್ಚ್ಯಾ ಬಾಪಾ

ಏಕ್ ನಮಾನ್ ಮರಿಯೆಕ್

ಹಾಂವ್ ಭೆಟಯ್ತಾಂ

ಸರ್‌ಲ್ಲ್ಯಾ ಸಮೇಸ್ತ್ ಭೊಗ್ಣಾಂ ಖಾತಿರ್....

ವೇಳ್ ಕಾಳ್ ಖಂಚೊಯ್ ಜಾಂವ್

ಲಜ್ ಮರ್ಯಾದ್ ನಾಂಚ್ ಜಾವ್ನ್

ದೀಸ್-ರಾತ್ ಮನಾಂತ್ ಲೊಳೊನ್

ಭರೊನ್ ಗಳವ್ನ್

ಕಾಳಿಜ್ ಭಿಜವ್ನ್

ನಪಂಯ್ಚ್ ಜಾಲ್ಲ್ಯಾ ಸರ್ವ್ ಮ್ಹಜ್ಯಾ ಭೊಗ್ಣಾಂನೊ;